ចូលរួមចំណែកជួយប្រជាជនឱ្យក្លាយជាអ្នកមាននៅស្រុកកំណើតថ្មី
កប.អនឡាញ - មកដល់ភូមិ Na Tan (ឃុំ Tan Lap ស្រុក Moc Chau ខេត្ត Son La) តាមការណែនាំរបស់អ្នកភូមិ យើងខ្ញុំបានជួបលោក Leo Van Tuoi លេខាបក្ស និងជាមេភូមិ Na Tan។ តាមការវាយតម្លៃរបស់ប្រជាជន លោក Tuoi ជាគំរូល្អក្នុងការងារ ជាអ្នកឈានមុខគេ ក្នុងការអភិវឌ្ឍសេដ្ឋកិច្ចគ្រួសារ រួមចំណែកជួយប្រជាជនតាំងទីលំនៅថ្មី លើកកំពស់ប្រសិទ្ធភាពក្នុងការធ្វើផលិតកម្ម និងធ្វើឱ្យជីវភាពមានភាពលំនឹងនៅលើទឹកដីកំណើតថ្មី។
នៅខែមីនា ឆ្នាំ២០០៣ ដោយអនុវត្តគោលនយោបាយសាងសង់ទំនប់វារីអគ្គិសនី Son La លោក Tuoi និងក្រុមគ្រួសារបានធ្វើចំណាកស្រុកពីទីប្រជុំជន It Ong (ស្រុក Muong La) មកតាំងទីលំនៅថ្មីនៅភូមិ Na Tan វិញ។ ក្នុងឆ្នាំ ២០០៨ បន្ទាប់ពីបញ្ចប់វគ្គបណ្តុះបណ្តាលវិជ្ជាជីវៈអគ្គិសនី (សាលាមធ្យមសិក្សាសំណង់ហាណូយ) លោក Tuoi បានត្រឡប់មកភូមិវិញ ហើយត្រូវបានប្រជាជនទុកចិត្តបោះឆ្នោតជ្រើសរើសធ្វើជាមេភូមិ។
បច្ចុប្បន្ននេះ ភូមិ Na Tan មាន ២៤០ គ្រួសារ មានប្រជាជនចំនួន ១,០៤៥ នាក់ ភាគច្រើនជាជនជាតិ Thai និង Kinh ដែលក្នុងនោះមាន ១៣៦ គ្រួសារត្រូវបានតាំងទីលំនៅថ្មីពីស្រុក Muong La នៅសល់ជាប្រជាជនក្នុងស្រុក និងប្រជាជនមកពីខេត្តផ្សេងៗនៅតំបន់វាលទំនាបបានមកគាស់រានដីចោលទំនេដើម្បីសាងសង់តំបន់សេដ្ឋកិច្ចថ្មី។
|
|
លោក Leo Van Tuoi លេខាបក្ស និងជាមេភូមិ Na Tan ថែទាំដើមតែ |
គ្រួសារដែលតាំងលំនៅថ្មីនោះ តែងតែសិក្សាយ៉ាងសកម្មពីប្រជាជនក្នុងតំបន់របៀបធ្វើស្រែចម្ការ កែលម្អដីដើម្បីដាំតែ ដាំដើមឈើហូបផ្លែ និងដំណាំដើម្បីបង្កើនប្រាក់ចំណូលរបស់ពួកគេ។ ទោះជាយ៉ាងនេះក្តី ក្នុងឆ្នាំ ២០១៩-២០២១ ក្រុមហ៊ុនភាគហ៊ុនតែទង់ក្រហមខេត្ត Moc Chau ជួបប្រទះការលំបាកក្នុងការទិញលក់ និងប្រើប្រាស់តែរបស់ប្រជាពលរដ្ឋធ្វើឱ្យតម្លៃតែមិនស្ថិតស្ថេរ ទើបមានគ្រួសារខ្លះកាប់ដើមតែចោលទៅ។
ដោយបារម្ភថា ផ្ទៃដីតែជិត ៦០ ហិកតា របស់ប្រជាពលរដ្ឋនៅក្នុងភូមិគ្មានច្រកចេញទេ លោក Tuoi បានរៀបចំការទិញប្រមូលតែស្រស់ពីប្រជាពលរដ្ឋក្នុងភូមិដើម្បីលក់ឱ្យសហករណ៍ និងអាជីវករឯកជនក្នុងតំបន់នោះ។ ដើម្បីឲ្យប្រជាពលរដ្ឋបន្តប្រកបអាជីពដាំតែនោះ លោក Tuoi បានរៀបចំជួបសំណេះសំណាលជាមួយប្រជាពលរដ្ឋ និងសុំយោបល់ពីថ្នាក់ដឹកនាំឃុំ និងស្រុក ស្តីពីការបង្កើតសហករណ៍ទិញប្រមូល និងផលិតតែស្ងួត។
