វៀតណាម - សិង្ហបុរី សហប្រតិបត្តិការដើម្បីជម្រុញការនាំចេញទៅកាន់ EU និងអង់គ្លេស
កប.អនឡាញ - នាថ្ងៃទី២៨ ខែសីហា នាយកដ្ឋានជម្រុញពាណិជ្ជកម្ម នៃក្រសួងឧស្សាហកម្មនិងពាណិជ្ជកម្មវៀតណាម ស្ថានទូតវៀតណាមប្រចាំសិង្ហបុរី និងសហព័ន្ធអ្នកផលិតសិង្ហបុរី បានសហការជាមួយស្ថាប័នពាក់ព័ន្ធ រៀបចំសិក្ខាសាលាតាមប្រព័ន្ធវីដេអូស្ដីពីការស្វែងយល់អំពីកិច្ចព្រមព្រៀងពាណិជ្ជកម្មសេរី (FTA) ដើម្បីចូលក្នុងទីផ្សារសហភាពអឺរ៉ុប (EU) និងអង់គ្លេសប្រកបដោយប្រសិទ្ធភាព-ឱកាសសហប្រតិបត្តិការសម្រាប់សហគ្រាសវៀតណាមនិងសិង្ហបុរី។ ព្រឹត្តិការណ៍នេះមានការចូលរួមពីតំណាងសហគ្រាស សហព័ន្ធ និងអង្គការជម្រុញពាណិជ្ជកម្មរបស់វៀតណាមនិងសិង្ហបុរី ចំនួន ២០០ នាក់។
ថ្លែងក្នុងសិក្ខាសាលា លោក Vu Ba Phu ប្រធាននាយកដ្ឋានជម្រុញពាណិជ្ជកម្ម នៃក្រសួងឧស្សាហកម្មនិងពាណិជ្ជកម្មវៀតណាម បានឲ្យដឹងថា វៀតណាមនិងសិង្ហបុរី ជាប្រទេសអាស៊ានទាំងពីរដែលមានកិច្ចសហប្រតិបត្តិការលើវិស័យជាច្រើន ជាពិសេសក្នុងវិស័យសេដ្ឋកិច្ច ពាណិជ្ជកម្ម និងវិនិយោគ។ ទន្ទឹមនឹងនោះ សិង្ហបុរីក៏ជាប្រទេសដៃគូពាណិជ្ជកម្មធំទី៤ របស់វៀតណាមក្នុងចំណោមប្រទេសអាស៊ានផងដែរ។
|
|
ទិដ្ឋភាពនៃសិក្ខាសាលាតាមប្រព័ន្ធវីដេអូ |
លោក Mai Phuoc Dung ឯកអគ្គរដ្ឋទូតវៀតណាមប្រចាំសិង្ហបុរីបានវាយតម្លៃងថា វៀតណាម និងសិង្ហបុរីសុទ្ធតែមានខឿនសេដ្ឋកិច្ចបើកចំហរបស់តំបន់អាស៊ីអាគ្នេយ៍។ ហេតុនេះ ប្រទេសទាំងពីរគប្បីសហប្រតិបត្តិការក្នុងការនាំចេញទៅកាន់ប្រទេសទី៣។
លោក Alaim Cany ប្រធានសភាពាណិជ្ជកម្មអឺរ៉ុបប្រចាំនៅវៀតណាម (EuroCham) បានឲ្យដឹងថា តាំងពីកិច្ចព្រមព្រៀង FTA រវាងវៀតណាមនិង EU (កិច្ចព្រមព្រៀង EVFTA) ចូលជាធរមានមក ទំនិញនាំចេញទៅវៀតណាមរបស់ EU ៦៥% និងទំនិញនាំចេញទៅកាន់ EU របស់វៀតណាម ៧១% ត្រូវបានលើកលែងពន្ធ។ ក្នុងរយៈពេលមួយទសវត្សរ៍ខាងមុខ ចំនួននេះនឹងកើនឡើងដល់ជិត ៩៩%។ ហេតុនេះ វៀតណាមនឹងក្លាយជាគោលដៅទាក់ទាញអារម្មណ៍ចំពោះវិនិយោគិនអឺរ៉ុប ព្រមទាំង ទំនិញវៀតណាមអាចចូលក្នុងទីផ្សារធំដោយមានប្រជាជនប្រមាណ ៤៥០ លាននាក់។ ប៉ុន្តែ លោកក៏បានលើកឡើងនូវឧបសគ្គសម្រាប់សមាជិក EuroCham នោះគឺបែបបទរដ្ឋបាល។ ដូច្នេះ ភាគីទាំងឡាយគប្បីធានាការអនុវត្តដោយជោគជ័យនូវកិច្ចព្រមព្រៀង EVFTA៕
បកប្រែដោយ Thuy Anh