ផ្ទះដ៏កក់ក្តៅនៅតំបន់ព្រំដែនសមុទ្រ Ben Tre
កប.អនឡាញ - ដើម្បីរួមចំណែកលើកកំពស់ជីវភាពរស់នៅរបស់ប្រជាជននៅតំបន់ព្រំដែនសមុទ្រ ក្នុងរយៈពេលប៉ុន្មានឆ្នាំកន្លងមក កងទ័ពការពារព្រំដែនខេត្ត Ben Tre ភាគខាងត្បូងវៀតណាម បានដាក់ពង្រាយចលនា និងទម្រង់ដ៏មានអត្ថន័យជាច្រើន នាំមកនូវលទ្ធផលជាក់ស្តែង រួមចំណែកកសាងតំបន់ព្រំដែនសមុទ្រឲ្យកាន់តែមានការអភិវឌ្ឍ និងរីកចម្រើន។
លោកវរសេនីយ៍ឯក Nguyen Van Lung អនុប្រធាននយោបាយនៃកងទ័ពការពារព្រំដែនខេត្ត Ben Tre បានឲ្យដឹងថា៖ “ក្នុងរយៈពេល ៥ ឆ្នាំកន្លងមក កងទ័ពការពារព្រំដែនខេត្តបានសម្របសម្រួលជាមួយមន្ទីរ ស្ថាប័ន អង្គភាព និងអាជ្ញាធរមូលដ្ឋានក្នុងតំបន់ព្រំដែនសមុទ្រ អនុវត្តបានល្អនូវគោលនយោបាយសន្តិសុខសង្គម ថែទាំជីវភាពរស់នៅរបស់គ្រួសារទទួលរបបពីរដ្ឋ និងគ្រួសារក្រីក្រ; ជាពិសេសបានកៀរគរធនធានជួយសាងសង់ផ្ទះចំនួន ១៥៧ ខ្នង ជួយប្រជាជនរក្សាលំនឹងជីវភាពរស់នៅ រួមចំណែកជាមួយមូលដ្ឋានលុបបំបាត់ភាពអត់ឃ្លាន និងកាត់បន្ថយភាពក្រីក្រ ក៏ដូចជាការកសាងជនបទថ្មីឲ្យបានល្អ”។
|
|
កងទ័ពការពារព្រំដែនខេត្ត Ben Tre ចូលរួមកសាងផ្ទះមហាសាមគ្គីនៅតំបន់ឈរជើង |
ជាពិសេស ជ្រោមជ្រែងចលនា “ពួតដៃគ្នាលុបបំបាត់ផ្ទះបណ្តោះអាសន្ន និងទ្រុឌទ្រោម” ចាប់ពីដើមឆ្នាំ២០២៤ មកទល់បច្ចុប្បន្ននេះ កងទ័ពការពារព្រំដែនខេត្តបានសម្របសម្រួលជាមួយគណៈកម្មាធិការរណសិរ្សមាតុភូមិវៀតណាមខេត្ត Ben Tre ធនាគារយោធា (MB Bank) និងអង្គភាពអាជីវកម្មក្នុង និងក្រៅខេត្ត រៀបចំពិធីប្រគល់ផ្ទះចំនួន ២៣ ខ្នងជូនប្រជាជន និងគ្រួសារយោធិនដែលជួបការលំបាក។ នេះគឺជាផ្នែកមួយក្នុងសកម្មភាពរំលឹកខួបលើកទី ៨០ នៃការបង្កើតកងទ័ពប្រជាជនវៀតណាម និងខួបលើកទី ៣៥ នៃទិវាការពារជាតិដោយប្រជាជនទាំងមូល; ខួបលើកទី ៦៥ នៃទិវាប្រពៃណីកងទ័ពការពារព្រំដែន និងខួបលើកទី ៣៥ នៃទិវាការពារព្រំដែនដោយប្រជាជនទាំងមូល ក្នុងគោលបំណងលើកកំពស់ជីវភាពរស់នៅរបស់ប្រជាជននៅតំបន់ព្រំដែនសមុទ្រនៃខេត្ត។