នៅឆ្នាំ ២០២២ សហករណ៍តែ Na Tan ត្រូវបានបង្កើតឡើងដោយមានសមាជិកចំនួន ៧ នាក់ ទុនវិនិយោគចំនួន ១២ ពាន់លានដុង។ ក្នុងមួយឆ្នាំៗ សហករណ៍តែ Na Tan ប្រមូលទិញតែស្រស់ចំនួន ៨០០ តោន ផលិតតែស្ងួតបានចំនួន ១៧០ តោន លក់ទៅកាន់ទីផ្សារ ដោយហេតុនេះដោះស្រាយបានបញ្ហាច្រកចេញសម្រាប់តែរបស់ប្រជាពលរដ្ឋ ទន្ទឹមនឹងនោះ បង្កើតការងារជូនពលករចំនួន ៦០ នាក់ក្នុងមូលដ្ឋាន ជាមួយនឹងប្រាក់ចំណូលប្រចាំខែ ១២ លានដុង/ម្នាក់។
មិនត្រឹមតែបង្កើតសហករណ៍ជួយប្រជាជនមានច្រកចេញតែប៉ុណ្ណោះទេ លោក Tuoi ក៏បានធ្វើការជាមួយគណៈគ្រប់គ្រងភូមិ ដើម្បីផ្សព្វផ្សាយយ៉ាងសកម្ម បំផុសប្រជាជនឱ្យរួបរួមកសាងជីវភាពវប្បធម៌នៅតំបន់លំនៅដ្ឋាន ចូលរួមយ៉ាងសកម្មក្នុងរាល់ចលនាក្នុងមូលដ្ឋាន។ អាស្រ័យហេតុនេះ ដើមឆ្នាំ ២០២៤ ភូមិ Na Tan បានបញ្ចប់ការដំឡើង និងដាក់ឱ្យប្រើប្រាស់ខ្សែភ្លើងជនបទប្រវែង ៤ គីឡូម៉ែត្រ ដោយចំណាយថវិកាសរុបជិត ១.៥ ពាន់លានដុង ដែលក្នុងនោះប្រជាជនបានចូលរួមចំណែកចំនួន ៤៧៥ លានដុង ហើយនៅសល់ត្រូវបានឧបត្ថម្ភដោយរដ្ឋ។
ក្នុងការអភិវឌ្ឍសេដ្ឋកិច្ចគ្រួសារ បន្ថែមពីលើដីទំហំ ២,០០០ ម៉ែត្រការ៉េ ដែលត្រូវបានរដ្ឋប្រគល់ទៅឱ្យនៅពេលតាំងទីលំនៅថ្មីនោះ លោក Tuoi និងភរិយាបានខ្ចីប្រាក់ជាង ២០ លានដុងពីមូលនិធិឥណទានប្រជាជននៃទីប្រជុំជនកសិដ្ឋាន Moc Chau ដើម្បីទិញគោចំនួន ៤ ក្បាលមកចិញ្ចឹម។ រហូតមកដល់ពេលនេះ ហ្វូងគោបានកើនដល់ ១៤ ក្បាលហើយ។ លើសពីនេះ លោក Tuoi ក៏បានទិញដីបន្ថែមទៀតដើម្បីពង្រីកតំបន់សម្រាប់ដាំតែ និងបន្លែ។ បច្ចុប្បន្ននេះ គ្រួសាររបស់គាត់មានផ្ទៃដីតែ ០.៦ ហិកតា ក្នុងមួយឆ្នាំប្រមូលផលតែស្រស់ ១៥ តោន និង ០.៦ ហិកតាដាបន្លែស៊ូ ជួយគ្រួសាររបស់គាត់រកចំណូលបានជាង ២៥០ លានដុងក្នុងមួយឆ្នាំបន្ទាប់ពីបានកាត់រាល់ការចំណាយទាំងអស់ និងបង្កើតការងារតាមរដូវសម្រាប់កម្មករក្នុងស្រុកចំនួន ១០ នាក់។
ជាមួយនឹងការរួមវិភាគទានរបស់ខ្លួន លោក Leo Van Tuoi តែងតែត្រូវបានប្រជាជននៅក្នុងភូមិជឿទុកចិត្ត និងស្រលាញ់។ លោកក៏ជាគំរូលេចធ្លោមួយក្នុងការរួមចំណែកអនុវត្តគោលការណ៍ណែនាំ និងគោលនយោបាយរបស់បក្ស និងរដ្ឋ ដើម្បីធានា “កន្លែងរស់នៅថ្មី ប្រសើរជាងកន្លែងរស់នៅចាស់” សម្រាប់ប្រជាជននៅតំបន់តាំងលំនៅថ្មី៕
បកប្រែដោយ Minh Trung