គោលនយោបាយនិងអភិវឌ្ឍន៍
ប្រសិទ្ធភាពពីសំណង់ទឹកប្រើប្រាស់សហគមន៍
កប.អនឡាញ - ក្នុងប៉ុន្មានឆ្នាំថ្មីៗនេះ ពីកម្មវិធីលេខ ១៣៥ កម្មវិធីគោលដៅជាតិកសាងជនបទថ្មី តំបន់ភ្នំ និងតំបន់ជនជាតិភាគតិចនៅស្រុក Binh Lieu ខេត្ត Quang Ninh បាននិងកំពុងវិនិយោគលើការសាងសង់ និងតម្លើងសំណង់ផ្គត់ផ្គង់ទឹកប្រើប្រាស់សហគមន៍ តាមរយៈនោះរួមចំណែកក្នុងការដោះស្រាយស្ថានភាពកង្វះទឹក និងកែលំអជីវភាពរស់នៅរបស់ប្រជាជន។
កាលពីមុន ដើម្បីមានទឹកប្រើប្រាស់ប្រចាំថ្ងៃ ប្រជាជននៅភូមិ Na Luong ឃុំ Luc Hon ស្រុក Binh Lieu ត្រូវទៅយកទឹកពីជ្រោះមកប្រើប្រាស់នៅរដូវប្រាំង ភូមិតែងតែជួបការខ្វះទឹកជានិច្ច។ ចាប់តាំងពីឆ្នាំ ២០១៧ មក ភូមិ Na Luong ត្រូវបានស្រុក Binh Lieu វិនិយោគសាងសង់សំណង់ផ្គត់ផ្គង់ទឹកប្រើប្រាស់សហគមន៍ ដោយចំណាយថវិកាជាង ១.២ ពាន់លានដុង។ សំណង់នេះរួមមានអាងចម្រោះទឹក អាងស្តុកទឹក និងបំពង់បង្ហូរទឹកត្រូវបានដាក់ឱ្យប្រើប្រាស់ជាផ្លូវការពីឆ្នាំ២០១៨ តាមរយៈនោះផ្គត់ផ្គង់ទឹកប្រើប្រាស់ដល់គ្រួសារចំនួន ៧៨ ក្នុងភូមិ។ ដោយមានសំណង់ផ្គត់ផ្គង់ទឹកប្រើប្រាស់សហគមន៍ គ្រួសារភាគច្រើននៅក្នុងភូមិ Na Luong អាចប្រើប្រាស់ទឹកដែលមានអនាម័យ ជាពិសេសគ្រួសារជាច្រើនក៏បានទិញធុងប្លាស្ទីកបន្ថែមដើម្បីឱ្យមានប្រភពទឹកប្រើប្រាស់គ្រប់គ្រាន់។
|
|
រូបថតឧទាហរណ៍៖ baotainguyenmoitruong.vn |
លោក Be Van Man ប្រជាពលរដ្ឋនៅភូមិ Na Luong បានឲ្យដឹងថា៖ “ដោយមានការយកចិត្ដទុកដាក់ពីអាជ្ញាធរក្នុងការវិនិយោគសាងសង់អាងទឹកស្អាតនៅក្នុងភូមិបានជួយឱ្យប្រជាពលរដ្ឋមានទឹកស្អាតប្រើប្រាស់។ យើងខ្ញុំសប្បាយចិត្តណាស់”។ ដើម្បីឲ្យប្រជាពលរដ្ឋមានទឹកស្អាតប្រើប្រាស់ ចាប់ពីឆ្នាំ ២០១៦ រហូតមកដល់បច្ចុប្បន្ននេះ ឃុំ Luc Hon បានវិនិយោគសាងសង់សំណង់ទឹកប្រើប្រាស់សហគមន៍ចំនួន ៧ ដោយមានតម្លៃសរុបជាង ១៨.៣ ពាន់លានដុង។ សំណង់ទាំងនេះបានដោះស្រាយបញ្ហាកង្វះទឹក និងទឹកគ្មានអនាម័យ ដោយហេតុនេះរួមចំណែកលើកកំពស់គុណភាពជីវភាពរស់នៅរបស់ប្រជាជននៅតំបន់ភ្នំនៅទីនេះ។
