បង្កើតលក្ខខណ្ឌអំណោយផលបន្ថែមទៀតសម្រាប់អាជីវកម្មសហភាពអឺរ៉ុបធ្វើប្រតិបត្តិការនៅវៀតណាម

ដោយមានវត្តមានរបស់ប្រតិភូជាង ១២០ នាក់ មកពីអង្គភាពអាជីវកម្មសំខាន់ៗឈានមុខគេជាង ៤០ នៅក្នុងសហភាពអឺរ៉ុប (EU) លោក Jens Ruebbert ប្រធានក្រុមប្រឹក្សាធុរកិច្ចសហភាពអឺរ៉ុប - អាស៊ាន បានបញ្ជាក់ថា នេះបង្ហាញពីចំណាប់អារម្មណ៍យ៉ាងខ្លាំងរបស់សហគមន៍ធុរកិច្ចសម្រាប់ទីផ្សារវៀតណាម។ តំណាងធុរកិច្ចសហភាពអឺរ៉ុបបានលើកឡើងនូវមតិជាច្រើនដែលបង្ហាញពីចំណាប់អារម្មណ៍យ៉ាងខ្លាំងក្នុងការកែលម្អបរិយាកាសវិនិយោគ និងការធ្វើអាជីវកម្មនៅវៀតណាម។

លោក Tran Thanh Man ប្រធានរដ្ឋសភាវៀតណាម ថ្លែងក្នុងជំនួប

ថ្លែងក្នុងជំនួបនេះ លោក Tran Thanh Man ប្រធានរដ្ឋសភាវៀតណាម បានសង្កត់ធ្ងន់ថា វៀតណាមចាត់ទុកសហភាពអឺរ៉ុប និងសហគមន៍ធុរកិច្ចសហភាពអឺរ៉ុប-អាស៊ាន ជាដៃគូសំខាន់ៗក្នុងដំណើរការអភិវឌ្ឍន៍សេដ្ឋកិច្ច-ពាណិជ្ជកម្ម និងការធ្វើសមាហរណកម្មអន្តរជាតិយ៉ាងស៊ីជម្រៅនិងមានប្រសិទ្ធភាព។ ព្រមទាំងលោកបញ្ជាក់ថា រដ្ឋសភានឹងសហការយ៉ាងជិតស្និទ្ធជាមួយរដ្ឋាភិបាលដើម្បីស្រូបយក និងសិក្សាស្រាវជ្រាវនូវសំណើទាំងនេះ អាស្រ័យហេតុនេះ បង្កើតបរិយាកាសផ្លូវច្បាប់ដែលមានតម្លាភាព ស្ថិរភាព និងអំណោយផលជាងមុនសម្រាប់អង្គភាពអាជីវកម្មអឺរ៉ុបធ្វើអាជីវកម្មយូរអង្វែងនៅវៀតណាម។

លោក Tran Thanh Man ប្រធានរដ្ឋសភាវៀតណាម បានស្នើឱ្យក្រុមប្រឹក្សាធុរកិច្ចសហភាពអឺរ៉ុប-អាស៊ាន និងសមាគមធុរកិច្ចសហភាពអឺរ៉ុបនៅវៀតណាម បន្តរួមដំណើរជាមួយវៀតណាម សម្របសម្រួលអនុវត្តប្រកបដោយប្រសិទ្ធភាពនូវកិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុប (EVFTA) ដោយបើកទីផ្សារបន្ថែមទៀត។

លោក Jens Ruebbert ប្រធានក្រុមប្រឹក្សាធុរកិច្ចសហភាពអឺរ៉ុប - អាស៊ាន

ក្នុងឱកាសនេះ លោក Tran Thanh Man ប្រធានរដ្ឋសភាវៀតណាម បានស្នើអង្គភាពអាជីវកម្មចូលរួមផ្ដល់មតិយោបល់ដើម្បីជំរុញឱ្យប្រទេសសមាជិកសហភាពអឺរ៉ុបចំនួន ៧ (អៀរឡង់ អូទ្រីស បែលហ្ស៊ិក អាល្លឺម៉ង់ ហូឡង់ បារាំង ស្លូវេនី) បញ្ចប់ការផ្តល់សច្ចាប័នលើកិច្ចព្រមព្រៀងគាំពារវិនិយោគវៀតណាម-សហភាពអឺរ៉ុប (EVIPA) ដើម្បីបង្កើតរបកគំហើញថ្មីនៅក្នុងវិស័យវិនិយោគរវាងភាគីទាំងពីរ។ ព្រមទាំងជំរុញឱ្យគណៈកម្មការអឺរ៉ុបដក "កាតលឿង" ស្តីពីការប្រយុទ្ធប្រឆាំងនឹងការនេសាទខុសច្បាប់ ដោយមិនមានការរាយការណ៍ និងមិនមានបទប្បញ្ញត្តិត្រឹមត្រូវ (IUU) សម្រាប់ការនាំចេញជលផលរបស់វៀតណាមឱ្យបានឆាប់ ដែលរួមចំណែកដល់ការធានាការផ្គត់ផ្គង់សម្រាប់ទីផ្សារសហភាពអឺរ៉ុប។

លោក Tran Thanh Man ប្រធានរដ្ឋសភាវៀតណាម និងប្រតិភូថតរូបជុំគ្នា

លោក Tran Thanh Man ប្រធានរដ្ឋសភាវៀតណាម បានស្នើសមាគមធុរកិច្ចសហភាពអឺរ៉ុបនៅវៀតណាមលើកកម្ពស់កិច្ចសហប្រតិបត្តិការក្នុងវិស័យដែលសហភាពអឺរ៉ុបមានប្រៀបខ្លាំង ដូចជាការផ្លាស់ប្តូរបៃតង ការធ្វើបរិវត្ដកម្មឌីជីថល កសិកម្មស្អាត ការបណ្តុះបណ្តាលធនធានមនុស្សដែលមានគុណភាពខ្ពស់ វិទ្យាសាស្ត្រ បច្ចេកវិទ្យា នវានុវត្តន៍។ល។ បន្តជួយគាំទ្រអង្គភាពអាជីវកម្មវៀតណាមឱ្យចូលរួមកាន់តែស៊ីជម្រៅនៅក្នុងខ្សែសង្វាក់ផ្គត់ផ្គង់របស់សហភាពអឺរ៉ុបតាមរយៈការផ្ទេរបច្ចេកវិទ្យា ស្តង់ដារគុណភាព និងការតភ្ជាប់ជាមួយសាជីវកម្មអឺរ៉ុបនៅក្នុងវិស័យអាទិភាពរបស់វៀតណាម ដូចជាបច្ចេកវិទ្យាខ្ពស់ សេដ្ឋកិច្ចឌីជីថល ការអភិវឌ្ឍប្រកបដោយចីរភាព៕

បកប្រែដោយ Pham Diep