ការលុបបំបាត់ភាពក្រីក្រពីការអភិវឌ្ឍព្រៃឈើនៅឃុំ Can Khe

ដោយទាញយកផលប្រយោជន៍ពីផ្ទៃដីព្រៃឈើដ៏ធំ អនុវត្តសេចក្តីសម្រេចចិត្តលេខ 661/QD-TTg របស់នាយករដ្ឋមន្ត្រី ស្តីពីគោលដៅ ភារកិច្ច គោលនយោបាយ និងការអនុវត្តគម្រោងដាំព្រៃឈើរាប់លានហិកតា  ចាប់តាំងពីឆ្នាំ ១៩៩៨ មក អាជ្ញាធរស្រុក Nhu Thanh មានដំណោះស្រាយជាច្រើនដើម្បីធ្វើឲ្យសេដ្ឋកិច្ចព្រៃឈើក្លាយទៅជាវិស័យសេដ្ឋកិច្ចដ៏សំខាន់ ជួយប្រជាជនអភិវឌ្ឍសេដ្ឋកិច្ច។ ឃុំជាច្រើនក្នុងស្រុកមានផ្លាស់ប្តូរថ្មីនូវជីវភាពសង្គមដោយសារការអភិវឌ្ឍសេដ្ឋកិច្ចព្រៃឈើ។

ការធ្វើពិពិធកម្មដំណាំនៅលើទួលភ្នំ រួមចំណែកលើកកម្ពស់តម្លៃផលិតកម្មជូនប្រជាពលរដ្ឋឃុំ Can Khe (រូបថត៖ baothanhhoa.vn)

ឃុំ Can Khe មានផ្ទៃដីព្រៃដ៏ធំរបស់ស្រុក មានជាង ២,៧០០ ហិកតា ប៉ុន្តែកាលពីមុន ប្រជាជនភាគច្រើនចោលទំនេរ ឬដាំដើមប្រេងខ្យល់ដែលមិនឲ្យតម្លៃសេដ្ឋកិច្ចខ្ពស់។ ចាប់តាំងពីឆ្នាំ ១៩៩៨ មក អនុវត្តសេចក្តីសម្រេចលេខ 661/QD-TTg ផ្ទៃដីព្រៃភាគច្រើននៅក្នុងឃុំ Can Khe ត្រូវបានគ្របដណ្ដប់ដោយដើមអាកាស្យា ដែលនាំមកនូវប្រាក់ចំណូលខ្ពស់ដល់ប្រជាពលរដ្ឋ។ គណៈកម្មាធិការបក្ស និងអាជ្ញាធរឃុំ Can Khe បានសហការជាមួយអង្គភាពពាក់ព័ន្ធ ដើម្បីអនុវត្តទម្រង់អភិវឌ្ឍន៍សេដ្ឋកិច្ចព្រៃឈើ ជួយជីវភាពរស់នៅរបស់ប្រជាពលរដ្ឋមានភាពប្រសើរឡើង គ្រួសារជាច្រើនងើបចេញពីភាពក្រីក្រប្រកបដោយនិរន្តរភាព រួមចំណែកជួយឃុំ Can Ke បំពេញលក្ខណៈវិនិច្ឆ័យតាមស្តង់ដារជនបទថ្មី។

គ្រួសារលោក Bui Hong Quan នៅឃុំ Can Khe មានដីព្រៃជាង ៣ ហិកតា។ ដោយអនុវត្តតាមគម្រោងអភិវឌ្ឍន៍ព្រៃឈើ គ្រួសាររបស់លោកបានដាំដើមអាកាស្យា។ ឆ្លងកាត់រដូវប្រមូលផលមួយចំនួន គ្រួសារលោកមានចំណូលកាន់តែច្រើន ដោយទទួលបានប្រាក់ចំណេញចាប់ពីរាប់សិបលានដុងដល់រាប់រយលានដុង/ហិចតា/ឆ្នាំ ហើយក្លាយជាគ្រួសារដែលមានជីវភាពធូរធារនៅក្នុងឃុំ។ លោក Quan បានឲ្យដឹងថា កាលពីមុន គ្រួសាររបស់ខ្ញុំដាំដំឡូងមី និងអំពៅ ប៉ុន្តែប្រសិទ្ធភាពសេដ្ឋកិច្ចទាបណាស់។ បន្ទាប់ពីត្រូវបានកម្មាភិបាលឃុំណែនាំឲ្យប្តូរទៅជាអាកាស្យា គ្រួសារខ្ញុំក៏ធ្វើតាម។ ការដាំដើមអាកាស្យាមិនត្រូវការថែទាំច្រើនទេ ប្រហែល ៤-៥ ឆ្នាំទើបនឹងប្រមូលផល គ្រួសារខ្ញុំដាំបានជាង ៣ ហិកតា រកចំណូលបានជាង ៣០០ លានដុង។ ដោយហេតុនេះជួយគ្រួសារមានប្រាក់ចំណូលស្ថិរភាព អាចទិញគ្រឿងសង្ហារិម សាងសង់ និងជួសជុលផ្ទះ។

បច្ចុប្បន្ន ស្រុកមានទម្រង់សេដ្ឋកិច្ចទួលភ្នំ និងព្រៃឈើដែលមានតម្លៃខ្ពស់ជាច្រើន ក្នុងនោះ ដើម Dendrocalamus membranaceus Munro ដែលជាដើមងាយស្រួលដាំដុះ ងាយស្រួលថែទាំ ដាំម្តងអាចប្រមូលផលបានយូរអង្វែង។ នៅក្នុងភូមិទី៤ នៃឃុំ Can Khe ដោយសារដាំដើមឈើ Dendrocalamus membranaceus Munro និងព្រៃឈើដទៃទៀត ចំនួនគ្រួសារក្រីក្រនៅក្នុងភូមិមានការថយចុះយ៉ាងខ្លាំង គ្រួសារភាគច្រើនបានលុបបំបាត់ភាពអត់ឃ្លាន និងកាត់បន្ថយភាពក្រីក្រដោយជោគជ័យ។

យើងអាចឃើញថា ការជ្រើសរើសទិសដៅជំរុញការអភិវឌ្ឍសេដ្ឋកិច្ចព្រៃឈើគឺជាជំហានដ៏ត្រឹមត្រូវ ហើយក្លាយជាវិធានការជួយដល់បណ្ដាមូលដ្ឋាន ដូចជាស្រុក Nhu Thanh អនុវត្តបានយ៉ាងល្អនូវការលុបបំបាត់ភាពក្រីក្រប្រកបដោយនិរន្តរភាព បង្កើតមុខមាត់ថ្មីសម្រាប់ស្រុកភ្នំភាគខាងលិចនៃខេត្ត Thanh Hoa៕

បកប្រែដោយ Thuy Anh