លោកនាយករដ្ឋមន្ត្រី Pham Minh Chinh ជួបជាមួយថ្នាក់ដឹកនាំប្រទេស និងអង្គការអន្តរជាតិដែលចូលរួមសន្និសីទ G20

ក្នុងជំនួបជាមួយលោកអគ្គលេខាបក្ស និងជាប្រធានរដ្ឋចិន Xi Jinping លោកនាយករដ្ឋមន្ត្រី Pham Minh Chinh បានអះអាងថា វៀតណាមចាត់ទុកការអភិវឌ្ឍទំនាក់ទំនងសហប្រតិបត្តិការ និងមិត្តភាពជាមួយចិនជាជម្រើសយុទ្ធសាស្ត្រ និងជាអាទិភាពកំពូលក្នុងគោលនយោបាយការបរទេសឯករាជ្យ ស្វ័យភាព ពិពិធកម្ម ពហុភាគី និងសង្ឃឹមថាភាគីទាំងពីរនឹងបន្តសម្របសម្រួលយ៉ាងជិតស្និទ្ធដើម្បីអនុវត្តទស្សនៈរួមកម្រិតខ្ពស់ និងសេចក្តីថ្លែងការណ៍រួម និងឯកសារដែលបានចុះហត្ថលេខាក្នុងអំឡុងដំណើរទស្សនកិច្ចកម្រិតខ្ពស់របស់ប្រទេសទាំងពីរនាពេលថ្មីៗនេះ។

លោកនាយករដ្ឋមន្ត្រី Pham Minh Chinh ជួបជាមួយលោកអគ្គលេខាបក្ស និងជាប្រធានរដ្ឋចិន Xi Jinping (រូបថត៖ VOV)

រីឯខ្លួនវិញ លោកអគ្គលេខាបក្ស និងជាប្រធានរដ្ឋ Xi Jinping សង្ឃឹមថា ប្រទេសទាំងពីរនឹងបន្តចាត់វិធានការជាក់ស្តែង ដើម្បីលើកកំពស់ប្រសិទ្ធភាពនៃការអនុវត្តកិច្ចព្រមព្រៀង និងទស្សនៈរួមរវាងភាគីទាំងពីរ និងពង្រឹងកិច្ចសហប្រតិបត្តិការជាក់ស្តែង ជាពិសេសក្នុងការកសាង ០៣ ផ្លូវរថភ្លើងតភ្ជាប់ប្រទេសទាំងពីរ; ភាគីទាំងពីរបន្តគាំទ្រ និងសម្របសម្រួលគ្នាទៅវិញទៅមកនៅវេទិកាពហុភាគី។

ក្នុងជំណួបជាមួយលោក Joe Biden ប្រធានាធិបតីអាមេរិក  លោកនាយករដ្ឋមន្ត្រី Pham Minh Chinh សង្ឃឹមថា នាពេលខាងមុខ  ទោះបីទទួលបេសកកម្មណាក៏ដោយក៏លោកប្រធានាធិបតី Joe Biden នឹងបន្តគាំទ្រ និងរួមចំណែកជាក់ស្តែងក្នុងទំនាក់ទំនងទ្វេភាគី។

លោកនាយករដ្ឋមន្ត្រី Pham Minh Chinh និងលោកប្រធានាធិបតីអាមេរិក Joe Biden (រូបថត៖ VOV)

លោកប្រធានាធិបតី Joe Biden បានអះអាងថា លោកតែងតែគាំទ្រការបន្តអភិវឌ្ឍទំនាក់ទំនងអាមេរិក-វៀតណាម។

ក្នុងជំនួបជាមួយលោក​នាយករដ្ឋមន្ត្រីឥណ្ឌា Narendra Modi លោកនាយករដ្ឋមន្ត្រី Pham Minh Chinh បានស្នើទិសដៅអាទិភាពចំនួនបី ដើម្បីជំរុញភាពជាដៃគូយុទ្ធសាស្ត្រលើគ្រប់ជ្រុងជ្រោយឱ្យស៊ីជម្រៅ និងប្រកបដោយប្រសិទ្ធភាព។

លោកនាយករដ្ឋមន្ត្រី Pham Minh Chinh និងលោកនាយករដ្ឋមន្ត្រីអាល្លឺម៉ង់ Olaf Scholz (រូបថត៖ VOV)

ទីមួយ វៀតណាមលើកទឹកចិត្តដល់គម្រោងវិនិយោគធំៗរបស់ឥណ្ឌាក្នុងវិស័យយុទ្ធសាស្ត្រ ដូចជាហេដ្ឋារចនាសម្ព័ន្ធដឹកជញ្ជូន ភស្តុភារ បច្ចេកវិទ្យាខ្ពស់ ប្រេង និងឧស្ម័ន ថាមពលកកើតឡើងវិញ ... ទីពីរ ពង្រឹងទំនាក់ទំនងអាជីវកម្ម និងការសន្ទនារវាងរដ្ឋាភិបាល និងធុរកិច្ចបន្ថែមទៀត ដើម្បីស្វែងរកឱកាសសម្រាប់កិច្ចសហប្រតិបត្តិការ និងដោះស្រាយបញ្ហាដែលនៅសេសសល់។ ទីបី ពង្រឹងកិច្ចសហប្រតិបត្តិការ និងការផ្លាស់ប្តូរប្រជាជននិងប្រជាជន។

