ខេត្ត Tay Ninh ជំរុញកិច្ចសហប្រតិបត្តិការជាមួយបណ្តាខេត្តនៃព្រះរាជាណាចក្រកម្ពុជា

នៅក្នុងកិច្ចពិភាក្សាការងារ ថ្នាក់ដឹកនាំគណៈកម្មាធិការប្រជាជនខេត្ត Tay Ninh បានជម្រាបជូនអំពីស្ថានភាពសេដ្ឋកិច្ចសង្គម ឧទ្ទេសនាមអំពីសក្តានុពល កាលានុវត្តភាពសហប្រតិបត្តិការ គោលនយោបាយអំពាវនាវ និងទាក់ទាញការវិនិយោគ ព្រមទាំងផ្សព្វផ្សាយទេសចរណ៍នៅរមណីយដ្ឋានរបស់ខេត្ត។

ទិដ្ឋភាពនៃកិច្ចពិភាក្សាការងារ (រូបថត៖ vnanet.vn)

យោងតាមលោក Nguyen Hong Thanh អនុប្រធានអចិន្ត្រៃយ៍នៃគណៈកម្មាធិការប្រជាជនខេត្ត Tay Ninh បានឲ្យដឹងថា ជំនួបជាមួយក្រសួងការបរទេស និងសហប្រតិបត្តិការអន្តរជាតិកម្ពុជា គឺជាឱកាសសម្រាប់ខេត្ត Tay Ninh ណែនាំពីលក្ខណៈសេដ្ឋកិច្ចសង្គមសំខាន់ៗ ផ្សព្វផ្សាយសក្តានុពល ឧត្តមភាព និងបរិយាកាសវិនិយោគរបស់ខេត្ត។ ថ្នាក់ដឹកនាំខេត្ត Tay Ninh សង្ឃឹមថា ក្រសួងការបរទេស និងស្ថានអគ្គកុងស៊ុលកម្ពុជាប្រចាំទីក្រុងហូជីមិញ នឹងបន្តដើរតួជាស្ពានតភ្ជាប់ ណែនាំរូបភាព និងបរិយាកាសវិនិយោគ ព្រមទាំងណែនាំអ្នកវិនិយោគកម្ពុជាដែលមានសមត្ថភាពមកបណ្តាក់ទុន និងសហប្រតិបត្តិការក្នុងខេត្ត ដើម្បីនាំមកនូវផលប្រយោជន៍សម្រាប់ភាគីទាំងពីរ។

លោក Nguyen Hong Thanh អនុប្រធានអចិន្ត្រៃយ៍នៃគណៈកម្មាធិការប្រជាជនខេត្ត Tay Ninh ថ្លែងនៅក្នុងកិច្ចពិភាក្សាការងារ (រូបថត៖ vnanet.vn)

លោក Nguyen Hong Thanh បានអះអាងថា ខេត្តនឹងបន្តសម្របសម្រួលយ៉ាងជិតស្និទ្ធ និងជួយឧបត្ថម្ភយ៉ាងសកម្មចំពោះស្ថាប័នការទូត និងបណ្តាខេត្តរបស់កម្ពុជា អនុវត្តកិច្ចព្រមព្រៀងសហប្រតិបត្តិការដែលបានចុះហត្ថលេខា និងរៀបចំសកម្មភាពពាណិជ្ជកម្ម វិនិយោគ ការផ្លាស់ប្តូរវប្បធម៌ សុខាភិបាល និងអប់រំ រួមចំណែកបង្កើតទំនាក់ទំនងកាន់តែរឹងមាំថែមទៀត ឆ្ពោះទៅរកការអភិវឌ្ឍទៅវិញទៅមក។

លោក អ៊ូក សោភ័ណ អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា បានឲ្យដឹងថា ខេត្ត Tay Ninh និងកម្ពុជា មានចំណុចស្រដៀងគ្នាជាច្រើនទាក់ទងនឹងលក្ខខណ្ឌសម្រាប់ការអភិវឌ្ឍសេដ្ឋកិច្ចសង្គម។ ជំនួបជាមួយថ្នាក់ដឹកនាំគណៈកម្មាធិការប្រជាជនខេត្ត Tay Ninh គឺជាឱកាសដើម្បីស្វែងយល់អំពីគោលនយោបាយ ឱកាសវិនិយោគ និងកិច្ចសហប្រតិបត្តិការអភិវឌ្ឍន៍របស់ភាគីទាំងពីរ។ កម្ពុជាចាប់អារម្មណ៍យ៉ាងខ្លាំងចំពោះការតភ្ជាប់ហេដ្ឋារចនាសម្ព័ន្ធគមនាគមន៍រវាងច្រកទ្វារព្រំដែននៃបណ្តាខេត្តរបស់កម្ពុជា ជាមួយខេត្ត Tay Ninh និងទីក្រុងហូជីមិញ ដើម្បីជំរុញការតភ្ជាប់ពាណិជ្ជកម្មរវាងប្រទេសទាំងពីរ ទន្ទឹមនឹងនោះ ពង្រីកកាលានុវត្តភាពតភ្ជាប់រវាងតំបន់ទេសចរណ៍ជាតិភ្នំ Ba Den នៃខេត្ត Tay Ninh  និងប្រាសាទអង្គរវត្តនៃព្រះរាជាណាចក្រកម្ពុជា។

លោក អ៊ូក សោភ័ណ អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា (ខាងឆ្វេង) ផ្តល់វត្ថុអនុស្សាវរីយ៍ជូនថ្នាក់ដឹកនាំគណៈកម្មាធិការប្រជាជនខេត្ត Tay Ninh (រូបថត៖ vnanet.vn)

លោក អ៊ូក សោភ័ណ បានស្នើឱ្យគណៈកម្មាធិការប្រជាជនខេត្ត Tay Ninh បន្តជួយសម្រួលដល់ការទិញលក់កសិផលរបស់អង្គភាពអាជីវកម្មនៃភាគីទាំងពីរ; ទន្ទឹមនឹងនោះ គាំទ្រការតភ្ជាប់ ការវិនិយោគ ទេសចរណ៍ ពាណិជ្ជកម្ម ... រវាងវៀតណាម និងកម្ពុជា។ ក្រសួងការបរទេស និងសហប្រតិបត្តិការអន្តរជាតិកម្ពុជា ត្រៀមខ្លួនជាស្រេចសហប្រតិបត្តិការ និងផ្លាស់ប្តូរព័ត៌មាន ដើម្បីឲ្យភាគីទាំងពីរអាចជំនះការលំបាក រួមចំណែកពូនជ្រំ និងជំរុញទំនាក់ទំនងមិត្តភាព និងកិច្ចសហប្រតិបត្តិការរវាងវៀតណាម និងកម្ពុជាឱ្យកាន់តែស៊ីជម្រៅ និងអភិវឌ្ឍប្រកបដោយនិរន្តរភាព៕

បកប្រែដោយ Huyen Trang