ជំរុញឱ្យសហគ្រាសវៀតណាមមកបណ្តាក់ទុន និងធ្វើអាជីវកម្មក្នុងទីផ្សារកម្ពុជា

ដោយមានគោលបំណងជំរុញការវិនិយោគ និងការធ្វើអាជីវកម្មរបស់សហគ្រាសវៀតណាមនៅទីផ្សារកម្ពុជា ក៏ដូចជាការពង្រឹងកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរនាពេលខាងមុខ កាលពីថ្ងៃទី ២ ខែមេសា ស្ថានទូតវៀតណាមប្រចាំព្រះរាជាណាចក្រកម្ពុជា និងសមាគមធុរកិច្ចវៀតណាម - កម្ពុជា (VCBA) បានរួមគ្នារៀបចំវេទិកា “កិច្ចសន្ទនាធុរកិច្ច ២០២៥”។ លោកឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា Nguyen Minh Vu បានធ្វើជាអធិបតីវេទិកានេះ។

លោកឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា Nguyen Minh Vu បានធ្វើជាអធិបតីវេទិកានេះ (រូបថត៖ vnanet.vn)

មានប្រសាសន៍ក្នុងវេទិកានេះ លោកឯកអគ្គរដ្ឋទូត Nguyen Minh Vu បានចាត់ទុកថា “កិច្ចសន្ទនាធុរកិច្ច ២០២៥” បានប្រព្រឹត្តទៅក្នុងបរិបទដែលទំនាក់ទំនងមិត្តភាពជាប្រពៃណីល្អ កិច្ចសហប្រតិបត្តិការលើគ្រប់ជ្រុងជ្រោយដើម្បីផលប្រយោជន៍ទៅវិញទៅមករវាងវៀតណាម និងកម្ពុជា កំពុងត្រូវបានពង្រឹង និងអភិវឌ្ឍកាន់តែខ្លាំងឡើង។ ថ្នាក់ដឹកនាំជាន់ខ្ពស់នៃប្រទេសទាំងពីរក៏បានសង្កត់ធ្ងន់ថា កិច្ចសហប្រតិបត្តិការសេដ្ឋកិច្ចគឺជាការផ្តោតសំខាន់ដែលត្រូវតែជំរុញចាប់ពីពេលនេះរហូតដល់ឆ្នាំ២០៣០ ហើយសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ក៏បានលើកឡើងពីកត្តាបំពេញបន្ថែមរវាងសេដ្ឋកិច្ចទាំងពីរដោយយកចិត្តទុកដាក់លើការលើកកម្ពស់ការតភ្ជាប់សេដ្ឋកិច្ចដើម្បីផលប្រយោជន៍រួមនៃប្រទេសទាំងពីរ។ លើសពីនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏ចាប់អារម្មណ៍យ៉ាងខ្លាំងផងដែរ ក្នុងការជំរុញការទាញយកផលប្រយោជន៍ពីសក្តានុពល និងឱកាសសម្រាប់កិច្ចសហប្រតិបត្តិការវិនិយោគ ពាណិជ្ជកម្ម និងទេសចរណ៍ រវាងប្រទេសទាំងពីរ។

លោកឯកអគ្គរដ្ឋទូត Nguyen Minh Vu បានវាយតំលៃថា នេះគឺជាលក្ខណៈអំណោយផលសម្រាប់ធុរកិច្ច និងអ្នកវិនិយោគនៃប្រទេសទាំងពីរពង្រឹងកិច្ចសហប្រតិបត្តិការលើវិស័យសេដ្ឋកិច្ចជាក់លាក់នាពេលខាងមុខ ដោយខំប្រឹងប្រែងនាំឱ្យទំហំពាណិជ្ជកម្មទ្វេភាគីឡើងដល់ ២០ ពាន់លានដុលា្លរ ដូចបំណងរបស់ថ្នាក់ដឹកនាំជាន់ខ្ពស់នៃប្រទេសទាំងពីរ។

