វៀតណាម-អាមេរិក អនុវត្តកម្មវិធីសហប្រតិបត្តិការនាពេលឆាប់ៗនេះ

កម្មវិធីនេះគឺសំដៅតភ្ជាប់ជាយុទ្ធសាស្ត្ររវាងសាកលវិទ្យាល័យនៃប្រទេសទាំងពីរ វៀតណាម-អាមេរិក និងកសាងផែនការសហប្រតិបត្តិការជាក់ស្តែង ប្រកបដោយប្រសិទ្ធភាព និងនិរន្តរភាព។

លោកនាយករដ្ឋមន្ត្រី Pham Minh Chinh មានប្រសាសន៍នៅក្នុងជំនួបការងារ (រូបថត៖ vnanet.vn)

ពិភាក្សាជាមួយគណៈប្រតិភូ លោកនាយករដ្ឋមន្ត្រី Pham Minh Chinh បានស្នើឲ្យសាកលវិទ្យាល័យនៃប្រទេសទាំងពីរសម្របសម្រួលកសាងគម្រោង ផែនការសហប្រតិបត្តិការរយៈពេលវែង ឲ្យ​បាន​ជាក់ស្តែង ប្រកបដោយប្រសិទ្ធភាព និងនិរន្តរភាព ជាមួយនឹងទម្រង់សម្បូរបែប មានភាពច្នៃប្រឌិត និងភាពបត់បែន ហើយផ្ដោតលើវិស័យថ្មី ដើម្បីជួយវៀតណាមទាញយកសក្ដានុពលពីលំហសមុទ្រ លំហអវកាស និងលំហក្រោមដី។

ទិដ្ឋភាពនៃជំនួបការងារ (រូបថត៖ vnanet.vn)

ដោយសង្កត់ធ្ងន់ថា នាពេលថ្មីៗនេះ សាជីវកម្មធំៗរបស់អាមេរិក ដូចជា Intel, NVIDIA, Apple... បានមកស្វែងយល់ និងវិនិយោគ ពង្រីកប្រព័ន្ធអេកូឡូស៊ីនៅប្រទេសវៀតណាមនោះ លោកនាយករដ្ឋមន្ត្រីបានស្នើឱ្យសាកលវិទ្យាល័យនៃភាគីទាំងពីរពិភាក្សាយ៉ាងសកម្មលើកម្មវិធីសហប្រតិបត្តិការជាក់ស្តែង ជាពិសេសលើវិស័យបច្ចេកវិទ្យាខ្ពស់ AI semiconductor ជីវបច្ចេកវិទ្យា សុខភាព កសិកម្ម ភាសាបរទេស ការបណ្តុះបណ្តាលធនធានមនុស្សប្រកបដោយគុណភាពខ្ពស់ តាមតម្រូវការរបស់សាជីវកម្ម និងសហគ្រាសនៃប្រទេសទាំងពីរ និងកិច្ចសហប្រតិបត្តិការស្រាវជ្រាវ និងអភិវឌ្ឍន៍។

លោកនាយករដ្ឋមន្ត្រីបានស្នើឱ្យថ្នាក់ដឹកនាំសាលាជំរុញរដ្ឋបាលប្រធានាធិបតីលោក Donald Trump ដើម្បីទទួលស្គាល់សេដ្ឋកិច្ចទីផ្សាររបស់វៀតណាមក្នុងពេលឆាប់ៗនេះ លុបចោលការរឹតត្បិតលើការនាំចេញបច្ចេកវិទ្យាខ្ពស់ចំពោះវៀតណាម បង្កើតលក្ខខណ្ឌសម្រាប់វៀតណាមបន្តអភិវឌ្ឍ។

រីឯភាគីអាមេរិកវិញ លោក Marc E. Knapper ឯកអគ្គរដ្ឋទូតអាមេរិកប្រចាំនៅវៀតណាម និងតំណាងសាកលវិទ្យាល័យអាមេរិកបានវាយតំលៃខ្ពស់ចំពោះយុទ្ធសាស្ត្រអភិវឌ្ឍរបស់វៀតណាម ជាពិសេសលើវិស័យអប់រំបណ្តុះបណ្តាល។ លោកបានអះអាងថា អាមេរិកត្រៀមខ្លួនជាស្រេចសហប្រតិបត្តិការ និងរួមដំណើរជាមួយវៀតណាម ក្នុងយុទ្ធសាស្ត្រអភិវឌ្ឍសេដ្ឋកិច្ចសង្គម ជាពិសេសក្នុងវិស័យអប់រំ បណ្តុះបណ្តាល វិទ្យាសាស្ត្រ បច្ចេកវិទ្យា និងនវានុវត្តន៍ លើកកំពស់គុណភាពធនធានមនុស្ស រួមចំណែកធ្វើឲ្យទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម-អាមេរិក កាន់តែស៊ីជម្រៅថែមទៀត៕

បកប្រែដោយ Thanh Cong