ពង្រឹង និងពង្រីកទំនាក់ទំនងសហប្រតិបត្តិការ វៀតណាម-រុស្ស៊ី ឲ្យកាន់តែស៊ីជម្រៅថែមទៀត

លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម និងលោក Sergei Lavrov រដ្ឋមន្ត្រីក្រសួងការបរទេសរុស្ស៊ី (រូបថត៖ ក្រសួងការបរទេស)

នាថ្ងៃទី២ ខែមេសា នៅទីស្នាក់ការក្រសួងការបរទេសរុស្ស៊ី លោកឧបនាយករដ្ឋមន្ត្រី និងជារដ្ឋមន្ត្រីការបរទេស Bui Thanh Son និងលោករដ្ឋមន្ត្រីការបរទេសរុស្ស៊ី Sergei Lavrov បានជួបពិភាក្សាជាមួយគ្នា។ ភាគីទាំងពីរបានពិភាក្សា និងវាយតម្លៃអំពីស្ថានភាពនៃកិច្ចសហប្រតិបត្តិការ វៀតណាម-រុស្ស៊ី ពិភាក្សា និងឯកភាពលើវិធានការជាច្រើនដើម្បីពង្រឹង និងពង្រីកទំនាក់ទំនងទ្វេភាគីលើគ្រប់វិស័យ ព្រមទាំងពិភាក្សាលើបញ្ហាអន្តរជាតិ និងតំបន់ដែលភាគីទាំងពីរមានការយកចិត្តទុកដាក់ដូចគ្នា។ ភាគីទាំងពីរក៏បានពិភាក្សាអំពីការត្រៀមរៀបចំសម្រាប់ដំណើរទស្សនកិច្ច និងការចូលរួមរបស់លោកអគ្គលេខាបក្ស To Lam ក្នុងពិធីរំលឹកខួបលើកទី៨០ នៃទិវាជ័យជំនះនៃការប្រយុទ្ធការពារប្រទេសជាតិដ៏មហិមានៅទីក្រុងមូស្គូ តបតាមការអញ្ជើញរបស់លោក Vladimir Putin ប្រធានាធិបតីរុស្ស៊ី នាខែឧសភាខាងមុខ។

ទិដ្ឋភាពនៃកិច្ចពិភាក្សា (រូបថត៖ ក្រសួងការបរទេស)

ដើម្បីជំរុញទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-រុស្ស៊ី ក្នុងបរិបទស្ថានភាពថ្មី ជាពិសេសនៅពេលដែលវៀតណាមឈានចូលសករាជថ្មី ហើយរុស្ស៊ីឈានទៅដំណាក់កាលអភិវឌ្ឍន៍ថ្មី ភាគីទាំងពីរបានឯកភាពបន្តបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសដំណើរទស្សនកិច្ចរបស់ថ្នាក់ដឹកនាំជាន់ខ្ពស់តាមរយៈបណ្តាញបក្ស រដ្ឋ រដ្ឋសភា និងការជួបប្រាស្រ័យរវាងប្រជាជននិងប្រជាជន។ ភាគីទាំងពីរក៏បានឯកភាពគ្នាពង្រឹងកិច្ចសហប្រតិបត្តិការរវាងក្រសួងការបរទេសទាំងពីរ ពង្រឹង និងពង្រីកវិសាលភាពនៃកិច្ចសហប្រតិបត្តិការលើវិស័យដូចជា៖ ថាមពល ជាពិសេសថាមពលបៃតង ថាមពលកកើតឡើងវិញ ហេដ្ឋារចនាសម្ព័ន្ធគមនាគមន៍ logistics វិទ្យាសាស្ត្រ និងបច្ចេកវិទ្យា កសិកម្ម ជីវវេជ្ជសាស្ត្រ វប្បធម៌ ទេសចរណ៍ ការអប់រំ និងបណ្តុះបណ្តាល។ ទន្ទឹមនឹងនោះ ភាគីទាំងពីរបានឯកភាពគ្នាលើកកំពស់តួនាទីនៃកិច្ចព្រមព្រៀងពាណិជ្ជកម្មសេរី វៀតណាម-អឺរ៉ាស៊ី ផ្តោតលើការអនុវត្តគម្រោងសំខាន់ៗ និងអភិវឌ្ឍគម្រោងថ្មីៗ ដើម្បីជំរុញកិច្ចសហប្រតិបត្តិការសេដ្ឋកិច្ច-ពាណិជ្ជកម្ម និងវិនិយោគក្លាយជាសសរស្តម្ភក្នុងកិច្ចសហប្រតិបត្តិការវៀតណាម-រុស្ស៊ី៕

បកប្រែដោយ Huyen Trang