អូស្ត្រាលីជួយវៀតណាមក្នុងការអនុវត្តបញ្ញាសិប្បនិម្មិតដើម្បីស្តារសេដ្ឋកិច្ចឡើងវិញក្រោយកូវីដ១៩
កប.អនឡាញ នាថ្ងៃទី ៤ សីហា រដ្ឋាភិបាលអូស្រ្តាលីបានប្រកាសផ្តល់ថវិកាចំនួន ៦៥០,០០០ ដុល្លារអូស្រ្តាលី ដើម្បីជួយគាំទ្រដល់គំនិតផ្តួចផ្តើមថ្មីស្តីពីការជួយដល់ការអនុវត្តបញ្ញាសិប្បនិម្មិត (AI) ក្នុងការស្តារសេដ្ឋកិច្ចវៀតណាមឡើងវិញ ក្រោយការរីករាលដាលកូវីដ ១៩ ។
ជាផ្នែកមួយនៃកម្មវិធី Aus4Innovation ដែលសហប្រតិបត្តិការជាមួយក្រសួងវិទ្យាសាស្រ្តនិងបច្ចេកវិទ្យាវៀតណាម គំនិតផ្តួចផ្តើមនេះបានជួយធ្វើឱ្យជាក់ស្តែងនូវដំណោះស្រាយនានាអំពី AI ក្នុងបំណងដោះស្រាយផលវិបាកនានាដោយសារជំងឺរាតត្បាតក្នុងរយៈពេលខ្លី ក៏ដូចជាជួយគាំទ្រដល់តម្រូវការនានាក្នុងរយៈពេលវែង រួមជាមួយការជួយគាំទ្រខាងបច្ចេកទេសដើម្បីអនុវត្តយុទ្ធសាស្ត្រស្តីពីបញ្ញាសិប្បនិម្មិតរបស់វៀតណាម និងផ្តល់ការបណ្តុះបណ្តាលដល់ភាគីចូលរួមនានាក្នុងប្រព័ន្ធអេកូឡូស៊ី AI។
សេចក្តីប្រកាសនេះត្រូវបានលើកឡើងនៅក្នុងកិច្ចប្រជុំស្តីពីភាពជាដៃគូច្នៃប្រឌិតវៀតណាម-អូស្ត្រាលី លើកទី២ រវាងស្ថានទូតអូស្ត្រាលីប្រចាំនៅវៀតណាម និងក្រសួងវិទ្យាសាស្ត្រ និងបច្ចេកវិទ្យាវៀតណាម ក្រោមសហអធិបតីភាព លោកស្រី Robyn Mudie ឯកអគ្គរដ្ឋទូតអូស្ត្រាលី និងលោក Chu Ngoc Anh រដ្ឋមន្រ្តីក្រសួងវិទ្យាសាស្ត្រនិងបច្ចេកវិទ្យាវៀតណាម។
|
|
ប្រតិភូទាំងឡាយថតរូបជុំគ្នា (រូបថត៖ congthuong.vn) |
នៅក្នុងកិច្ចប្រជុំនោះ ភាគីទាំងពីរបានពិនិត្យឡើងវិញនូវលទ្ធផលលេចធ្លោនានាក្រោយពីរយៈពេល ១៨ ខែដែលអនុវត្តកម្មវិធី Aus4Innovation ដែលក្នុងនោះ កម្មវិធីបានផ្តល់ថវិកាជិត ៤ លានដុល្លារអូស្ត្រាលីដល់គំនិតផ្តួចផ្តើមនានាស្តីពីកិច្ចសហប្រតិបត្តិការលើការច្នៃប្រឌិតរបស់ដៃគូនានាទាំងវៀតណាម និងអូស្ត្រាលី រួមទាំងការជួយលើកកំពស់សមត្ថភាពធ្វើពាណិជ្ជកម្មសម្រាប់លទ្ធផលនៃការស្រាវជ្រាវរបស់វិទ្យាស្ថានស្រាវជ្រាវ និងសាកលវិទ្យាល័យនានារបស់វៀតណាម ក៏ដូចជាការជួយគាំទ្រផ្នែកបច្ចេកទេសសម្រាប់ការស្រាវជ្រាវគោលនយោបាយសំខាន់ៗលើវិស័យវិទ្យាសាស្ត្រ បច្ចេកវិទ្យា និងការច្នៃប្រឌិតផងដែរ។
ដោយបន្តពីគំនិតផ្តួចផ្តើមស្តីពីការជួយគាំទ្រដល់ការអភិវឌ្ឍសេណារីយ៉ូសេដ្ឋកិច្ចឌីជីថលនាពេលអនាគតរបស់វៀតណាមដែលផ្សាភ្ជាប់យ៉ាងជិតស្និទ្ធរវាងដំណើរការឌីជីថល និងកំណើនសេដ្ឋកិច្ចនោះ ការផ្តល់ជំនួយដល់គំនិតផ្តួចផ្តើមខាង AI គឺជាជំហានសមស្របមួយនៃកម្មវិធី Aus4Innovation ក្នុងបំណងជួយវៀតណាមទប់ទល់នឹងជំងឺកូវីដ១៩ ។
លោកស្រី Robyn Mudie ឯកអគ្គរដ្ឋទូតអូស្ត្រាលីប្រចាំនៅវៀតណាមបានមានប្រសាសន៍ថា ការច្នៃប្រឌិតគឺជាសសរស្តម្ភមួយក្នុងចំណោមសសរស្តម្ភទាំងបីនៃទំនាក់ទំនងទ្វេភាគីរវាងប្រទេសទាំងពីរ។ នៅក្នុងបរិបទដែលប្រឈមមុខនឹងជំងឺរាតត្បាតសកលនេះ ការច្នៃប្រឌិតពិតជាមានសារៈសំខាន់ជាងពេលណាៗទាំងអស់។ គំនិតផ្តួចផ្តើមស្តីពីការជួយដល់ការអនុវត្តបញ្ញាសិប្បនិម្មិតគឺជាគំរូដ៏ល្អមួយដែលបញ្ជាក់ថាបច្ចេកវិទ្យាទំនើបអាចអនុវត្តយ៉ាងឆាប់រហ័សដើម្បីឆ្លើយតបនឹងតម្រូវការថ្មីៗដែលនឹងកើតឡើងរបស់វៀតណាម៕
បកប្រែដោយ Duy Hoan