សេដ្ឋកិច្ចវៀតណាមតាមទស្សនៈអន្តរជាតិ៖ ឱកាសស្ទុះ​ផ្លោះ​ឈាន​ទៅ​មុខ

យោងតាមរបាយការណ៍របស់ស្ថាប័នហិរញ្ញវត្ថុនិងអ្នកជំនាញសេដ្ឋកិច្ចឈានមុខគេរបស់ពិភពលោក កំណែទម្រង់សេដ្ឋកិច្ចដ៏រឹងមាំ និងយុទ្ធសាស្ត្រអភិវឌ្ឍន៍ប្រកបដោយវិជ្ជាជីវៈ បានជួយវៀតណាមរក្សាសន្ទុះកំណើនគួរឱ្យចាប់អារម្មណ៍ក្នុងរយៈពេលជាច្រើនឆ្នាំកន្លងមក។

ការកែច្នៃផលិតផលត្រីធូណាសមុទ្រសម្រាប់ការនាំចេញ (រូបថត៖ vnanet.vn)

របាយការណ៍របស់មូលនិធិរូបិយវត្ថុអន្តរជាតិ (IMF) ព្យាករណ៍ថា ប្រសិនបើបន្តអនុវត្តកំណែទម្រង់ដ៏ទូលំទូលាយ និងព្រមៗគ្នានោះ ប្រទេសកំពុងអភិវឌ្ឍដូចជាវៀតណាមអាចបង្កើនទិន្នផលសេដ្ឋកិច្ចរយៈពេលវែង ជាមធ្យមពី ១.៥% - ៣% ក្នុងរយៈពេល ២-៤ ឆ្នាំ។ ដូចគ្នានេះដែរ របាយការណ៍ថ្មីបំផុតរបស់ធនាគារពិភពលោក (WB) ក៏បានបង្ហាញពីយថាទស្សន៍វិជ្ជមានសម្រាប់សេដ្ឋកិច្ចវៀតណាមផងដែរ ជាមួយនឹងការព្យាករណ៍កំណើន ៦.៨% នៅឆ្នាំនេះ និង ៦.៥% នៅឆ្នាំ ២០២៦។ WB បានព្យាករណ៍ថា FDI ចូលវៀតណាមនឹងរក្សានៅកម្រិត ២៥ ពាន់លានដុល្លារក្នុងមួយឆ្នាំ ដែលបង្ហាញពីភាពទាក់ទាញនៃទីផ្សារវៀតណាមចំពោះវិនិយោគិនអន្តរជាតិ។

អង្គការអន្តរជាតិជាច្រើនក៏បានវាយតម្លៃជាវិជ្ជមានអំពីសេដ្ឋកិច្ចរបស់វៀតណាមផងដែរ។ យោងតាមក្រុមហ៊ុន Fibre2Fashion (ឥណ្ឌា) ផលិតផលក្នុងស្រុកសរុប (GDP) របស់វៀតណាមត្រូវបានរំពឹងថា នឹងកើនឡើងជិត ៨% នៅក្នុងត្រីមាសទីមួយនៃឆ្នាំនេះ។ ទន្ទឹមនឹងនេះ ធនាគារ Standard Chartered បានព្យាករណ៍ថា GDP របស់វៀតណាមនឹងកើនឡើង ៦.៧% នៅឆ្នាំនេះ និង ៧.៥% នៅក្នុងឆមាសទីមួយ ដោយមានលំហូរ FDI ដ៏សម្បូរបែប ជាពិសេសក្នុងវិស័យផលិតកម្ម និងអចលនទ្រព្យ ជាមួយនឹងការស្តារឡើងវិញនៃវិស័យទេសចរណ៍ កំណើននាំចេញ និងផលិតកម្មឧស្សាហកម្ម។

ជាមួយនឹងអត្រាកំណើនដ៏គួរឱ្យចាប់អារម្មណ៍ វៀតណាមកំពុងអះអាងពីឋានៈរបស់ខ្លួនលើផែនទីពាណិជ្ជកម្មពិភពលោក។ គេហទំព័រព័ត៌មាននូវែលហ្សេឡង់ rnz.co.nz នាពេលថ្មីៗនេះបានអត្ថាធិប្បាយថា វៀតណាមបច្ចុប្បន្នជាប្រទេសដែលមានសេដ្ឋកិច្ចរីកចម្រើនលឿនបំផុតនៅអាស៊ីអាគ្នេយ៍៕

តាម vovworld.vn