គណៈប្រតិភូខេត្ត Ca Mau អញ្ជើញទៅសួរសុខទុក្ខ និងជូនពរឆ្នាំថ្មីនៅខេត្តកោះកុង

តាងនាមគណៈប្រតិភូខេត្ត Ca Mau លោក Ho Trung Viet បានចែករំលែកថា៖ ខេត្ត Ca Mau និងខេត្តកោះកុងមានទំនាក់ទំនងសហប្រតិបត្តិការយូរអង្វែង។ ជារៀងរាល់ឆ្នាំ ខេត្ដទាំងពីរបានរៀបចំគណៈប្រតិភូទៅសួរសុខទុក្ខ និងជូនពរគ្នាទៅវិញទៅមកក្នុងឱកាសបុណ្យចូលឆ្នាំថ្មីប្រពៃណីជាតិ។

គណៈប្រតិភូខេត្ត Ca Mau ជូនអំណោយ និងជូនពរឆ្នាំថ្មីដល់ខេត្តកោះកុង (រូបថត៖ baocamau.vn)

ក្នុងឱកាសបុណ្យចូលឆ្នាំថ្មីប្រពៃណីជាតិកម្ពុជា លោក Ho Trung Viet បានជូនពរអាជ្ញាធរ និងប្រជាជនខេត្តកោះកុង ជួបតែសេចក្តីសុខ សុភមង្គល និងជោគជ័យគ្រប់ភារកិច្ចក្នុងឆ្នាំថ្មី។

លោកស្រី មិថុនា ភូថង អភិបាលខេត្តកោះកុង មានសេចក្តីសោមនស្សរីករាយដែលបានទទួលស្វាគមន៍គណៈប្រតិភូខេត្ត Ca Mau មកសួរសុខទុក្ខ និងជូនពរបុណ្យចូលឆ្នាំថ្មីប្រពៃណីជាតិកម្ពុជា។ លោកស្រីបានសង្កត់ធ្ងន់ថា៖ ខេត្តកោះកុងថ្លែងអំណរគុណយ៉ាងជ្រាលជ្រៅចំពោះមនោសញ្ចេតនាដែលខេត្ត Ca Mau បានផ្តល់ជូននាពេលកន្លងមក ជាពិសេសគឺការជួយឧបត្ថម្ភទាំងសម្ភារៈ និងស្មារតី។ តាមនោះ រួមចំណែកធ្វើឱ្យទំនាក់ទំនងកិច្ចសហប្រតិបត្តិការមិត្តភាពរវាងខេត្តទាំងពីរកាន់តែរឹងមាំ។

គណៈប្រតិភូខេត្ត Ca Mau ថតរូបអនុស្សាវរីយ៍ជាមួយថ្នាក់ដឹកនាំនៃខេត្តកោះកុង (រូបថត៖ baocamau.vn)

លោកស្រី មិថុនា ភូថង ឲ្យដឹងថា ថ្វីត្បិតតែមានភូមិសាស្ត្រឆ្ងាយ ប៉ុន្តែនាពេលខាងមុខ ខេត្តកោះកុងនឹងចូលរួមយ៉ាងសកម្មក្នុងកម្មវិធី និងព្រឹត្តិការណ៍សំខាន់ៗដែលរៀបចំដោយខេត្ត Ca Mau។ នេះជាឱកាសដ៏ល្អសម្រាប់ខេត្តទាំងពីរជួបជុំគ្នា ផ្លាស់ប្តូរបទពិសោធន៍លើគ្រប់វិស័យ  រួមចំណែកដល់ការអភិវឌ្ឍសេដ្ឋកិច្ចសង្គម និងលើកកម្ពស់ជីវភាពរស់នៅរបស់ប្រជាជន។

ក្នុងឱកាសនេះដែរ ខេត្ត Ca Mau បានប្រគល់អំណោយ និងឧបត្ថម្ភថវិកាចំនួន ១ ពាន់លានដុង ដើម្បីសាងសង់សំណង់យោធារបស់ខេត្តកោះកុង៕

បកប្រែដោយ Pham Diep