វៀតណាម-ចិនបង្កើតរបកគំហើញថ្មីក្នុងកិច្ចសហប្រតិបត្តិការសំខាន់ៗ

ក្នុងបរិយាកាសស្និទ្ធស្នាល ភាគីទាំងពីរបានសម្តែងនូវក្តីរីករាយចំពោះការអភិវឌ្ឍជាវិជ្ជមានលើគ្រប់វិស័យនៃទំនាក់ទំនងវៀតណាម-ចិន ដែលក្នុងនោះ កិច្ចសហប្រតិបត្តិការរវាងមូលដ្ឋាននៃប្រទេសទាំងពីរត្រូវបានជម្រុញឲ្យកាន់តែជាក់ស្ដែង។

លោក Pham Minh Chinh នាយករដ្ឋមន្ត្រី ទទួលជួបលោក Lin Wu (រូបថត៖ vnanet.vn)

ដោយអះអាងថា បក្ស រដ្ឋ និងរដ្ឋាភិបាលវៀតណាមយកចិត្តទុកដាក់ និងផ្តល់អាទិភាពកំពូលលើការអភិវឌ្ឍទំនាក់ទំនង វៀតណាម-ចិន គាំទ្រនិងត្រៀមខ្លួនជាស្រេចដើម្បីបង្កើតលក្ខខណ្ឌអំណោយផលសម្រាប់ពង្រឹងកិច្ចសហប្រតិបត្តិការរវាងមូលដ្ឋាននៃប្រទេសទាំងពីរ លោក Pham Minh Chinh នាយករដ្ឋមន្ត្រី មានបំណងថាខេត្ត Shandong និងមូលដ្ឋាននានារបស់វៀតណាមនឹងជំរុញប្រពៃណីមិត្តភាព បង្កើនការផ្លាស់ប្តូរនិងជំនួបគ្រប់លំដាប់ថ្នាក់ ចែករំលែកបទពិសោធន៍ក្នុងការអភិវឌ្ឍ ជំរុញការបណ្តុះបណ្តាលកម្មាភិបាល និងធនធានមនុស្សក្នុងវិស័យដែលខេត្ត Shandong មានប្រៀបខ្លាំង ហើយផ្តល់អាទិភាពលើការបង្កើនការនាំចូលទំនិញវៀតណាម ជាពិសេសផលិតផលកសិកម្មដែលមានគុណភាពខ្ពស់។ លោកនាយករដ្ឋមន្ត្រីបានស្នើឲ្យខេត្ត Shandong ចែករំលែកបទពិសោធន៍ក្នុងការអនុវត្តមណ្ឌលពាណិជ្ជកម្មសេរី និងអនុវត្តគោលនយោបាយដើម្បីបង្កើតលក្ខខណ្ឌអំណោយផលសម្រាប់ធុរកិច្ចវៀតណាមធ្វើអាជីវកម្មនៅខេត្ត Shandong ហើយលើកទឹកចិត្តធុរកិច្ចខេត្ត Shandong បង្កើនការវិនិយោគដែលផ្សារភ្ជាប់ជាមួយនឹងការផ្ទេរបច្ចេកវិទ្យាទំនើប និងការបណ្តុះបណ្តាលធនធានមនុស្សគុណភាពខ្ពស់សម្រាប់វៀតណាម។

លោក Pham Minh Chinh នាយករដ្ឋមន្ត្រី ក៏បានស្នើថា ខេត្ត Shandong ពង្រឹងកិច្ចសហប្រតិបត្តិការជាមួយបណ្ដាមូលដ្ឋានវៀតណាមលើវិស័យវប្បធម៌ និងទេសចរណ៍ បង្កើនការជួបប្រាស្រ័យរវាងប្រជាជននៃប្រទេសទាំងពីរ ជាពិសេសរវាងយុវជនជំនាន់ក្រោយ ដើម្បីលើកកម្ពស់ការយោគយល់គ្នា ជំរុញមិត្តភាព និងរួមចំណែកអភិវឌ្ឍទំនាក់ទំនងរវាងបក្សទាំងពីរ និងប្រទេសទាំងពីរ។

ទិដ្ឋភាពនៃជំនួប (រូបថត៖ vnanet.vn)

ដោយឯកភាពជាមួយសំណើរបស់លោក Pham Minh Chinh នាយករដ្ឋមន្ត្រី លោក Lin Wu បានអះអាងថា សក្ដានុពលនៃកិច្ចសហប្រតិបត្តិការរវាងខេត្ត Shandong និងបណ្ដាមូលដ្ឋានវៀតណាមនៅតែមានច្រើនណាស់។ លោកមានបំណងសហការជាមួយបណ្ដាមូលដ្ឋានរបស់វៀតណាមដើម្បីពង្រឹងទំនាក់ទំនងមិត្តភាព។ ភាគីទាំងពីរនឹងបន្តលើកកម្ពស់គុណភាពនៃកិច្ចសហប្រតិបត្តិការលើវិស័យពាណិជ្ជកម្ម វិនិយោគ ផលិតកម្ម និងពង្រីកកិច្ចសហប្រតិបត្តិការលើវិស័យថ្មីៗដូចជា ការអភិវឌ្ឍបៃតង និងសេដ្ឋកិច្ចឌីជីថល តាមរយៈនោះបង្កើតកម្លាំងចលករសម្រាប់កិច្ចសហប្រតិបត្តិការថ្មីដែលនាំមកនូវផលប្រយោជន៍សម្រាប់ភាគីទាំងពីរ ហើយពង្រឹងការផ្លាស់ប្តូរវប្បធម៌ ទេសចរណ៍ អប់រំ និងសិល្បៈ សហការអនុវត្តសកម្មភាពជួបប្រាស្រ័យរវាងប្រជាជននិងប្រជាជន ជាពិសេសរវាងយុវជន រួមចំណែកពង្រឹងទំនាក់ទំនងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិន និងវៀតណាម នាំមកនូវផលប្រយោជន៍ជាក់ស្តែងដល់បណ្ដាមូលដ្ឋាន និងប្រជាជននៃភាគីទាំងពីរ៕

បកប្រែដោយ Thuy Anh