លោកស្រី Vi Thi Hoa លេខាគណៈកម្មាធិការបក្សឃុំ Luc Hon បានឲ្យដឹងថា៖ “ដើម្បីលើកកំពស់ប្រសិទ្ធភាពនៃសំណង់ទឹកប្រើប្រាស់សហគមន៍ក្នុងភូមិ គណៈកម្មាធិការបក្សបានបញ្ជាឲ្យបណ្ដាភូមិវិនិយោគសាងសង់សំណង់ត្រូវបង្កើតបទប្បញ្ញត្តិគ្រប់គ្រងដើម្បីប្រើប្រាស់។ តាមរយៈការត្រួតពិនិត្យ រហូតមកដល់ពេលនេះ គ្រួសារនីមួយៗនៅក្នុងភូមិបានលើកកម្ពស់ការទទួលខុសត្រូវក្នុងការប្រើប្រាស់ទឹកសហគមន៍។ អាចនិយាយបានថា សំណង់នេះមានប្រសិទ្ធភាព និងធានាបាននូវការផ្គត់ផ្គង់ទឹកស្អាតគ្រប់គ្រាន់សម្រាប់ប្រជាពលរដ្ឋ”។
មិនត្រឹមតែនៅឃុំ Luc Hon ប៉ុណ្ណោះទេ ថែមទាំងក្នុងរយៈពេលប៉ុន្មានឆ្នាំកន្លងមកនេះ ប្រជាជននៅភូមិដាច់ស្រយាលផ្សេងទៀតនៃស្រុក Binh Lieu ក៏ទទួលបានការយកចិត្តទុកដាក់ពីគ្រប់លំដាប់ថ្នាក់ និងស្ថាប័នក្នុងការវិនិយោគសាងសង់សំណង់ទឹកប្រើប្រាស់សហគមន៍។ ដូចភូមិ Phieng Sap កាលពីមុនគឺជាភូមិពិបាកពិសេសរបស់ឃុំ Dong Tam ស្រុក Binh Lieu។ ក្នុងភូមិមានគ្រួសារចំនួន ៨៣ គ្រួសារ ដែលមានប្រជាជនជាង ៣៣០ នាក់ ហើយភាគច្រើនជាជនជាតិ Dao។ កាលពីមុន ប្រជាពលរដ្ឋភាគច្រើននៅក្នុងភូមិ Phieng Sap ត្រូវប្រើប្រាស់ទឹកអណ្តូងដែលជីកដោយខ្លួនឯង ឬ យកទឹកពីអូរ ដែលមិនមានអនាម័យ។ ក្នុងឆ្នាំ ២០១៧ ភូមិ Phieng Sap ត្រូវបានជួយឧបត្ថម្ភសាងសង់អាងទឹកប្រើប្រាស់សហគមន៍ ដោយចំណាយថវិកាសរុបចំនួន ១៣១ លានដុងពីសហគមន៍។ សំណង់ដែលបានដាក់ឱ្យប្រើប្រាស់មិនត្រឹមតែផ្គត់ផ្គង់ទឹកដល់ប្រជាពលរដ្ឋប៉ុណ្ណោះទេ ថែមទាំងផ្គត់ផ្គង់ដល់សាលាបឋមសិក្សា និងមត្តេយ្យសិក្សានៅក្នុងភូមិផងដែរ។
លោកគ្រូ Vi Thi Chong នៅសាលាមត្តេយ្យ Phieng Sap ឲ្យដឹងថា៖ “កាលពីមុន សាលាខ្វះទឹកប្រើប្រាស់ច្រើនណាស់ ហើយអ្នកគ្រូត្រូវទៅសុំទឹកពីផ្ទះប្រជាពលរដ្ឋដើម្បីឲ្យក្មួយៗប្រើប្រាស់។ ចាប់ពីពេលមានសំណង់ទឹកប្រើប្រាស់សហគមន៍បានជួយក្មួយៗមានទឹកស្អាតប្រើប្រាស់ ដោយហេតុនេះ ជួយលើកកម្ពស់គុណភាពអប់រំ”។
ពីមូលដ្ឋានមួយដែលនៅតែប្រឈមមុខនឹងការលំបាកជាច្រើនសម្រាប់ទឹកប្រើប្រាស់ រហូតមកដល់ពេលនេះ ស្រុក Binh Lieu ចំនួនប្រជាជន ១០០% មានទឹកស្អាតប្រើប្រាស់។ អាចមើលឃើញថា សំណង់ទឹកប្រើប្រាស់សហគមន៍ត្រូវបានសាងសង់នៅតំបន់ជនជាតិភាគតិចក្នុងស្រុក Binh Lieu មានប្រសិទ្ធភាព បំពេញតម្រូវការបន្ទាន់របស់ប្រជាជន៕
បកប្រែដោយ Pham Diep