អ្នកយកព័ត៌មាន៖ សូមលោកស្រីអនុរដ្ឋមន្ត្រីចែករំលែកអំពីគោលបំណង អត្ថន័យ និងសារៈសំខាន់នៃដំណើរទស្សនកិច្ចនេះ?

លោកស្រីអនុរដ្ឋមន្ត្រី Le Thi Thu Hang៖ ដំណើរទស្សនកិច្ចផ្លូវរដ្ឋនៅវៀតណាមរបស់ព្រះមហាក្សត្រ និងព្រះរាជមហេសីបែលហ្ស៊ិក គឺជាដំណើរទស្សនកិច្ចពិសេសមួយដែលមានអត្ថន័យដ៏សំខាន់ ចំពោះទំនាក់ទំនងរវាងប្រទេសទាំងពីរ។ នេះជាដំណើរទស្សនកិច្ចផ្លូវរដ្ឋលើកដំបូងបន្ទាប់ពីជាង៥០ ឆ្នាំនៃការបង្កើតទំនាក់ទំនងការទូតរវាងប្រទេសទាំងពីរ ជាពិសេសក្នុងបរិបទដែលវៀតណាមឈានចូលយុគសម័យថ្មី។ នេះក៏ជាព្រឹត្តិការណ៏ប្រវត្តិសាស្ត្រដ៏សំខាន់ ដែលនាំទំនាក់ទំនងរវាងប្រទេសទាំងពីរចូលទៅក្នុងដំណាក់កាលថ្មីនៃការអភិវឌ្ឍន៍ ដោយមានទំនុកចិត្តខាងនយោបាយកាន់តែខ្ពស់ និងកិច្ចសហប្រតិបត្តិការត្រូវបានជំរុញឲ្យកាន់តែជាក់ស្តែង និងប្រកបដោយប្រសិទ្ធភាពថែមទៀត។ ដំណើរទស្សនកិច្ចនេះមានចំណុចសំខាន់ៗចំនួនបួនដូចខាងក្រោម៖

ទីមួយ ដំណើរទស្សនកិច្ចនេះបង្ហាញពីមនោសញ្ចេតនាពិសេសរបស់ព្រះមហាក្សត្រ Philippe និងព្រះរាជមហេសី Mathilde ចំពោះប្រទេសវៀតណាម។

leftcenterrightdel
លោកស្រី Le Thi Thu Hang អនុរដ្ឋមន្ត្រីក្រសួងការបរទេសវៀតណាម (រូបថត៖ ក្រសួងការបរទេស)

ទីពីរ ការស្វាគមន៍ព្រះមហាក្សត្រ និងព្រះរាជមហេសីបែលហ្ស៊ិកមកបំពេញទស្សនកិច្ចនៅវៀតណាម គឺជាការបង្ហាញយ៉ាងរស់រវើកនូវការអនុវត្គោលនយោបាយការបរទេសដ៏ខ្ជាប់ខ្ជួនរបស់វៀតណាមអំពីឯករាជ្យភាព ភាពម្ចាស់ការ ពហុភាគីភាវូបនីយកម្ម និងការធ្វើពិពិធកម្មទំនាក់ទំនងបរទេសដើម្បីសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍ សមាហរណកម្មអន្តរជាតិ យ៉ាងសកម្ម និងទូលំទូលាយ ជាមិត្ត ដៃគូដែលអាចទុកចិត្តបាន និងជាសមាជិកដែលមានទំនួលខុសត្រូវរបស់សហគមន៍អន្តរជាតិ; បង្ហាញពីការយកចិត្តទុកដាក់យ៉ាងខ្លាំងរបស់វៀតណាមចំពោះបែលហ្សិក ដែលជាដៃគូសំខាន់របស់វៀតណាមក្នុងសហភាពអឺរ៉ុប (EU)។ ចំពោះភាគីបែលហ្ស៊ិក ដំណើរទស្សនកិច្ចផ្លូវរដ្ឋរបស់ព្រះមហាក្សត្រ និងព្រះរាជមហេសី នៅវៀតណាម  បានបង្ហាញពីការយកចិត្តទុកដាក់ពិសេសរបស់បែលហ្ស៊ិកចំពោះវៀតណាមក៏ដូចជាតួនាទី និងកិត្យានុភាពរបស់វៀតណាមនៅក្នុងតំបន់អាស៊ីប៉ាស៊ីហ្វិក។

