រីកសាយភាយស្មារតីសាមគ្គីភាពរវាងប្រជាជនវៀតណាម និងកម្ពុជា
កប.អនឡាញ - បន្តកម្មវិធីរៃអង្គាសប្រាក់ឧបត្ថម្ភដល់ប្រជាជនវៀតណាមដែលរងគ្រោះ និងរងការខាតបង់យ៉ាងធ្ងន់ធ្ងរដោយសារគ្រោះមហន្តរាយធម្មជាតិ នារសៀលថ្ងៃទី១០ តុលា នៅស្ថានទូតវៀតណាមប្រចាំកម្ពុជា បានប្រព្រឹត្តទៅពិធីទទួលថវិកាឧបត្ថម្ភពីអង្គការ និងបុគ្គលកម្ពុជាជូនគ្រួសាររងការខូចខាតដោយសារព្យុះ និងទឹកជំនន់នៅប្រទេសវៀតណាមនាពេលថ្មីៗនេះ។
នៅក្នុងពិធី លោក Nguyen Huy Tang ឯកអគ្គរដ្ឋទូតវៀតណាមប្រចាំកម្ពុជា បានទទួលថវិកាចំនួន ១៧០០ ដុល្លារអាមេរិក ពីលោកស្រី ជា សំអេង និងលោកស្រី គឹម ណេង តំណាងឲ្យជំនាន់និស្សិត ដែលជាកូនរបស់ថ្នាក់ដឹកនាំជាន់ខ្ពស់កម្ពុជា ដែលធ្លាប់សិក្សានៅវៀតណាម ដើមទសវត្សរ៍ឆ្នាំ ១៩៨០។
    |
 |
|
អ្នកស្រី ជា សំអេង តំណាងឲ្យជំនាន់និស្សិត ដែលជាកូនរបស់ថ្នាក់ដឹកនាំជាន់ខ្ពស់កម្ពុជា ដែលធ្លាប់សិក្សានៅវៀតណាម ក្នុងអំឡុងឆ្នាំ ១៩៨០-១៩៨៧ ផ្តល់ថវិកាឧបត្ថម្ភជូនលោកឯកអគ្គរដ្ឋទូត Nguyen Huy Tang (រូបថត៖ vnanet.vn) |
លោកស្រី ជា សំអេង និងលោកស្រី គឹម ណេង បានចែករំលែកការខាតបង់អាយុជីវិត និងទ្រព្យសម្បត្តិដែលបណ្តាលមកពីព្យុះ និងទឹកជំនន់នាពេលថ្មីៗនេះសម្រាប់ប្រទេស និងប្រជាជនវៀតណាម ទន្ទឹមនឹងនោះ លោកស្រីទាំងពីរសម្តែងនូវក្តីជឿជាក់ថា ប្រទេស និងប្រជាជនវៀតណាមនឹងឆ្លងផុតគ្រាដ៏លំបាកនេះ។
មកទល់បច្ចុប្បន្ននេះ ស្ថានទូតវៀតណាមប្រចាំកម្ពុជា រៃអង្គាសថវិកាបានជាង ៤០,០០០ ដុល្លារអាមេរិក សម្រាប់ប្រជាជនវៀតណាមនៅតំបន់ដែលរងផលប៉ះពាល់ដោយសារព្យុះ៕
បកប្រែដោយ Thanh Cong