រដ្ឋាភិបាលវៀតណាម និងជប៉ុន ចុះហត្ថលេខាលើកំណត់ទូតស្តីពីប្រាក់កម្ចី ODA ជាង ៦០០ លានដុល្លារអាមេរិក

នៅរសៀលថ្ងៃទី ២០ ខែមីនា នៅទីក្រុងហាណូយ  លោក Tran Quoc Phuong អនុរដ្ឋមន្ត្រីក្រសួងហិរញ្ញវត្ថុវៀតណាម ក្នុងនាមរដ្ឋាភិបាលវៀតណាម និងលោក Ito Naoki ឯកអគ្គរដ្ឋទូតវិសាមញ្ញ និងពេញសមត្ថភាពរបស់ជប៉ុនប្រចាំនៅប្រទេសវៀតណាម ក្នុងនាមរដ្ឋាភិបាលជប៉ុន បានចុះហត្ថលេខាលើកំណត់ទូតផ្លាស់ប្តូរដែលផ្តល់ប្រាក់កម្ចីសម្រាប់កម្មវិធី និងគម្រោងចំនួនបី សរុបជាង ៦០០ លានដុល្លារអាមេរិក។

កម្មវិធី និងគម្រោងចំនួនបីដែលបានចុះហត្ថលេខារួមមាន៖ កម្មវិធីគាំទ្រថវិការួមគ្នាសម្រាប់ការផ្លាស់ប្តូរបៃតងឆ្ពោះទៅរកកំណើនបៃតង និងការសម្របខ្លួនទៅនឹងការប្រែប្រួលអាកាសធាតុ; គម្រោងអភិវឌ្ឍន៍ជនបទសម្របខ្លួនទៅនឹងគ្រោះមហន្តរាយធម្មជាតិ; និងគម្រោងអភិវឌ្ឍន៍ហេដ្ឋារចនាសម្ព័ន្ធសម្របខ្លួនទៅនឹងការប្រែប្រួលអាកាសធាតុ ដើម្បីគាំទ្រផលិតកម្មសម្រាប់ជនជាតិភាគតិចនៅតំបន់ព្រៃភ្នំ ភាគខាងជើង។

តំណាងរដ្ឋាភិបាលវៀតណាម និងជប៉ុន បានផ្លាស់ប្តូរកំណត់ទូតស្តីពីប្រាក់កម្ចី ODA ជាង ៦០០ លានដុល្លារអាមេរិក (រូបថត៖ VOV)

ថ្លែងនៅក្នុងពិធីចុះហត្ថលេខា លោក Tran Quoc Phuong អនុរដ្ឋមន្ត្រីក្រសួងហិរញ្ញវត្ថុវៀតណាម បានសង្កត់ធ្ងន់ថា៖ កំណត់ទូតផ្លាស់ប្តូរនានាដែលបានចុះហត្ថលេខានៅថ្ងៃនេះ មានចំនួនសរុបជិត ៩០ ពាន់លានយ៉េនជប៉ុន បានបញ្ជាក់បន្ថែមទៀតអំពីតួនាទីរបស់ប្រទេសជប៉ុនជាអ្នកផ្តល់ជំនួយទ្វេភាគីធំជាងគេរបស់វៀតណាម និងបង្ហាញពីចំណាប់អារម្មណ៍របស់រដ្ឋាភិបាលជប៉ុនក្នុងការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម។ ក្នុងពេលជាមួយគ្នានេះ នេះគឺជាជំហានជាក់ស្តែងមួយក្នុងការសម្រេចបាននូវការប្តេជ្ញាចិត្តរបស់ថ្នាក់ដឹកនាំជាន់ខ្ពស់នៃប្រទេសទាំងពីរ ដើម្បីលើកកម្ពស់កិច្ចសហប្រតិបត្តិការ ODA ជំនាន់ថ្មី ដោយផ្តល់អាទិភាពដល់ការផ្លាស់ប្តូរបៃតង និងការសម្របខ្លួនទៅនឹងការប្រែប្រួលអាកាសធាតុ។

នៅខាងជប៉ុន លោក Ito Naoki ឯកអគ្គរដ្ឋទូតវិសាមញ្ញ និងពេញសមត្ថភាពរបស់ជប៉ុនប្រចាំនៅវៀតណាម បានបញ្ជាក់ថា៖ ជប៉ុនគាំទ្រទិសដៅកែទម្រង់របស់វៀតណាមឆ្ពោះទៅរកយុគសម័យថ្មីមួយ។ ខ្ញុំសង្ឃឹមថា មូលនិធិ ODA របស់ជប៉ុននឹងត្រូវបានប្រើប្រាស់ប្រកបដោយប្រសិទ្ធភាពនៅក្នុងវិស័យដូចជា នវានុវត្តន៍ ស៊ីមីកុងដុកទ័រ ការធ្វើបរិវត្តកម្មបៃតង និងការធ្វើបរិវត្តកម្មឌីជីថល ដែលរួមចំណែកដល់ការសម្រេចបាននូវគោលដៅកំណើនសេដ្ឋកិច្ចរបស់ខ្លួនសម្រាប់រយៈពេលប្រាំឆ្នាំ ២០២៦-២០៣០។ ខ្ញុំរំពឹងថា គម្រោង ODA ចំនួនបីដែលទើបចុះហត្ថលេខាថ្មីនឹងក្លាយជាចំណុចចាប់ផ្តើមអំណោយផលសម្រាប់ការអនុវត្តយ៉ាងសកម្មនៃគំរូ ODA ជំនាន់ថ្មីរវាងវៀតណាម និងជប៉ុន៕

បកប្រែដោយ Duy Hoan