ថ្នាក់ដឹកនាំខេត្ត Binh Phuoc អញ្ជើញទៅសួរសុខទុក្ខក្រុម K72 ដែលកំពុងបំពេញបេសកកម្មនៅកម្ពុជា

លោកស្រី Tran Tue Hien អុជធូបគោរពវិញ្ញាណក្ខន្ធកងទ័ពស្ម័គ្រចិត្ត និងអ្នកជំនាញវៀតណាម ដែលបានពលីជីវិតក្នុងសមរភូមិកម្ពុជា នាសម័យសង្គ្រាម (រូប​ថត៖ binhphuoc.gov.vn)

អញ្ជើញជួបសំណេះសំណាលជាមួយកម្មាភិបាល យុទ្ធជន និងបុគ្គលិក នៃក្រុម K72 លោកស្រី Tran Tue Hien បានអបអរសាទរ និងវាយតម្លៃខ្ពស់ចំពោះស្មារតីទទួលខុសត្រូវ ឆន្ទៈពុះពារជំនះរាល់ការលំបាក និងការប្តេជ្ញាចិត្តទទួលយក និងសម្រេចបាននូវរាល់ភារកិច្ចដែលបានប្រគល់ឲ្យ។

លោកស្រី Tran Tue Hien សង្ឃឹមថា កម្មាភិបាល យុទ្ធជន នៃក្រុម K72 តែងតែមានស្មារតីល្អ ព្រោះនេះជាបេសកកម្មដ៏ពិសិដ្ឋ មោទនភាព ទំនួលខុសត្រូវ និងពោពេញទៅដោយមនោសញ្ចេតនាដែលកម្មាភិបាល យុទ្ធជន នៃកងកំលាំងប្រដាប់អាវុធខេត្តជាច្រើនជំនាន់បានអនុវត្ត និងសម្រេចបានយ៉ាងល្អប្រសើរ នាពេលកន្លង​មក​។ ដូច្នេះហើយ កម្មាភិបាល យុទ្ធជន នៅពេលប្រាស្រ័យទាក់ទងជាមួយប្រជាជននៃប្រទេសមិត្ត ត្រូវតែរក្សាសីលធម៌ និងសុជីវធម៌ផ្ទាល់ខ្លួនបានល្អ។ ជាពិសេសគឺស្វែងយល់ និងសម្របខ្លួនបានល្អទៅនឹងទំនៀមទម្លាប់ និងការរស់នៅប្រចាំថ្ងៃរបស់ប្រជាជនក្នុងតំបន់ រក្សាទំនាក់ទំនងជាមួយអាជ្ញាធរមូលដ្ឋាន និងកងកម្លាំងប្រដាប់អាវុធនៃភាគីមិត្ត។

លោកស្រី Tran Tue Hien ជូនអំណោយ និងលើកទឹកចិត្តដល់កម្មាភិបាល យុទ្ធជន និងបុគ្គលិកនៃក្រុម K72 ដែលបំពេញភរកិច្ចនៅព្រះរាជាណាចក្រកម្ពុជា (រូប​ថត៖ binhphuoc.gov.vn)

បន្ទាប់ពីបំពេញការងារអស់រយៈពេលជាង ១ ខែ ក្នុងរដូវប្រាំង ឆ្នាំ ២០២៤-២០២៥ ក្រុម K72 បានសម្របសម្រួលស្វែងរក និងប្រមូលអដ្ឋិធាតុចំនួន ៩៩១ អដ្ឋិធាតុ (រួមទាំងផ្នូរចំនួន ៣ ដែលមានឈ្មោះ និងអាសយដ្ឋានពិតប្រាកដ) ក្នុងខេត្តកំពង់ធំ។ ក្នុងពេលបំពេញភារកិច្ចរបស់ខ្លួន កម្មាភិបាល យុទ្ធជន តែងតែធានាសុវត្ថិភាពមនុស្ស យានយន្ត និងគោរពយ៉ាងម៉ឺងម៉ាត់តាមវិន័យយោធា និងច្បាប់របស់ប្រទេសសាមី។ ទន្ទឹមនឹងដំណើរការបំពេញការងារ ក្រុម K72 ក៏បានរៀបចំ និងអនុវត្តការងារចលនាមហាជនដូចជា៖ ការពិនិត្យ ព្យាបាលជំងឺ និងចែកថ្នាំដោយឥតគិតថ្លៃ ជូនប្រជាពលរដ្ឋ និងនាយទាហាន នាយទហានរង ពលទាហាន នៃតំបន់ប្រតិបត្តិការសឹករងកំពង់ធំ៕

បកប្រែដោយ Duy Hoan