កិច្ចសហប្រតិបត្តិការការពារជាតិគឺជាសសរស្តម្ភដ៏សំខាន់មួយនៃទំនាក់ទំនងវៀតណាម-រុស្ស៊ី

លោកនាយឧត្តមសេនីយ៍ Nguyen Tan Cuong ទទួលជួបលោក Aleksandr Kurenkov រដ្ឋមន្ត្រីក្រសួងស្ថានភាពអាសន្ននៃសហព័ន្ធរុស្ស៊ី

យោងតាមលោកនាយឧត្តមសេនីយ៍ Nguyen Tan Cuong កិច្ចសហប្រតិបត្តិការការពារជាតិទ្វេភាគីបន្តត្រូវបានអនុវត្តប្រកបដោយប្រសិទ្ធភាពក្នុងស្មារតីនៃការជឿទុកចិត្ត ជាក់ស្តែង និងភាពទូលំទូលាយ ដែលសក្តិសមជាសសរស្តម្ភដ៏សំខាន់ក្នុងទំនាក់ទំនងវៀតណាម-រុស្ស៊ីទាំងមូល ដោយសម្រេចបានលទ្ធផលល្អក្នុងវិស័យជាច្រើន។ លោកនាយឧត្តមសេនីយ៍ Nguyen Tan Cuong បានវាយតម្លៃខ្ពស់ចំពោះតួនាទី និងកិត្យានុភាពដ៏សំខាន់របស់ក្រសួងស្ថានភាពអាសន្ននៃសហព័ន្ធរុស្ស៊ី រួមចំណែកយ៉ាងធំធេងក្នុងការធានាសន្តិសុខជាតិ សុវត្ថិភាពសម្រាប់ប្រជាជន និងស្ថិរភាពសង្គមនៅសហព័ន្ធរុស្ស៊ី។

លោកនាយឧត្តមសេនីយ៍ Nguyen Tan Cuong ផ្តល់វត្ថុអនុស្សាវរីយ៍ជូនលោក Aleksandr Kurenkov រដ្ឋមន្ត្រីក្រសួងស្ថានភាពអាសន្ននៃសហព័ន្ធរុស្ស៊ី

លោកនាយឧត្តមសេនីយ៍ Nguyen Tan Cuong បានសម្តែងនូវក្តីសង្ឃឹមថា នាពេលខាងមុខ ភាគីទាំងពីរនឹងបន្តជំរុញកិច្ចសហប្រតិបត្តិការ ដោយផ្តោតលើការផ្លាស់ប្តូរគណៈប្រតិភូគ្រប់លំដាប់ថ្នាក់ ការបណ្តុះបណ្តាល ការចែករំលែក និងផ្លាស់ប្តូរបទពិសោធន៍លើការការពារជនស៊ីវិល ការបង្ការ ការឆ្លើយតប និងការគ្រប់គ្រងគ្រាអាសន្ន។ល។ ក្នុងឱកាសនេះ លោកនាយឧត្តមសេនីយ៍ Nguyen Tan Cuong បានអញ្ជើញគណៈប្រតិភូជាន់ខ្ពស់ និងសហគ្រាសឧស្សាហកម្មការពារជាតិនៃសហព័ន្ធរុស្ស៊ី ឲ្យចូលរួមក្នុងសកម្មភាពនានានៅក្នុងពិព័រណ៍ការពារជាតិអន្តរជាតិវៀតណាម ឆ្នាំ២០២៦។

លោកនាយឧត្តមសេនីយ៍ Nguyen Tan Cuong និងលោក Aleksandr Kurenkov រដ្ឋមន្ត្រីក្រសួងស្ថានភាពអាសន្ននៃសហព័ន្ធរុស្ស៊ី រួមជាមួយប្រតិភូនៅក្នុងជំនួប

រីឯលោក Aleksandr Kurenkov រដ្ឋមន្ត្រី បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការវិជ្ជមានរវាងសហព័ន្ធរុស្ស៊ី និងវៀតណាម លើការការពារជនស៊ីវិល ការបង្ការ ការឆ្លើយតប និងការគ្រប់គ្រងគ្រាអាសន្ន និងការស្វែងរក និងជួយសង្គ្រោះ។ លោក Aleksandr Kurenkov រដ្ឋមន្ត្រី បានបញ្ជាក់ថា ប្រទេសទាំងពីរនៅមានសក្តានុពលជាច្រើនសម្រាប់កិច្ចសហប្រតិបត្តិការលើវិស័យនេះ ព្រមទាំងឯកភាពជាមួយនឹងខ្លឹមសារនៃកិច្ចសហប្រតិបត្តិការដែលបានលើកឡើងដោយក្រសួងការពារប្រទេសវៀតណាម។ លោក Aleksandr Kurenkov រដ្ឋមន្ត្រី សង្ឃឹមថា នាពេលខាងមុខ ភាគីទាំងពីរនឹងបន្តសម្របសម្រួលពង្រីកកិច្ចសហប្រតិបត្តិការដោយផ្អែកលើតម្រូវការ និងផលប្រយោជន៍របស់ភាគីនីមួយៗ ដោយផ្តោតលើការចែករំលែកបទពិសោធន៍ក្នុងការដាក់ពង្រាយកងកម្លាំងពេទ្យយោធាក្នុងប្រតិបត្តិការជួយសង្គ្រោះ ដោយហេតុនោះរួមចំណែកជំរុញទំនាក់ទំនងទ្វេភាគីអភិវឌ្ឍកាន់តែប្រសើរឡើង៕

បកប្រែដោយ Huyen Trang