លោកនាយករដ្ឋមន្ត្រី Pham Minh Chinh ទទួលជួបអគ្គនាយកសាជីវកម្ម Standard Chartered
កប.អនឡាញ - នាល្ងាចថ្ងៃទី ២ មេសា ក្នុងជំនួបជាមួយលោក Bill Winters អគ្គនាយកសាជីវកម្ម Standard Chartered លោក Pham Minh Chinh នាយករដ្ឋមន្ត្រីវៀតណាម បានស្នើឱ្យសាជីវកម្មជួយឧបត្ថម្ភវៀតណាមក្នុងការសាងសង់មជ្ឈមណ្ឌលហិរញ្ញវត្ថុអន្តរជាតិ ផ្តល់ហិរញ្ញវត្ថុបៃតង និងគាំទ្រអភិវឌ្ឍវិស័យសេដ្ឋកិច្ចឯកជនរបស់វៀតណាម។
ដោយសង្កត់ធ្ងន់លើវត្តមាននៃ Standard Chartered ក្នុងប្រទេសវៀតណាមក្នុងរយៈពេលជាង ១២០ ឆ្នាំ និងចក្ខុវិស័យសម្រាប់ ១០០ ឆ្នាំខាងមុខ លោកនាយករដ្ឋមន្ត្រី Pham Minh Chinh បានស្នើឲ្យសាជីវកម្មបន្តចែករំលែកបទពិសោធន៍របស់ខ្លួន និងផ្តល់ពិគ្រោះយោបល់លើការជ្រើសរើសទម្រង់ និងដំណោះស្រាយសមស្រប ដើម្បីអភិវឌ្ឍមជ្ឈមណ្ឌលហិរញ្ញវត្ថុអន្តរជាតិនៅវៀតណាម ជាពិសេសស្ថាប័ន គោលនយោបាយ ការបណ្តុះបណ្តាលធនធានមនុស្ស វិទ្យាសាស្ត្រគ្រប់គ្រង និងដំណោះស្រាយដើម្បីអភិវឌ្ឍប្រព័ន្ធហិរញ្ញវត្ថុគ្រប់ជ្រុងជ្រោយ។
    |
 |
|
លោកនាយករដ្ឋមន្ត្រី Pham Minh Chinh ទទួលជួបលោក Bill Winters អគ្គនាយកសាជីវកម្ម Standard Chartered (រូបថត៖ vnanet.vn) |
ទន្ទឹមនឹងនោះ លោកនាយករដ្ឋមន្ត្រី Pham Minh Chinh មានបំណងថាសាជីវកម្ម Standard Chartered បង្កើនការគាំទ្រវៀតណាមក្នុងការអនុវត្ត JETP ផ្តល់ឥណទានសម្រាប់ការអភិវឌ្ឍបៃតង គាំទ្រអង្គភាពអាជីវកម្មអនុវត្តគម្រោងអភិវឌ្ឍថាមពលខ្យល់ អ៊ីដ្រូសែនបៃតង និងពាណិជ្ជកម្មប្រកបដោយនិរន្តរភាព ព្រមទាំងគាំទ្រការអភិវឌ្ឍសេដ្ឋកិច្ចឯកជនរបស់វៀតណាម ជំរុញការវិនិយោគផ្ទាល់ពីបរទេសចូលវៀតណាម និងគាំទ្រក្រុមហ៊ុនវៀតណាមអភិវឌ្ឍក្នុងស្រុក និងការពង្រីកជាសកល។ល។
ដោយវាយតម្លៃខ្ពស់ចំពោះកិច្ចសន្យារបស់វៀតណាម ចំពោះការឆ្លើយតបនឹងបម្រែបម្រួលអាកាសធាតុ ក៏ដូចជាសក្ដានុពលនៃការអភិវឌ្ឍ ជាពិសេសយុទ្ធសាស្ត្រអភិវឌ្ឍបៃតង និងនិរន្តរភាពរបស់វៀតណាមនោះ លោក Bill Winters អគ្គនាយកសាជីវកម្ម Standard Chartered បានមានប្រសាសន៍ថា សាជីវកម្មនឹងសម្របសម្រួលយ៉ាងជិតស្និទ្ធជាមួយស្ថាប័ននានារបស់វៀតណាម ដើម្បីរួមដំណើរជាមួយវៀតណាម ក្នុងការអភិវឌ្ឍបៃតង ជាពិសេសការសាងសង់មជ្ឈមណ្ឌលហិរញ្ញវត្ថុអន្តរជាតិនៅវៀតណាម ដូចការលើកឡើងរបស់លោកនាយករដ្ឋមន្ត្រី Pham Minh Chinh ៕
បកប្រែដោយ Huyen Trang