លោកនាយករដ្ឋមន្ត្រី Pham Minh Chinh ក៏បានពិភាក្សាជាមួយលោកនាយករដ្ឋមន្ត្រីអាល្លឺម៉ង់ Olaf Scholz អំពីវិធានការលើកកំពស់ទំនាក់ទំនងនៃប្រទេសទាំងពីរឡើងកំពស់ថ្មី ក៏ដូចជាបញ្ហាក្នុងតំបន់ និងអន្តរជាតិដែលមានការយកចិត្តទុកដាក់ដូចគ្នា ព្រមទាំងបានលើកឡើងទិសដៅជាច្រើនដើម្បីរួមចំណែកយ៉ាងសកម្មក្នុងការរក្សាសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍ក្នុងតំបន់ និងពិភពលោក។

លោកនាយករដ្ឋមន្ត្រី Pham Minh Chinh និងលោកអគ្គលេខាធិការអង្គការសហប្រជាជាតិ Antonio Guterres  (រូបថត៖ VOV)

ក្នុងជំនួបជាមួយលោក​អគ្គលេខាធិការអង្គការសហប្រជាជាតិ Antonio Guterres លោកនាយករដ្ឋមន្ត្រី Pham Minh Chinh បានអះអាងថា វៀតណាមឲ្យតម្លៃ និងគាំទ្រតួនាទីមជ្ជភាពរបស់អង្គការសហប្រជាជាតិក្នុងអភិបាលកិច្ចសកល។

លោកអគ្គលេខាធិការអង្គការសហប្រជាជាតិក៏បានអះអាងដែរថា ក្នុងពិភពលោកមានការផ្លាស់ប្តូរជាច្រើន វៀតណាមនៅតែទទួលបានលទ្ធផលវិជ្ជមានក្នុងការអភិវឌ្ឍជាតិ ជាគំរូនៃសន្តិភាព និងការអភិវឌ្ឍប្រកបដោយចីរភាព ហើយជាចំណុចភ្លឺក្នុងទំនាក់ទំនងអន្តរជាតិដែលប្រទេសនានាត្រូវសិក្សា។

លោកនាយករដ្ឋមន្ត្រី Pham Minh Chinh និងលោកស្រី​ប្រធានគណៈកម្មការអឺរ៉ុប Ursula von der Leyen (រូបថត៖ VOV)

ក្នុងជំនួបជាមួយលោកស្រី Ursula von der Leyen ប្រធានគណៈកម្មាធិការអឺរ៉ុប (EC)  លោកនាយករដ្ឋមន្ត្រី Pham Minh Chinh បានផ្តល់នូវទិសដៅសំខាន់ៗចំនួនបីគឺ៖ បង្កើនការផ្លាស់ប្តូរគណៈប្រតិភូ ជាពិសេសគណៈប្រតិភូជាន់ខ្ពស់; ផ្តោតលើការដកចេញនូវបញ្ហា និងឧបសគ្គដែលនៅសេសសល់ក្នុងទំនាក់ទំនងទ្វេភាគី រួមទាំងការដកចេញ "កាតលឿង" IUU; លោកនាយករដ្ឋមន្ត្រី ស្នើឱ្យ EU លើកទឹកចិត្តប្រទេសសមាជិកចំនួន ៩ ដែលនៅសេសសល់ឲ្យ​ផ្តល់សច្ចាប័នលើកិច្ចព្រមព្រៀងការពារការវិនិយោគ EU-វៀតណាម (EVIPA) ក្នុងពេលឆាប់ៗខាងមុខ បន្តរក្សា ODA និងផ្តល់ជំនួយហិរញ្ញវត្ថុ និងបច្ចេកទេសដើម្បីវៀតណាមសម្របតាមគោលនយោបាយថ្មីរបស់ EU ស្តីពីការអភិវឌ្ឍប្រកបដោយចីរភាព ទន្ទឹមនឹងនោះ គាំទ្រទុន បច្ចេកវិទ្យា និងការបណ្តុះបណ្តាលធនធានមនុស្ស ដើម្បីជួយវៀតណាមអនុវត្តសេចក្តីថ្លែងការណ៍នយោបាយបង្កើតភាពជាដៃគូផ្លាស់ប្តូរថាមពលយុត្តិធម៌ (JETP) ប្រកបដោយប្រសិទ្ធភាព ៕

បកប្រែដោយ Duy Hoan