លោកឧត្តមសេនីយ៍ឯក Nguyen Van Hien ស្វាគមន៍ និងអបអរសាទររដ្ឋមន្ត្រីក្រសួងការពារជាតិឡាវ

តាងនាមគណៈកម្មាធិការបក្សយោធាមជ្ឈិម ក្រសួងការពារប្រទេសវៀតណាម និងលោកនាយឧត្តមសេនីយ៍ Phan Van Giang សមាជិកការិយាល័យនយោបាយ អនុលេខានៃគណៈកម្មាធិការបក្សយោធាមជ្ឈិម រដ្ឋមន្ត្រីក្រសួងការពារប្រទេសវៀតណាម លោកឧត្តមសេនីយ៍ឯក Nguyen Van Hien សូមគោរពជូនពរដល់លោកឧត្តមសេនីយ៍ឯក Khamliang Outhakaysone និងគណៈកម្មាធិការបក្សនៃក្រសួងការពារជាតិ កម្មាភិបាល និងយុទ្ធជននៃកងទ័ពប្រជាជនឡាវ ក្នុងឱកាសនៃការបញ្ចប់ដោយជោគជ័យនៃមហាសន្និបាតតំណាងទូទាំងប្រទេសលើកទី១២ របស់បក្សប្រជាជនបដិវត្តន៍ឡាវ អាណត្តិ២០២៦-២០៣០ និងខួបលើកទី៧៧ នៃការបង្កើតកងទ័ពប្រជាជនឡាវ (ថ្ងៃទី២០ ខែមករា ឆ្នាំ១៩៤៩ / ថ្ងៃទី២០ ខែមករា ឆ្នាំ២០២៦)។

លោកឧត្តមសេនីយ៍ឯក Nguyen Van Hien និងលោកឧត្តមសេនីយ៍ឯក Khamliang Outhakaysone

លោកឧត្តមសេនីយ៍ឯក Nguyen Van Hien បានសង្កត់ធ្ងន់ថា បក្ស រដ្ឋ ប្រជាជន និងកងទ័ពប្រជាជនវៀតណាម មានសេចក្តីសោមនស្សរីករាយយ៉ាងក្រៃលែងចំពោះជោគជ័យនៃមហាសន្និបាតតំណាងទូទាំងប្រទេសលើកទី១២ របស់បក្សប្រជាជនបដិវត្តន៍ឡាវ ក៏ដូចជាសមិទ្ធផលដ៏អស្ចារ្យ ទូលំទូលាយ និងមានសារៈសំខាន់ជាប្រវត្តិសាស្ត្រ ដែលបក្ស រដ្ឋ ប្រជាជន និងកងទ័ពប្រជាជនឡាវ សម្រេចបានក្នុងការអនុវត្តមាគ៌ាផ្លាស់ថ្មី ក្រោមការដឹកនាំដ៏ឈ្លាសវៃរបស់បក្សប្រជាជនបដិវត្តន៍ឡាវ ព្រមទាំងជឿជាក់យ៉ាងមុតមាំថា ក្រោមពន្លឺនៃសេចក្តីសម្រេចនៃមហាសន្និបាតលើកទី១២ ប្រទេសឡាវនឹងកាន់តែអភិវឌ្ឍ និងរីកចម្រើន ដោយរួមចំណែកជាវិជ្ជមានដល់សន្តិភាព កិច្ចសហប្រតិបត្តិការ និងការអភិវឌ្ឍដ៏រុងរឿងនៅក្នុងតំបន់ និងនៅលើពិភពលោក។

លោកឧត្តមសេនីយ៍ឯក Nguyen Van Hien បានអបអរសាទរចំពោះលោកឧត្តមសេនីយ៍ឯក Khamliang Outhakaysone ដែលត្រូវបានបោះឆ្នោតជ្រើសតាំងជាសមាជិកនៃការិយាល័យនយោបាយនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវ អាណត្តិទី១២ ព្រមទាំងជឿជាក់ថា ក្នុងតួនាទីដ៏សំខាន់របស់ខ្លួន លោករដ្ឋមន្ត្រីនឹងបន្តដឹកនាំការកសាងក្រសួងការពារជាតិឡាវ និងកងទ័ពប្រជាជនឡាវ ឱ្យកាន់តែរឹងមាំ ដោយរួមចំណែកដល់ការកសាងប្រទេសឡាវ ឱ្យកាន់តែរីកចម្រើន និងវិបុលភាពថែមទៀត។

លោកឧត្តមសេនីយ៍ឯក Nguyen Van Hien តាងនាមគណៈកម្មាធិការបក្សយោធាមជ្ឈិម ក្រសួងការពារប្រទេសវៀតណាម ជូនផ្កាអបអរសាទរដល់លោកឧត្តមសេនីយ៍ឯក Khamliang Outhakaysone

នៅក្នុងកិច្ចប្រជុំ លោកឧត្តមសេនីយ៍ឯក Nguyen Van Hien បានវាយតម្លៃថានៅក្នុងឆ្នាំ២០២៥ មានព្រឹត្តិការណ៍សំខាន់ៗជាច្រើនសម្រាប់ប្រទេសទាំងពីរ ក្នុងនោះ កិច្ចសហប្រតិបត្តិការការពារជាតិវៀតណាម-ឡាវ បន្តត្រូវបានអនុវត្តយ៉ាងទូលំទូលាយ ស៊ីជម្រៅ និងជាក់ស្តែងដោយភាគីទាំងពីរ។ កងទ័ពនៃប្រទេសទាំងពីរបន្តជាកម្លាំងនាំមុខគេក្នុងការអនុវត្តទិសដៅដែលបានឯកភាពគ្នាដោយថ្នាក់ដឹកនាំជាន់ខ្ពស់នៃប្រទេសទាំងពីរ រួមចំណែកយ៉ាងសំខាន់ក្នុងការថែរក្សា និងពង្រឹងបរិយាកាសសន្តិភាព និងស្ថិរភាពនៃប្រទេសនីមួយៗសម្រាប់ការអភិវឌ្ឍ និងជាកម្លាំងស្មោះត្រង់ដាច់ខាតរបស់បក្ស មាតុភូមិ និងប្រជាជន។

លោកឧត្តមសេនីយ៍ឯក Nguyen Van Hien បានសង្ឃឹមថា នាពេលខាងមុខ ភាគីទាំងពីរនឹងបន្តអនុវត្តប្រកបដោយប្រសិទ្ធភាពនូវខ្លឹមសារនៃពិធីសារសម្រាប់ដំណាក់កាល ២០២៥-២០២៩ និងផែនការសហប្រតិបត្តិការសម្រាប់ឆ្នាំ២០២៦ ដោយផ្តោតលើ៖ ការផ្លាស់ប្តូរគណៈប្រតិភូគ្រប់លំដាប់ថ្នាក់ ការរក្សាយន្តការសន្ទនា និងពិគ្រោះយោបល់ប្រចាំឆ្នាំ សកម្មភាពជួបប្រាស្រ័យ និងការពង្រឹងទំនាក់ទំនងនៃការជឿទុកចិត្ត សាមគ្គីភាព និងភាពជិតស្និទ្ធរវាងកងទ័ពនៃប្រទេសទាំងពីរ វៀតណាម-ឡាវ។ល៕

បកប្រែដោយ Huyen Trang