ជូនពរឆ្នាំថ្មីឆ្នាំ២០២៦ ជូនដល់ថ្នាក់ដឹកនាំជាន់ខ្ពស់នៃកងយោធពលខេមរភូមិន្ទ

នៅថ្ងៃទី២៥ ខែមីនា នៅអគ្គបញ្ជាការដ្ឋាននៃកងយោធពលខេមរភូមិន្ទ ក្នុងបរិយាកាសកក់ក្តៅ និងរួសរាយរាក់ទាក់ លោកឯកអគ្គរដ្ឋទូត Nguyen Minh Vu ជូនពរឆ្នាំថ្មីដល់លោកនាយឧត្តមសេនីយ៍ វង្ស ពិសេន និងឧត្តមសេនីយ៍ នាយទាហាន នាយទាហានរង និងពលទាហានទាំងអស់នៃកងយោធពលខេមរភូមិន្ទ ដោយសង្កត់ធ្ងន់លើសារៈសំខាន់នៃការពង្រឹងសាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ក្នុងបរិបទនៃស្ថានភាពតំបន់ និងពិភពលោកដ៏ស្មុគស្មាញ និងមិនអាចទាយទុកជាមុនបាន។

លោកឯកអគ្គរដ្ឋទូត Nguyen Minh Vu ជូនពរឆ្នាំថ្មីលោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ

លោកឯកអគ្គរដ្ឋទូតបានបញ្ជាក់ថា កិច្ចសហប្រតិបត្តិការការពារជាតិនៅតែជាសសរស្តម្ភដ៏សំខាន់មួយនៃទំនាក់ទំនងវៀតណាម-កម្ពុជា ដែលរួមចំណែកដល់ការពង្រឹងទំនុកចិត្តនយោបាយ និងរក្សាបរិយាកាសសន្តិភាព ស្ថិរភាព និងអភិវឌ្ឍន៍នៅក្នុងតំបន់។

ដោយផ្អែកលើការយល់ដឹងរួមរបស់ថ្នាក់ដឹកនាំជាន់ខ្ពស់នៃភាគីទាំងពីរ និងលទ្ធផលនៃយន្តការសហប្រតិបត្តិការរវាងបក្សទាំងបី វៀតណាម កម្ពុជា និងឡាវ លោកឯកអគ្គរដ្ឋទូតបានស្នើឱ្យភាគីទាំងពីរបន្តពង្រឹងការផ្លាស់ប្តូរគណៈប្រតិភូគ្រប់លំដាប់ថ្នាក់ លើកកម្ពស់ការតភ្ជាប់រវាងសេដ្ឋកិច្ចទាំងពីរ ជាពិសេសនៅតំបន់ព្រំដែន សម្របសម្រួលប្រកបដោយប្រសិទ្ធភាពក្នុងការរុករក ជីកគាស់ ធ្វើមាតុភូមិន្ទនិវត្តន៍អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាមដែលបានពលីជីវិតនៅកម្ពុជា ក្នុងសម័យសង្គ្រាម និងបន្តកសាងព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍ ។

លោកនាយឧត្តមសេនីយ៍ វង្ស ពិសេន វាយតម្លៃខ្ពស់ចំពោះកិច្ចសហប្រតិបត្តិការការពារជាតិរវាងប្រទេសទាំងពីរក្នុងរយៈពេលថ្មីៗនេះ

ក្នុងនាមកងយោធពលខេមរភូមិន្ទ លោកនាយឧត្តមសេនីយ៍ វង្ស ពិសេន បានថ្លែងអំណរគុណយ៉ាងស្មោះស្ម័គ្រចំពោះលោកឯកអគ្គរដ្ឋទូតដែលបានអញ្ជើញមកជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ និងវាយតម្លៃខ្ពស់ចំពោះកិច្ចសហប្រតិបត្តិការការពារជាតិយ៉ាងជិតស្និទ្ធ និងមានប្រសិទ្ធភាពរវាងប្រទេសទាំងពីរក្នុងវិស័យជាច្រើនដូចជា ការផ្លាស់ប្តូរគណៈប្រតិភូ ការបណ្តុះបណ្តាលធនធានមនុស្ស និងការសម្របសម្រួលរវាងបណ្តាកងកម្លាំងនានា។

លោកនាយឧត្តមសេនីយ៍ វង្ស ពិសេន បានសង្កត់ធ្ងន់ថា កងទ័ពជើងគោកកម្ពុជាតែងតែគោរពចំពោះការគាំទ្រដ៏ធំធេង និងស្មោះស្ម័គ្រពីបក្ស រដ្ឋ ប្រជាជន និងកងទ័ពប្រជាជនវៀតណាមក្នុងដំណាក់កាលប្រវត្តិសាស្ត្រនីមួយៗ ជាពិសេសក្នុងការជួយកម្ពុជាឱ្យរួចផុតពីរបបប្រល័យពូជសាសន៍ខ្មែរក្រហម និងសហការក្នុងការកសាងកងកម្លាំងប្រដាប់អាវុធបច្ចុប្បន្ន។

លោកនាយឧត្តមសេនីយ៍បានអះអាងថា កម្ពុជានឹងបន្តលើកកម្ពស់កិច្ចសហប្រតិបត្តិការការពារជាតិជាមួយវៀតណាមឱ្យកាន់តែស៊ីជម្រៅ ជាក់ស្តែង និងមានប្រសិទ្ធភាពជាងមុន។ ពង្រឹងការសម្របសម្រួលរវាងអង្គភាពយោធានានា លើកកម្ពស់ការកសាងសមត្ថភាព និងការចែករំលែកបទពិសោធន៍ ដោយហេតុនេះបង្កើនសមត្ថភាពយោធា រួមចំណែកដល់ការរក្សាសន្តិភាព និងស្ថិរភាពក្នុងតំបន់ និងពង្រឹងទំនាក់ទំនងនៃ "ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការដ៏ទូលំទូលាយ និងនិរន្តរភាពយូរអង្វែង"។

លោកឯកអគ្គរដ្ឋទូត Nguyen Minh Vu ជូនពរឆ្នាំថ្មី លោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក

គួរំលឹកថា នៅថ្ងៃទី២៤ ខែមីនា នៅបញ្ជាការដ្ឋានកងទ័ពជើងគោកកម្ពុជា លោកឯកអគ្គរដ្ឋទូត  បានអញ្ជើញទៅសួរសុខទុក្ខ និងជូនពរឆ្នាំថ្មី លោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក  រួមជាមួយឧត្តមសេនីយ៍ នាយទាហាន នាយទាហានរង និងពលទាហានទាំងអស់នៅទីនេះ។

ក្នុងជំនួបនេះ ភាគីទាំងពីរបានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការរវាងកងទ័ពនៃប្រទេសទាំងពីរក្នុងរយៈពេលកន្លងមក។ ព្រមទាំងបានឯកភាពគ្នាបន្តពង្រឹងការសម្របសម្រួល និងកែលម្អប្រសិទ្ធភាពនៃកិច្ចសហប្រតិបត្តិការក្នុងការបណ្តុះបណ្តាល និងការផ្លាស់ប្តូរបទពិសោធន៍ រួមចំណែកដល់ការពង្រឹងទំនាក់ទំនងការពារជាតិវៀតណាម-កម្ពុជា ឲ្យកាន់តែស៊ីជម្រៅ ជាក់ស្តែង និងមានប្រសិទ្ធភាព៕

បកប្រែដោយ Duy Hoan