ក្នុងវេទិកានេះ លោកឯកអគ្គរដ្ឋទូត Nguyen Minh Vu បានរំលឹកឡើងវិញនូវរាល់សមិទ្ធផលក្នុងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងវៀតណាម និងកម្ពុជានាពេលថ្មីៗនេះក្នុងបរិបទដែលពិភពលោកមានការវិវឌ្ឍយ៉ាងស្មុគស្មាញ។ បច្ចុប្បន្នវៀតណាមគឺជាអ្នកវិនិយោគធំជាងគេទី ៥ នៅកម្ពុជាដែលមានដើមទុនចុះបញ្ជីសរុបជាង ២.៩៤ ពាន់លានដុល្លារអាមេរិកក្នុង ២១៥ គម្រោង។ សកម្មភាពវិនិយោគ និងធ្វើអាជីវកម្មរបស់សហគ្រាសវៀតណាមបានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា ជួយបង្កើតការងារឱ្យកម្មករ រួមចំណែកក្នុងថវិការដ្ឋកម្ពុជា និងបំពេញការងារសន្តិសុខសង្គមបានល្អនៅតាមមូលដ្ឋាន។ សហគ្រាសវៀតណាមលេចធ្លោមួយចំនួនរួមមាន មិត្តហ្វូន ធនាគារ BIDC ទឹកដោះគោអង្គរ ថាកូ អាហ្គ្រី ជាដើមសុទ្ធតែទទួលបានការវាយតម្លៃខ្ពស់ពីសំណាក់ថ្នាក់ដឹកនាំកម្ពុជាចំពោះការរួមចំណែកអភិវឌ្ឍប្រទេសកម្ពុជា។

ដោយមានគោលដៅរួមចំណែកជំរុញពាណិជ្ជកម្ម វៀតណាម-កម្ពុជា អភិវឌ្ឍសេដ្ឋកិច្ចនៃប្រទេសទាំងពីរ នាំមកនូវជីវិតសប្បាយរីករាយជូនប្រជាជន លោកឧកញ៉ា Leng Rithy ប្រធាន VCBA សង្ឃឹមថា កិច្ចសន្ទនានឹងជួយអាជីវកម្មចាប់យកឱកាស ស្វែងយល់អំពីគោលនយោបាយ និងស្វែងរកដៃគូសមស្រប តភ្ជាប់អាជីវកម្ម បង្កើតស្ពានពាណិជ្ជកម្ម និងជំរុញការវិនិយោគលើវិស័យសក្តានុពល។

តំណាងសហគ្រាសវៀតណាមនៅកម្ពុជាចែករំលែកបទពិសោធន៍ និងដំណោះស្រាយរាល់បញ្ហាប្រឈមដែលជួបប្រទះក្នុងការធ្វើអាជីវកម្មនៅកម្ពុជា (រូបថត៖ vnanet.vn)

នៅក្នុងវេទិកានោះ លោក Ho Sivyong អគ្គនាយកនៃអគ្គនាយកដ្ឋានសេវាពាណិជ្ជកម្ម (ក្រសួងពាណិជ្ជកម្មកម្ពុជា) បានសម្តែងនូវការជឿជាក់ថា ព្រឹត្តិការណ៍នេះនឹងដើរតួយ៉ាងសំខាន់ក្នុងការបង្កើតលក្ខខណ្ឌសម្រាប់អ្នកចូលរួម ទាំងសាធារណៈ និងឯកជន ដើម្បីពិភាក្សា ផ្លាស់ប្តូរទស្សនៈ និងចែករំលែកចំណេះដឹងដើម្បីពង្រឹងទំនាក់ទំនងពាណិជ្ជកម្ម។ មន្ត្រីក្រសួងពាណិជ្ជកម្មកម្ពុជារូបនេះបានមានប្រសាសន៍ទៀតថា ក្នុងបរិបទនៃអស្ថិរភាពពាណិជ្ជកម្មសកល និងបញ្ហាប្រឈមជាច្រើនទៀត វាមានសារៈសំខាន់ជាងពេលណាទាំងអស់សម្រាប់ប្រទេសទាំងពីរពង្រឹងកិច្ចសហប្រតិបត្តិការ និងជំរុញការតភ្ជាប់ខ្សែសង្វាក់ផ្គត់ផ្គង់។លោកសង្ឃឹមថា វេទិកានេះនឹងជួយភាគីទាំងពីរតភ្ជាប់គ្នា និងទទួលបានការយល់ដឹងកាន់តែស៊ីជម្រៅអំពីវិស័យដែលពួកគេអាចសហការជាមួយគ្នា។ លោកបានអំពាវនាវដល់ពាណិជ្ជករ និងអ្នកវិនិយោគនៃប្រទេសទាំងពីរ ឆ្លៀតឱកាសនេះឱ្យបានច្រើនបំផុត ដើម្បីពង្រីកអាជីវកម្ម និងពង្រឹងទំនាក់ទំនងភាពជាដៃគូ ដោយមានការគាំទ្រពីរដ្ឋាភិបាលទាំងពីរ។

