ជំរុញកិច្ចសហប្រតិបត្តិការរវាងវៀតណាម និងបេឡារុសលើវិស័យជាច្រើន

នៅក្នុងជំនួបនេះ លោកនាយករដ្ឋមន្ត្រី Pham Minh Chinh បានអះអាងថា វៀតណាមយកចិត្ដទុកដាក់យ៉ាងខ្លាំងចំពោះទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការលើវិស័យជាច្រើនជាមួយបេឡារុស ហើយបានសម្តែងការពេញចិត្តចំពោះការអភិវឌ្ឍជាវិជ្ជមានក្នុងទំនាក់ទំនងវៀតណាម-បេឡារុស្សក្នុងរយៈពេលកន្លងមក ជាពិសេសក្នុងវិស័យនយោបាយ និងការទូត។

លោកនាយករដ្ឋមន្ត្រី Pham Minh Chinh បានស្នើឲ្យភាគីទាំងពីរបន្តបង្កើនការផ្លាស់ប្តូរគណៈប្រតិភូ ជាពិសេសគណៈប្រតិភូកម្រិតខ្ពស់ និងកិច្ចសហប្រតិបត្តិការនៅវេទិកាពហុភាគី។ ព្រមទាំងស្នើឲ្យភាគីទាំងពីរខិតខំប្រឹងប្រែងជំរុញទំនាក់ទំនងសេដ្ឋកិច្ច និងពាណិជ្ជកម្មទ្វេភាគី និងបង្កើតលក្ខខណ្ឌសម្រាប់អាជីវកម្មនៃភាគីទាំងពីរបង្កើនកិច្ចសហប្រតិបត្តិការ និងការវិនិយោគ។ រក្សាប្រសិទ្ធភាពនូវយន្តការគណៈកម្មាធិការអន្តររដ្ឋាភិបាល និងរៀបចំផែនការសកម្មភាពជាក់លាក់ដោយវិធីសាស្រ្តសមស្រប និងមានប្រសិទ្ធភាពថែមទៀត។

លោក Pham Minh Chinh នាយករដ្ឋមន្ត្រីវៀតណាម ទទួលជួបលោក Anatoly Sivak ឧបនាយករដ្ឋមន្ត្រីនៃសាធារណរដ្ឋបេឡារុស (រូបថត៖ vnanet.vn)

លោកនាយករដ្ឋមន្ត្រីបានស្នើឲ្យភាគីទាំងពីរបន្តពង្រឹងកិច្ចសហប្រតិបត្តិការលើវិស័យផ្សេងៗទៀត រួមទាំងវិស័យការពារជាតិ និងសន្តិសុខ បច្ចេកវិជ្ជាព័ត៌មាន ការធ្វើបរិវត្ដកម្មឌីជីថល ថាមពលស្អាត ឧស្សាហកម្ម កសិកម្ម អប់រំ វប្បធម៌ និងការផ្លាស់ប្តូរប្រជាជននិងប្រជាជន ដើម្បីបង្កើនការយល់ដឹងគ្នាទៅវិញទៅមក។ល។

លោកនាយករដ្ឋមន្ត្រី Pham Minh Chinh បានស្នើឲ្យភាគីទាំងពីរបង្កើនការផ្លាស់ប្តូរអាហារូបករណ៍ ជាពិសេសផ្នែកវិទ្យាសាស្ត្រ សិល្បៈ និងបណ្តុះបណ្តាលធនធានមនុស្សមានគុណភាពខ្ពស់ក្នុងវិជ្ជាជីវៈដែលសមស្របនឹងនិន្នាការអភិវឌ្ឍរបស់ពិភពលោក។ លោកនាយករដ្ឋមន្ត្រីបានស្នើឲ្យភាគីទាំងពីរជំរុញកិច្ចសហប្រតិបត្តិការលើវិស័យផលិតកម្មរថយន្ត គ្រឿងយន្តកសិកម្ម និងអភិវឌ្ឍការដឹកជញ្ជូនតាមផ្លូវដែក។

ទិដ្ឋភាពនៃជំនួប (រូបថត៖ vnanet.vn)

លោក Anatoly Sivak ឧបនាយករដ្ឋមន្ត្រីបេឡារុស បានសង្កត់ធ្ងន់ថា បេឡារុសវាយតំលៃខ្ពស់ចំពោះតួនាទីរបស់វៀតណាមក្នុងអាស៊ីអាគ្នេយ៍ និងតំបន់អាស៊ីប៉ាស៊ីហ្វិក; ថ្នាក់ដឹកនាំជាន់ខ្ពស់បេឡារុសចាប់អារម្មណ៍យ៉ាងខ្លាំង និងចង់ជំរុញកិច្ចសហប្រតិបត្តិការលើវិស័យជាច្រើនជាមួយវៀតណាម។ លោកឧបនាយករដ្ឋមន្ត្រី Anatoly Sivak ក៏បានឯកភាពជាមួយការវាយតម្លៃរបស់នាយករដ្ឋមន្ត្រី Pham Minh Chinh លើទំនាក់ទំនងទ្វេភាគី និងការតម្រង់ទិសដើម្បីបង្កើនកិច្ចសហប្រតិបត្តិការនាពេលខាងមុខ។

ភាគីទាំងពីរបានឯកភាពដឹកនាំក្រសួង ស្ថាប័ន មូលដ្ឋាន និងធុរកិច្ចនៃប្រទេសទាំងពីរអនុវត្តយ៉ាងសកម្មនូវកិច្ចព្រមព្រៀងពីដំណើរទស្សនកិច្ច និងជំនួបនាពេលថ្មីៗនេះរវាងថ្នាក់ដឹកនាំជាន់ខ្ពស់នៃប្រទេសទាំងពីរ ក៏ដូចជាលទ្ធផលលេចធ្លោនៃសម័យប្រជុំលើកទី ១៦ នៃគណៈកម្មាធិការអន្តររដ្ឋាភិបាលវៀតណាម-បេឡារុស ស្តីពីកិច្ចសហប្រតិបត្ដិការសេដ្ឋកិច្ច-ពាណិជ្ជកម្ម វិទ្យាសាស្ត្រ-បច្ចេកវិទ្យា ដើម្បីជំរុញកិច្ចសហប្រតិបត្តិការរវាងវៀតណាម និងបេឡារុសលើគ្រប់វិស័យ៕

បកប្រែដោយ Pham Diep