មនោសញ្ចេតនារវាងកងទ័ពនិងប្រជាជនក្នុងឱកាសពិធីបុណ្យសែនដូនតា នៅតំបន់ព្រំដែនសមុទ្រ Can Tho

ពិធីបុណ្យសែនដូនតា គឺជាពិធីបុណ្យមួយក្នុងចំណោមពិធីបុណ្យធំៗ និងសំខាន់បំផុតទាំងបីរបស់ជនរួមជាតិខ្មែរណាមបូ រួមជាមួយនឹងពិធីបុណ្យចូលឆ្នាំថ្មីប្រពៃណី  និងពិធីបុណ្យអកអំបុក។ នេះជាឱកាសមួយសម្រាប់កូនចៅរំលឹកគុណដល់បុព្វការីជន ញាតិមិត្តដែលបានលាចាកឋាន និងគោរពដឹងគុណចំពោះមាតា បិតា ជីដូនជីតាដែលមានជីវិតរស់នៅ និងតភ្ជាប់ក្នុង​សហគមន៍ផងដែរ។

ដើម្បីរួមចំណែកលើកកម្ពស់ជីវភាពរស់នៅទាំងសម្ភារៈ និងស្មារតីរបស់ជនរួមជាតិខ្មែរណាមបូក្នុងឱកាសពិធីបុណ្យនេះ កងទ័ពការពារព្រំដែនទីក្រុង Can Tho បានរៀបចំសកម្មភាពដ៏មានអត្ថន័យជាច្រើននៅទូទាំងឃុំ និងសង្កាត់នៅតាមព្រំដែនសមុទ្រដូចជា ឃុំ Tran Phu, Thanh Hoa, Vinh Hai, Thanh Thang ...

កងទ័ពការពារព្រំដែនទីក្រុង Can Tho និងអាជ្ញាធរមូលដ្ឋានជូនអំណោយដល់លោកយាយ Thach Thi Quyet ជាមនុស្សចាស់ឯកោនៅឃុំ Vinh Hai

អំណោយរាប់រយកញ្ចប់ រួមមាននំអន្សោម អង្ករ សម្ភារៈប្រើប្រាស់ចាំបាច់ និងទឹកប្រាក់ជូនប្រជាពលរដ្ឋដែលជួបការលំបាក។ ជាពិសេស “ផ្សារឥតគិតថ្លៃ” ដែលរៀបចំឡើងនៅប៉ុស្តិ៍ការពារព្រំដែន Vinh Hai បានទាក់ទាញប្រជាជនយ៉ាងច្រើនកុះករមកទទួលអំណោយ និងចូលរួមសំណេះសំណាលជាមួយកម្មាភិបាល និងយុទ្ធជន។

ទន្ទឹមនឹងនោះ ពេទ្យយោធារបស់កងទ័ពការពារព្រំដែនក៏បានរៀបចំកម្មវិធីពិនិត្យសុខភាព ផ្ដល់យោបល់អំពីការថែទាំសុខភាព និងចែកថ្នាំដោយឥតគិតថ្លៃដល់ប្រជាពលរដ្ឋរាប់រយនាក់ផងដែរ។ នេះជាសកម្មភាពដែលបានប្រជាពលរដ្ឋវាយតម្លៃខ្ពស់ បង្ហាញពីភាពជិតស្និទ្ធនិងបំពេញតម្រូវការជាក់ស្តែងរបស់ប្រជាពលរដ្ឋនាពេលនេះ។

