កិច្ចខិតខំប្រឹងប្រែងកាត់បន្ថយភាពក្រីក្រនៅស្រុក Muong Lat
កប.អនឡាញ - Muong Lat ជាស្រុកក្រីក្រនៅតំបន់ភ្នំជាប់ព្រំដែនរបស់ខេត្ត Thanh Hoa វៀតណាម ដែលមានប្រជាជនប្រហែល ៩០% ជាជនជាតិភាគតិច ហើយជីវភាពរស់នៅរបស់ប្រជាជនមានស្ថានភាពលំបាក និងនៅមានទំនៀមទម្លាប់ចាស់កម្រិល។
ក្នុងប៉ុន្មានឆ្នាំកន្លងមក ជាមួយនឹងគោលនយោបាយរបស់បក្ស និងរដ្ឋ ការខិតខំប្រឹងប្រែងរបស់អាជ្ញាធរមូលដ្ឋាន និងប្រជាជនក្នុងការអនុវត្តព្រមៗគ្នានូវដំណោះស្រាយជាច្រើន និងការអនុវត្តយ៉ាងជាក់ស្តែង និងមានប្រសិទ្ធភាពនូវគោលនយោបាយជនជាតិជាច្រើនបានជួយ Muong Lat ងើបចេញពីភាពក្រីក្របន្តិចម្តងៗ។
ស្រុក Muong Lat មានផ្ទៃដីសរុបជាង ៨១,២០០ ហិកតា ក្នុងនោះ ដីព្រៃឈើជិត ៧៥,០០០ ហិកតា ដូច្នេះដីផលិតកម្មមានតិចតួចណាស់។ យោងតាមលោក Hoang Van Dung អនុប្រធានគណៈកម្មាធិការប្រជាជនស្រុក Muong Lat ដើម្បីអនុវត្តគោលនយោបាយស្ដីពីការអភិវឌ្ឍសេដ្ឋកិច្ច សង្គម គណៈអចិន្ត្រៃយ៍នៃគណៈកម្មាធិការបក្សខេត្ត Thanh Hoa បានចេញសេចក្តីសម្រេចចិត្តលេខ ១១-NQ/TU ចុះថ្ងៃទី ២៩ ខែកញ្ញា ឆ្នាំ ២០២២ ស្ដីពីការកសាង និងអភិវឌ្ឍស្រុក Muong Lat ដល់ឆ្នាំ២០៣០ ចក្ខុវិស័យដល់ឆ្នាំ២០៤៥ ក្នុងបំណងបង្កើតមូលដ្ឋានសម្រាប់ស្រុក Muong Lat រីកចម្រើន។ បន្ទាប់មក ស្រុកបានផ្តោតសំខាន់លើការដឹកនាំ ឃោសនានិងចលនាប្រជាជនឲ្យអនុវត្តគោលនយោបាយដែលផ្តល់អាទិភាពដល់ការអភិវឌ្ឍកសិកម្ម-រុក្ខាប្រមាញ់ និងអភិវឌ្ឍការចិញ្ចឹមសត្វ។ ស្រុកក៏បានផ្តោតលើការអភិវឌ្ឍស្រូវដំណើប Cay Noi ដែលជាផលិតផល OCOP លំដាប់ផ្កាយ ៣ ដើម្បីក្លាយជាផលិតផលប្រចាំរបស់មូលដ្ឋាន។
បច្ចុប្បន្ននេះ ស្រុកទាំងមូលមានផ្ទៃដីដាំដុះស្រូវប្រមាណ ៨០០ ហិកតា ក្នុងនោះ ផ្ទៃដីដាំស្រូវដំណើប Cay Noi ប្រហែល ៦០០ ហិកតា។ នេះជាពូជស្រូវដំណើបដែលដាំដុះច្រើនជាងគេនៅឃុំ Quang Chieu និងទទួលបានទិន្នផលខ្ពស់។ លោក Ha Van Hoan លេខាគណៈកម្មាធិការបក្សឃុំ Quang Chieu បានឲ្យដឹងថា ស្រូវដំណើប Cay Noi គឺជាពូជស្រូវពិសេសនៃមូលដ្ឋាន តម្លៃនៃពូជស្រូវនេះគឺខ្ពស់ជាងពូជស្រូវដទៃទៀត ហើយបង្កើនចំណូលសម្រាប់ប្រជាជន។ នាពេលខាងមុខ ឃុំ Quang Chieu នឹងបន្តសហការជាមួយស្ថាប័នមានសមត្ថកិច្ចក្នុងការស្រាវជ្រាវ និងផលិតស្រូវតាមស្តង់ដារ VietGAP ដែលផ្សារភ្ជាប់នឹងការលក់ផលិតផល រួមចំណែកលើកកំពស់គុណភាព និងម៉ាកស្រូវដំណើប Cay Noi បើកឱកាសដើម្បីរួចផុតពីភាពក្រីក្រសម្រាប់គ្រួសារជាច្រើន។
ដោយសារមានការចូលរួមនៃប្រព័ន្ធនយោបាយទាំងមូលក្នុងការលុបបំបាត់ភាពអត់ឃ្លាន កាត់បន្ថយភាពក្រីក្រ និងកសាងជនបទថ្មី អត្រាគ្រួសារក្រីក្រនៅស្រុក Muong Lat បានថយចុះពីមួយឆ្នាំទៅមួយឆ្នាំ។ នៅចុងឆ្នាំ២០២៣ អត្រាគ្រួសារក្រីក្រនៅស្រុក Muong Lat នឹងមានប្រហែល ៣៩% (ធ្លាក់ចុះ ១៦.៨% បើធៀបនឹងឆ្នាំ២០២១) ក្នុងនោះ ប្រាក់ចំណូលជាមធ្យមសម្រាប់មនុស្សម្នាក់នឹងសម្រេចបានជាង ២៥ លានដុងក្នុងមួយឆ្នាំ។ ផលិតកម្មឧស្សាហកម្ម សំណង់ជាមូលដ្ឋាន និងសេវាកម្មពាណិជ្ជកម្មនៅមូលដ្ឋានកំពុងអភិវឌ្ឍជាបណ្តើរៗ ហេដ្ឋារចនាសម្ព័ន្ធដូចជា អគ្គិសនី ផ្លូវ សាលារៀន ស្ថានីយ៍ ផ្ទះវប្បធម៌... ត្រូវបានវិនិយោគ។ ទន្ទឹមនឹងនោះ សេវាកម្មពាណិជ្ជកម្មក៏អភិវឌ្ឍ បំពេញតម្រូវការផលិតកម្ម និងជីវភាពប្រចាំថ្ងៃរបស់ប្រជាជនផងដែរ៕
បកប្រែដោយ Thuy Anh