លេខាគណៈកម្មាធិការបក្សខេត្ត Kien Giang ជូនពរឆ្នាំថ្មីនៅព្រះរាជាណាចក្រកម្ពុជា

នៅតាមកន្លែងដែលអញ្ជើញទៅសួរសុខទុក្ខ  និងជូនពរឆ្នាំថ្មី លោក Nguyen Tien Hai បានសម្តែងនូវក្តីសប្បាយរីករាយចំពោះការអភិវឌ្ឍជាវិជ្ជមានរបស់ប្រទេសកម្ពុជានាពេលថ្មីៗនេះ ហើយជីវភាពរស់នៅរបស់ប្រជាជនក៏ត្រូវបានកែលម្អឥតឈប់ឈរ។ ស្ថាប័ន និងអង្គការនានានៃភាគីទាំងពីរតែងតែមានទំនាក់ទំនងជិតស្និទ្ធ និងជួយគាំទ្រ​គ្នាទៅវិញទៅមកក្នុងវិស័យការងារជាច្រើន រួមចំណែកពង្រឹងទំនាក់ទំនងល្អរវាងប្រទេសទាំងពីរ។

លោក Nguyen Tien Hai ប្រគល់អំណោយជូនលោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក (រូបថត៖ baokiengiang.vn)

ក្នុងឱកាសបុណ្យចូលឆ្នាំថ្មីប្រពៃជាតិខ្មែរ តាងនាមថ្នាក់ដឹកនាំខេត្ត Kien Giang លោក Nguyen Tien Hai លេខាគណៈកម្មាធិការបក្សខេត្ត បានជូនពរឧត្តមសេនីយ៍ នាយទាហាន នាយទាហានរង ពលទាហាន នៃបញ្ជាការដ្ឋានកងទ័ពជើងគោក បញ្ជាការដ្ឋានយោធភូមិភាគទី ៣ និងកងយោធពលខេមរភូមិន្ទទាំងមូល មានសុខភាពល្អ បន្តលើកកម្ពស់ប្រពៃណី និងសម្រេចបានសមិទ្ធផលថ្មីៗជាច្រើនថែមទៀត។ ជូនពរប្រជាជនកម្ពុជាជួបតែសេចក្តីសុខ សេចក្តីចម្រើន មានសុភមង្គល ក្នុងឱកាសបុណ្យឆ្នាំថ្មីប្រពៃណីជាតិខ្មែរ។

ថ្លែងក្នុងឱកាសទទួលជួបគណៈប្រតិភូ ខេត្ត Kien Giang អញ្ជើញមកសួរសុខទុក្ខ និងជូនពរឆ្នាំថ្មី ថ្នាក់ដឹកនាំបញ្ជាការដ្ឋានកងទ័ពជើងគោក និងបញ្ជាការយោធភូមិភាគទី៣ នៃកងយោធពលខេមរភូមិន្ទ បានសម្តែងនូវក្តីរីករាយ និងកិត្តិយស ដែលបានទទួលស្វាគមន៍គណៈប្រតិភូ។

លោក Nguyen Tien Hai ប្រគល់អំណោយជូនលោកឧត្តមសេនីយ៍ទោ អ៊ុយ ហៀង មេបញ្ជាការយោធភូមិភាគទី៣ (រូបថត៖ baokiengiang.vn)

ថ្នាក់ដឹកនាំបញ្ជាការដ្ឋានកងទ័ពជើងគោក និងបញ្ជាការយោធភូមិភាគទី៣ នៃកងយោធពលខេមរភូមិន្ទ បានថ្លែងអំណរគុណយ៉ាងស្មោះស្ម័គ្រចំពោះបក្ស រដ្ឋាភិបាល និងកងទ័ពប្រជាជនវៀតណាម ដែលបានប្រកៀកស្មាជាមួយប្រជាជនកម្ពុជាក្នុង​ការរំដោះប្រទេសជាតិ ជួយកម្ពុជាឱ្យរួចផុតពីរបបប្រល័យពូជសាសន៍ ព្រមទាំងបានអះអាងថា ទំនាក់ទំនងមិត្តភាពជាប្រពៃណី ភាពជាអ្នកជិតខាងល្អ រវាងប្រទេសទាំងពីរ តែងតែត្រូវបានរក្សាជានិច្ច និងបន្តគាំទ្រគ្នាទៅវិញទៅមក ដើម្បីអភិវឌ្ឍរូមគ្នា។

ថ្នាក់ដឹកនាំបញ្ជាការដ្ឋានកងទ័ពជើងគោក និងបញ្ជាការដ្ឋានយោធភូមិភាគទី៣ នៃកងយោធពលខេមរភូមិន្ទ ក៏បានវាយតម្លៃខ្ពស់ចំពោះសមិទ្ធិផលដែលវៀតណាមសម្រេចបាននាពេលថ្មីៗនេះ ហើយទន្ទឹមនឹងនោះបានស្នើឱ្យកម្លាំង​កងទ័ព កម្លាំង​ការពារព្រំដែន និងកងកម្លាំងនគរបាលខេត្ត Kien Giang បន្តសហការយ៉ាងជិតស្និទ្ធជាមួយកងកម្លាំងនានានៃភាគី​កម្ពុជា ដើម្បីកសាងប្រទេសទាំងពីរប្រកបដោយសន្តិភាព ស្ថិរភាព និងអភិវឌ្ឍន៍។ល៕

បកប្រែដោយ Duy Hoan