ទី៣ ដំណើរទស្សនកិច្ចនេះ បញ្ជាក់ពីគោលបំណង និងការប្តេជ្ញាចិត្តរបស់ភាគីទាំងពីរ ដើម្បីនាំទំនាក់ទំនងទ្វេភាគីឡើងកម្រិតកម្ពស់ថ្មីមួយ បង្កើនទំនុកចិត្តនយោបាយបន្ថែមទៀត និងជំរុញកិច្ចសហប្រតិបត្តិការលើវិស័យជាច្រើន ជាពិសេសសេដ្ឋកិច្ច ពាណិជ្ជកម្ម ការវិនិយោគ ដែលជាសសរស្តម្ភសំខាន់ក្នុងទំនាក់ទំនងទ្វេភាគី។ ដំណើរទស្សនកិច្ចនេះក៏បន្តជំរុញឱ្យស៊ីជម្រៅថែមទៀតនូវក្របខ័ណ្ឌភាពជាដៃគូយុទ្ធសាស្ត្រវៀតណាម-បែលហ្ស៊ិក លើវិស័យកសិកម្មដែលប្រទេសទាំងពីរបានបង្កើតឡើងក្នុងឆ្នាំ ២០១៨ ទន្ទឹមនឹងនោះ ពង្រីកវិសាលភាពនៃកិច្ចសហប្រតិបត្តិការលើវិស័យអាទិភាព និងសក្តានុពលផ្សេងទៀតដូចជាការអប់រំ-បណ្តុះបណ្តាល វិទ្យាសាស្ត្រ-បច្ចេកវិទ្យា វប្បធម៌-សិល្បៈ។

ទី៤ តាមរយៈដំណើរទស្សនកិច្ចនេះ វៀតណាមបន្តស្នើឱ្យភាគីបែលហ្សិកយកចិត្តទុកដាក់ និងបង្កើតលក្ខខណ្ឌងាយស្រួលសម្រាប់សហគមន៍អាណិកជនវៀតណាមនៅបែលហ្ស៊ិកចំនួន ១៣០០០ នាក់ រស់នៅ សិក្សា និងធ្វើអាជីវកម្ម ពង្រីកស្មារតីសាមគ្គីភាព ងាកទៅរកមាតុភូមិ សមាហរណកម្មយ៉ាងសកម្មក្នុងសង្គមបែលហ្ស៊ិក ដើរតួនាទីជាស្ពាន បង្កើនការយល់ដឹងរវាងប្រជាជននៃប្រទេសទាំងពីរ រួមចំណែកដល់ការអភិវឌ្ឍន៍នៃទំនាក់ទំនងវៀតណាម-បែលហ្ស៊ិក។

អ្នកយកព័ត៌មាន៖ សូមលោកស្រីអនុរដ្ឋមន្ត្រីចែករំលែកបន្ថែមអំពីការអភិវឌ្ឍន៍ជាវិជ្ជមានក្នុងទំនាក់ទំនង វៀតណាម-បែលហ្សិក ក្នុងរយៈពេលកន្លងមក?

លោកស្រីអនុរដ្ឋមន្ត្រី Le Thi Thu Hang៖ វៀតណាម និងបែលហ្ស៊ិកបានបង្កើតទំនាក់ទំនងការទូតក្នុងឆ្នាំ ១៩៧៣ និងបង្កើតក្របខ័ណ្ឌភាពជាដៃគូយុទ្ធសាស្ត្រលើវិស័យកសិកម្មក្នុងឆ្នាំ ២០១៨។ ក្នុងរយៈពេលកន្លងមក ទំនាក់ទំនងមិត្តភាព និងកិច្ចសហប្រតិបត្តិការលើវិស័យជាច្រើនរវាងវៀតណាម និងបែលហ្សិកត្រូវបានរក្សានិងអភិវឌ្ឍន៍យ៉ាងល្អប្រសើរ។

ស្តីពីនយោបាយ និងការបរទេស ភាគីទាំងពីរបានបង្ហាញពីទំនុកចិត្ត និងការគោរពគ្នាទៅវិញទៅមក តាមរយៈសកម្មភាពផ្លាស់ប្តូរ និងការជួបជុំថ្នាក់ជាន់ខ្ពស់ និងគ្រប់លំដាប់ថ្នាក់; អនុវត្តប្រកបដោយប្រសិទ្ធភាពនូវក្របខណ្ឌ និងយន្តការសហប្រតិបត្តិការ ដូចជា ការពិគ្រោះយោបល់នយោបាយថ្នាក់អនុរដ្ឋមន្ត្រីការបរទេស គណៈកម្មាធិការចម្រុះស្តីពីសេដ្ឋកិច្ច វៀតណាម-បែលហ្សិក និងគណៈកម្មាធិការចម្រុះស្តីពីកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យា វៀតណាម-បែលហ្ស៊ិក; សម្របសម្រួលយ៉ាងជិតស្និទ្ធ និងគាំទ្រគ្នាទៅវិញទៅមកនៅវេទិកា និងយន្តការពហុភាគី។

កិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគរវាងប្រទេសទាំងពីរមានភាពរស់រវើកជាមួយនឹងលទ្ធផលវិជ្ជមានជាច្រើន។ បែលហ្ស៊ិក ជាទីផ្សារនាំចេញធំជាងគេទី៦ របស់វៀតណាមនៅអឺរ៉ុប។ វៀតណាមជាដៃគូពាណិជ្ជកម្មធំជាងគេរបស់បែលហ្សិកក្នុងអាស៊ាន។ ទំហំពាណិជ្ជកម្មទ្វេភាគីក្នុងឆ្នាំ ២០២៤ សម្រេចបាន ៤.៤៥ ពាន់លានដុល្លារ។ បែលហ្ស៊ិកបច្ចុប្បន្នមានគម្រោងវិនិយោគចំនួន ១០០ នៅវៀតណាមដោយមានដើមទុនចុះបញ្ជីសរុបចំនួន ១.១ ពាន់លានដុល្លារអាមេរិកលើវិស័យដឹកជញ្ជូនតាមផ្លូវសមុទ្រ សេវាកម្មដឹកជញ្ជូន និងថាមពលកកើតឡើងវិញ។

ក្នុងនាមជាដៃគូយុទ្ធសាស្ត្រក្នុងវិស័យកសិកម្ម ប្រទេសទាំងពីរបានអនុវត្តយ៉ាងសកម្មនូវកម្មវិធីសហប្រតិបត្តិការបច្ចេកទេសជាច្រើនរវាងសាលារៀន និងវិទ្យាស្ថានស្រាវជ្រាវកសិកម្ម; អភិវឌ្ឍប្រព័ន្ធ logistics តាមផ្លូវទឹក ដើម្បីបម្រើការនាំចេញកសិផលពីវៀតណាមទៅអឺរ៉ុប; ជំរុញការដាក់ពង្រាយខ្សែសង្វាក់ logistics ត្រជាក់ឆ្លាតវៃ សហការក្នុងការអភិវឌ្ឍឧស្សាហកម្មកាកាវ និងសុវត្ថិភាពចំណីអាហារ។

វិស័យផ្សេងទៀតដូចជា វិស័យការពារជាតិ សន្តិសុខ វិទ្យាសាស្ត្រ និងបច្ចេកវិទ្យា នវានុវត្តន៍ វប្បធម៌ ការអប់រំ និងបណ្តុះបណ្តាល និងកិច្ចសហប្រតិបត្តិការរវាងមូលដ្ឋាន មានចំណុចលេចធ្លោជាច្រើន។ ប្រទេសទាំងពីរបានបង្កើតកិច្ចសហប្រតិបត្តិការលើការកម្ចាត់្រប់បែកគ្រាប់មីន ពេទ្យយោធា វិទ្យាសាស្ត្រ និងបច្ចេកវិទ្យាយោធា ការផ្លាស់ប្តូរ និងបណ្តុះបណ្តាលសិក្ខាកាមយោធា; ស្វែងរកឱកាសដើម្បីជំរុញកិច្ចសហប្រតិបត្តិការលើវិស័យបញ្ញាសិប្បនិម្មិត (AI) បច្ចេកវិទ្យាបៃតង នវានុវត្តន៍ បច្ចេកវិទ្យាខ្ពស់ ជំរុញប្រព័ន្ធអេកូឡូស៊ីនៃការចាប់ផ្តើមអាជីវកម្ម និងបណ្តុះបណ្តាលធនធានមនុស្សប្រកបដោយគុណភាពខ្ពស់ ជាពិសេសនៅក្នុងឧស្សាហកម្ម semiconductor។

ជាមួយនឹងមូលដ្ឋានគ្រឹះនៃកិច្ចសហប្រតិបត្តិការដ៏ល្អដែលមានស្រាប់ រួមជាមួយនឹងទំនុកចិត្ត និងឆន្ទៈនយោបាយរបស់ថ្នាក់ដឹកនាំនៃប្រទេសទាំងពីរ និងបំណងប្រាថ្នារបស់ប្រជាជនវៀតណាម និងបែលហ្ស៊ិក ខ្ញុំជឿជាក់ថា ដំណើរទស្សនកិច្ចរបស់ព្រះមហាក្សត្រ និងព្រះរាជមហេសីបែលហ្ស៊ិកទៅកាន់វៀតណាមនឹងទទួលបានជោគជ័យយ៉ាងត្រចះត្រចង់ សម្រេចបានលទ្ធផលវិជ្ជមានជាច្រើន រួមចំណែកជំរុញកិច្ចសហប្រតិបត្តិការរវាងប្រទេសទាំងពីរ នាំទំនាក់ទំនងវៀតណាម-បែលហ្ស៊ិកឈានចូលជំពូកថ្មីនៃការអភិវឌ្ឍន៍ បំពេញសេចក្តីប្រាថ្នារបស់ប្រជាជន រួមចំណែកដល់សន្តិភាព ស្ថិរភាព និងការអភិវឌ្ឍន៍ក្នុងតំបន់ និងនៅលើពិភពលោក។

អ្នកយកព័ត៌មាន៖ សូមអរគុណលោកស្រីអនុរដ្ឋមន្ត្រី!

បកប្រែដោយ Huyen Trang