មានអនុសាសន៍បិទវេទិកានេះ លោកឯកអគ្គរដ្ឋទូត Nguyen Minh Vu បានអះអាងថា វៀតណាម និងកម្ពុជាទាំងពីរកំពុងឈានចូលដំណាក់កាលអភិវឌ្ឍន៍ថ្មី។ វៀតណាមឈានចូលក្នុងយុគសម័យនៃការរីកចម្រើនឆ្ពោះទៅរកភាពចម្រុងចម្រើនរុងរឿង រីឯកម្ពុជាវិញកំពុងឈានចូលដំណាក់កាលពន្លឿនការអភិវឌ្ឍសេដ្ឋកិច្ចឆ្ពោះទៅក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០។ លោកឯកអគ្គរដ្ឋទូតបានសង្កត់ធ្ងន់ថា៖ “ការជំរុញកិច្ចសហប្រតិបត្តិការលើគ្រប់វិស័យ ជាពិសេសកិច្ចសហប្រតិបត្តិការសេដ្ឋកិច្ចរវាងវៀតណាម និងកម្ពុជា នឹងរួមចំណែកជួយប្រទេសទាំងពីរសម្រេចបាននូវគោលដៅខាងលើ ហើយជាភារកិច្ចសំខាន់របស់ស្ថានទូតនាពេលខាងមុខ ហើយតួនាទីរបស់សហគមន៍ធុរកិច្ចនៃប្រទេសទាំងពីរពិតជាមានសារៈសំខាន់ខ្លាំងណាស់”។

កិច្ចសន្ទនាធុរកិច្ច គឺជាវេទិកាប្រចាំឆ្នាំដែលរៀបចំដោយស្ថានទូតវៀតណាម ប្រចាំព្រះរាជាណាចក្រកម្ពុជា ដើម្បីធ្វើបច្ចុប្បន្នភាពព័ត៌មានអំពីកិច្ចសហប្រតិបត្តិការលើវិស័យផ្សេងៗ ជាពិសេសការវិនិយោគ ពាណិជ្ជកម្ម និងទេសចរណ៍រវាងប្រទេសទាំងពីរ។ វេទិកានេះក៏មានសារៈសំខាន់ណាស់សម្រាប់ធុរកិច្ចនៃប្រទេសទាំងពីរក្នុងការចែករំលែកបទពិសោធន៍ក្នុងការវិនិយោគ និងការធ្វើអាជីវកម្មនៅកម្ពុជា ដោយហេតុនេះ រួមចំណែកជំរុញការវិនិយោគ និងសកម្មភាពធុរកិច្ចរបស់សហគ្រាសវៀតណាមក្នុងទីផ្សារកម្ពុជា ក៏ដូចជាពង្រឹងកិច្ចសហប្រតិបត្តិការសេដ្ឋកិច្ចរវាងប្រទេសជិតខាងទាំងពីរ៕

បកប្រែដោយ Minh Trung