ទីក្រុងហាណូយនឹងបង្កើតលក្ខខណ្ឌអំណោយផលសម្រាប់សហគ្រាសថៃចូលមកធ្វើអាជីវកម្មយូរអង្វែងនៅទីក្រុង
កប.អនឡាញ - នារសៀលថ្ងៃទី ២ មិថុនា ក្នុងជំនួបជាមួយឯកអគ្គរដ្ឋទូតវិសាមញ្ញ និងពេញសមត្ថភាពនៃព្រះរាជាណាចក្រថៃប្រចាំនៅវៀតណាម លោក Tanee Sangrat លេខានៃគណៈកម្មាធិការបក្សទីក្រុងហាណូយ លោក Vuong Dinh Hue បានអះអាងថា ទីក្រុងហាណូយនឹងបង្កើតលក្ខខណ្ឌអំណោយផលសម្រាប់សហគ្រាសថៃចូលមកធ្វើអាជីវកម្មយូរអង្វែងនៅទីក្រុង។
លោក Vuong Dinh Hue ក៏បានលើកឡើងផងដែរថា ក្នុងរយៈពេលកន្លងមក ទុនវិនិយោគពីថៃចូលមកទីក្រុងហាណូយនៅមានកម្រិតតិចតួចណាស់ ទីក្រុងសង្ឃឹមថានឹងមានសហគ្រាសថៃកាន់តែច្រើនទៀតចូលមកវិនិយោគនៅទីក្រុងហាណូយនាពេលខាងមុខ។
|
|
លេខាគណៈកម្មាធិការបក្សទីក្រុងហាណូយ លោក Vuong Dinh Hue ទទួលជួប លោក Tanee Sangrat អគ្គរដ្ឋទូតវិសាមញ្ញ និងពេញសមត្ថភាពនៃព្រះរាជាណាចក្រថៃប្រចាំនៅវៀតណាម (រូបថត៖ vnanet.vn) |
លោក Vuong Dinh Hue បានបន្ថែមទៀតថា ក្រោមការដឹកនាំរបស់រដ្ឋាភិបាល និងអាជ្ញាធរទីក្រុង រួមទាំងការចូលរួមពីប្រជាជន រហូតមកដល់ពេលនេះ ប្រទេសវៀតណាមនិយាយរួម និងទីក្រុងហាណូយនិយាយដោយឡែក បានគ្រប់គ្រងជំងឺរាតត្បាតកូវីដ-១៩ យ៉ាងល្អ ដោយរក្សាអត្រាកំណើនបាន៣,៧២% ធានាសុខមាលភាពសង្គម រក្សាសន្តិសុខនយោបាយ សន្តិសុខសណ្តាប់ធ្នាប់ និងសុវត្ថិភាពសង្គម។ ជាពិសេស ទីក្រុងហាណូយបច្ចុប្បន្នកំពុងអនុវត្តដំណោះស្រាយជាច្រើនសម្រាប់ការស្តារ និងអភិវឌ្ឍន៍សេដ្ឋកិច្ចឡើងវិញ រួមទាំងការរៀបចំសន្និសីទស្តីពីការជម្រុញការវិនិយោគក្នុងទ្រង់ទ្រាយធំ នាថ្ងៃទី ២៧ ខែមិថុនា ឆ្នាំ២០២០ ខាងមុខនេះផងដែរ។
ដោយសង្កត់ធ្ងន់ថា ព្រឹត្តិការណ៍នេះជាការសម្តែងនូវការប្តេជ្ញាចិត្តខ្ពស់របស់អាជ្ញាធរទីក្រុងហាណូយក្នុងការបន្តទាក់ទាញការវិនិយោគក្នុងស្រុក និងបរទេស លោក Vuong Dinh Hue បានអញ្ជើញលោកឯកអគ្គរដ្ឋទូត Tanee Sangrat និងតំណាងសហគ្រាសថៃចូលរួមក្នុងសន្និសីទនេះ។
អរគុណចំពោះការទទួលស្វាគមន៍ និងការចែករំលែកដ៏ស្មោះត្រង់ពីលោក Vuong Dinh Hue លេខាគណៈកម្មាធិការបក្សទីក្រុងហាណូយ លោកឯកអគ្គរដ្ឋទូត Tanee Sangrat បានវាយតម្លៃខ្ពស់ចំពោះលទ្ធផលនៃការគ្រប់គ្រងការរីករាលដាលជំងឺរាតត្បាតកូវីដ-១៩ របស់ប្រទេសវៀតណាមនិយាយរួម និងទីក្រុងហាណូយនិយាយដោយឡែក។ ដោយសង្កត់ធ្ងន់ថា ឆ្នាំ ២០២០ គឺជាពេលវេលាដែលភាគីទាំងពីរអាចពិភាក្សាគ្នាអំពីយន្តការនានាដើម្បីជំរុញ និងសម្រួលដល់ពាណិជ្ជកម្ម និងការវិនិយោគទ្វេភាគី ដូច្នេះ លោកឯកអគ្គរដ្ឋទូត Tanee Sangrat ស្នើឱ្យភាគីទាំងពីរពិចារណាពីលទ្ធភាពរៀបចំសិក្ខាសាលារួមគ្នាដើម្បីពិភាក្សាពីបញ្ហាពាណិជ្ជកម្ម និងការវិនិយោគ៕
បកប្រែដោយ Duy Hoan