លោកយាយ Thach Thi Quyet នៅឃុំ Vinh Hai បានចែករំលែកក្នុងក្ដីរំភើបចិត្ដថា “ខ្ញុំមានអាយុជាង ៧០ ឆ្នាំ ហើយរស់នៅម្នាក់ឯង។ ពេលខ្លះឈឺក៏ត្រូវស៊ូទ្រាំដែរ។ ថ្ងៃនេះ កម្មាភិបាលនិងយុទ្ធជននៃកងទ័ពការពារព្រំដែនបានមកសួរសុខទុក្ខខ្ញុំ ផ្តល់អំណោយ ពិនិត្យសុខភាព និងផ្តល់ថ្នាំឱ្យខ្ញុំ ខ្ញុំមានអារម្មណ៍សប្បាយចិត្ដណាស់ដែលទទួលបានការយកចិត្តទុកដាក់ និងស្រឡាញ់ខ្លាំងណាស់។

សកម្មភាពផ្លាស់ប្តូរវប្បធម៌ សិល្បៈ និងកីឡា ក៏ត្រូវបានរៀបចំឡើងដែលបង្កើតបរិយាកាសសាមគ្គីភាព និងសប្បាយរីករាយរវាងកងទ័ពនិងប្រជាជន។ ការប្រកួតបាល់ទាត់ ការសំដែងរបាំជនជាតិខ្មែរណាមបូ និងសំឡេងច្រៀងរបស់យុទ្ធជនក្មេងៗគឺជាភស្តុតាងដ៏រស់រវើករវាងវប្បធម៌ប្រពៃណី និងស្មារតីបម្រើប្រជាជននៃកងទ័ពការពារព្រំដែន។

កងទ័ពការពារព្រំដែនទីក្រុង Can Tho និងប្រជាពលរដ្ឋខ្មែរណាមបូវេចនំអន្សោមក្នុងឱកាសពិធីបុណ្យសែនដូនតា បង្ហាញពីមនោសញ្ចេតនា និងភាពស្និទ្ធស្នាល

លោកវរសេនីយ៍ឯក Huynh Thanh Hung ប្រធាននយោបាយនៃគណៈកម្មការបញ្ជាកងទ័ពការពារព្រំដែនទីក្រុង Can Tho ឲ្យដឹងថា៖ “ក្នុងឱកាសបុណ្យប្រពៃណីរបស់ជនរួមជាតិខ្មែរណាមបូ យើងតែងតែកសាងផែនការ និងសម្របសម្រួលជាមួយអាជ្ញាធរមូលដ្ឋាន និងវត្តអារាមរៀបចំសកម្មភាពជាក់ស្តែង និងមានអត្ថន័យជាច្រើនដើម្បីបំរើសហគមន៍ជនជាតិខ្មែរណាមបូ។ ហើយនេះមិនត្រឹមតែជាឱកាសផ្តល់ជំនួយផ្នែកសម្ភារៈប៉ុណ្ណោះទេ ប៉ុន្តែថែមទាំងសំខាន់ជាងនេះទៅទៀតនោះ វាបង្ហាញពីការរួមដំណើរជាមួយជនរួមជាតិ រក្សាអត្ដសញ្ញាណវប្បធម៌ ព្រមទាំងបង្ហាញភាពជិតស្និទ្ធរវាង​កងកម្លាំងប្រដាប់អាវុធ និងប្រជាជន”។

តាមរយៈសកម្មភាពដ៏មានអត្ថន័យទាំងនេះ កងទ័ពការពារព្រំដែនក៏បានដើរតួនាទីដ៏ល្អក្នុងការចលនាអ្នកមុខអ្នការ និងអ្នកដែលមានប្រជាប្រិយភាពចូលរួមយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ ប្រយុទ្ធប្រឆាំងនឹងឧក្រិដ្ឋកម្ម។ ព្រះសង្ឃ ព្រឹទ្ធាចារ្យ មេភូមិ... បានក្លាយជា "ស្ពានតភ្ជាប់" ដ៏សំខាន់រវាងអាជ្ញាធរ និងប្រជាជន រួមចំណែកកសាងខ្សែព្រំដែនសន្តិភាព ស្ថិរភាព និងអភិវឌ្ឍន៍៕

បកប្រែដោយ Pham Diep