ទទួលស្វាគមន៍យើងខ្ញុំនៅក្នុងផ្ទះថ្មីដ៏ធំទូលាយដែលសាងសង់ដោយកងទ័ពការពារព្រំដែនខេត្ត និងអង្គភាពសំណង់ លោកស្រី Huynh Thi Sang (អាយុ ៧៦ ឆ្នាំ) នៅឃុំ Bao Thanh ស្រុក Ba Tri (ខេត្ត Ben Tre) បានចែករំលែកថា៖ “អាស្រ័យដោយការគាំទ្រ និងការពួតដៃរបស់សប្បុរសជន និងពូៗកងទ័ពការពារព្រំដែន មិនត្រឹមតែគ្រួសារខ្ញុំប៉ុណ្ណោះទេ ថែមទាំងគ្រួសារផ្សេងទៀតជាច្រើនមានផ្ទះរឹងមាំ ដែលនាំមកនូវក្តីរីករាយ ជួយឲ្យយើងខ្ញុំជម្នះពុះពារការលំបាក និងរក្សាលំនឹងជីវភាពរស់នៅទៀតផង។ មនោសញ្ចេតនារវាងកងទ័ព និងប្រជាជនមានភាពជិតស្និទ្ធជាប្រចាំ”។
|
|
តំណាងថ្នាក់ដឹកនាំកងទ័ពការពារព្រំដែនខេត្ត Ben Tre និងគណៈកម្មាធិការបក្សនៅមូលដ្ឋាន ប្រគល់ផ្ទះមហាសាមគ្គី ដល់ប្រជាជននៅឃុំ Thua Duc ស្រុក Binh Dai (ខេត្ត Ben Tre) នៅថ្ងៃទី ៩ ខែតុលា ឆ្នាំ ២០២៤ |
លោកស្រី Tran Thi Minh Chau អនុប្រធានឃុំ Tan Thuy ស្រុក Ba Tri បានឲ្យដឹងថា៖ “ក្នុងរយៈពេលកន្លងមក មូលដ្ឋានទទួលបានការគាំទ្រយ៉ាងសកម្មពីកម្លាំងកងទ័ពការពារព្រំដែន ជាពិសេសប៉ុស្តិ៍ការពារព្រំដែន Ham Luong ដែលឈរជើងនៅក្នុងតំបន់ ចូលរួមកសាងជនបទថ្មី ជួយសាងសង់ផ្ទះ និងកៀរគរថវិកាសម្រាប់ការងារសុខុមាលភាពសង្គម ដោយហេតុនោះ រួមចំណែកដល់ការសម្រេចលក្ខណៈវិនិច្ឆ័យជនបទថ្មីរបស់មូលដ្ឋាន”។
បើតាមមេបញ្ជាការកងទ័ពការពារព្រំដែនខេត្ត Ben Tre នាពេលខាងមុខ អង្គភាពនឹងបន្តសម្របសម្រួលជាមួយមន្ទីរ ស្ថាប័ន អង្គភាព និងអាជ្ញាធរមូលដ្ឋាននៅតំបន់ព្រំដែនសមុទ្រ ដើម្បីកៀរគរធនធានទាំងអស់ជួយឲ្យប្រជាពលរដ្ឋក្រីក្រជំនះពុះពារការលំបាក និងគ្រួសារទទួលរបបពីរដ្ឋដែលជួបការលំបាកខាងលំនៅដ្ឋាន រួមចំណែកដោះស្រាយគោលនយោបាយសន្តិសុខសង្គមក្នុងមូលដ្ឋានឲ្យបានល្អ; ជំរុញសកម្មភាពឆ្ពោះទៅព្រំដែនសមុទ្រ អនុវត្តបានល្អនូវចលនា “ចលនាមហាជនយ៉ាងប៊ិនប្រសប់” “អង្គភាពធ្វើចលនាមហាជនល្អ” ជាប់ពាក់ព័ន្ធនឹងការអនុវត្តចលនា “កងទ័ពការពារព្រំដែនរួមកម្លាំងកសាងជនបទថ្មី” “កងទ័ពការពារព្រំដែនពួតដៃគ្នាដើម្បីជនក្រីក្រ”។ល។
តាមរយៈសកម្មភាពមនុស្សធម៌ និងអត្ថន័យរបស់កងទ័ពការពារព្រំដែនខេត្ត Ben Tre មិនត្រឹមតែបង្ហាញពីស្មារតីសាមគ្គីភាព របស់ប្រទេសជាតិប៉ុណ្ណោះទេ ថែមទាំងបង្ហាញពីការយកចិត្តទុកដាក់ និងការគាំទ្ររបស់អាជ្ញាធរគ្រប់លំដាប់ថ្នាក់ និងសហគមន៍ធុរកិច្ចចំពោះប្រជាជននៅតំបន់ព្រំដែនសមុទ្រទៀតផង៕
បកប្រែដោយ Huyen Trang