leftcenterrightdel
លោក Ho Duc Phoc ឧបនាយករដ្ឋមន្ត្រីវៀតណាម ជួបសន្ទនាជាមួយលោក Peter Tschentscher អភិបាលទី១នៃទីក្រុងកំពង់ផែ Hamburg

នៅក្នុងជំនួបនេះ លោកឧបនាយករដ្ឋមន្ត្រីបានអះអាងថា វៀតណាមជានិច្ចកាលយកចិត្តទុកដាក់ក្នុងការពង្រឹងទំនាក់ទំនងភាពជាដៃគូយុទ្ធសាស្ត្រជាមួយអាល្លឺម៉ង់ និងសំដែងការរីករាយដោយឃើញថា ក្រោយរយៈពេលជិត ៥០ ឆ្នាំ នៃការបង្កើតទំនាក់ទំនងវៀតណាម-អាល្លឺម៉ង់កំពុងអភិវឌ្ឍយ៉ាងល្អលើវិស័យជាច្រើន និងនៅកម្រិតជាច្រើន ដោយមិនត្រឹមតែរវាងរដ្ឋាភិបាលសហព័ន្ធ និងវៀតណាមប៉ុណ្ណោះទេ ថែមទាំងរវាងបណ្តារដ្ឋ និងមូលដ្ឋានានារបស់វៀតណាមទៀតផង និងស្នើឲ្យទីក្រុង Hamburg លើកទឹកចិត្តឱ្យមានទំនាក់ទំនងជាមួយដៃគូ និងការផ្លាស់ប្តូរគណៈប្រតិភូជាមួយខេត្ត ទីក្រុងរបស់វៀតណាមដែលមានលក្ខណៈស្រដៀងគ្នា ឬបំពេញបន្ថែមគ្នា ដើម្បីជំរុញកិច្ចសហប្រតិបត្តិការ។ ទន្ទឹមនឹងនោះ ជំរុញសភាសហព័ន្ធអាល្លឺម៉ង់ ផ្ដល់សច្ចាប័នលើកិច្ចព្រមព្រៀងការពារការវិនិយោគវៀតណាម-សហភាពអឺរ៉ុប (EVIPA) នាពេលឆាប់ៗខាងមុខ ដើម្បីបង្កើតរបកគំហើញថ្មីក្នុងទំនាក់ទំនងពាណិជ្ជកម្ម-វិនិយោគរវាងប្រទេសទាំងពីរ។

leftcenterrightdel
ប្រតិភូទាំង​ឡាយ​ថតរូប​ជុំគ្នា

អភិបាលទីមួយនៃទីក្រុង Hamburg បានឯកភាពថា ទំនាក់ទំនងរវាងប្រទេសទាំងពីរកំពុងអភិវឌ្ឍយ៉ាងវិជ្ជមាន ដោយផ្ដល់ឱកាសជាច្រើនសម្រាប់កិច្ចសហប្រតិបត្តិការនាពេលអនាគត និងជឿជាក់ថា ជាមួយគុណសម្បត្តិជាទីក្រុងកំពង់ផែសមុទ្រ ទីក្រុង Hamburg ត្រៀមខ្លួនជាស្រេចដើម្បីចែករំលែកបទពិសោធន៍ក្នុងការអភិវឌ្ឍសេដ្ឋកិច្ចសមុទ្រ។ លោកក៏បានស្នើដែរថា ភាគីទាំងពីរត្រូវឆ្លៀតឱកាសពង្រឹងកិច្ចសហប្រតិបត្តិការសេដ្ឋកិច្ច អភិវឌ្ឍន៍ថាមពលកកើតឡើងវិញ ... ហើយសង្ឃឹមថា វៀតណាមនឹងតែងតាំងស្ថានកុងស៊ុលកិត្តិយសនៅទីក្រុង Hamburg នាពេលឆាប់ៗនេះ។

ភាគីទាំងពីរមានសេចក្តីសោមនស្សរីករាយដែលឃើញថា បរិមាណទំនិញផ្លាស់ប្តូររវាងកំពង់ផែវៀតណាម និងកំពង់ផែ Hamburg បានកើនឡើងជាលំដាប់ក្នុងរយៈពេលប៉ុន្មានឆ្នាំចុងក្រោយនេះ ជាមួយនឹងចំនួនកុងតឺន័រកើនឡើងពី ១០-១៥% ក្នុងមួយឆ្នាំ និងឯកភាពថា ធុរកិច្ចទ្វេភាគីត្រូវទាញយកផលប្រយោជន៍បន្ថែមទៀតដែលនាំមកដោយកិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុប (EVFTA)។

បកប្រែដោយ Duy Hoan