កិច្ចសហប្រតិបត្តិការការពារជាតិគឺជាសសរស្តម្ភដ៏សំខាន់មួយ ក្នុងទំនាក់ទំនងវៀតណាម-រុស្ស៊ី

នៅក្នុងជំនួប ភាគីទាំងពីរបានពិភាក្សាអំពីស្ថានភាពពិភពលោក និងតំបន់ និងបញ្ហាដែលភាគីទាំងពីរមានការយកចិត្តទុកដាក់ដូចគ្នា។ លោកនាយឧត្តមសេនីយ៍ Phan Van Giang បានបញ្ជាក់ថា អាស៊ានដើរតួនាទីកាន់តែសំខាន់ក្នុងការបង្កើត និងរក្សានិម្មាបនកម្មសន្តិសុខក្នុងតំបន់ ជំរុញកិច្ចសហប្រតិបត្តិការជាក់ស្តែងក្នុងចំណោមប្រទេសជាសមាជិក ក៏ដូចជារវាងអាស៊ាន និងដៃគូនានា រួមទាំងសហព័ន្ធរុស្ស៊ីផងដែរ។

លោកនាយឧត្តមសេនីយ៍ Phan Van Giang រដ្ឋមន្ត្រី និងលោកនាយឧត្តមសេនីយ៍ Sergey Shoigu លេខាធិការក្រុមប្រឹក្សាសន្តិសុខនៃសហព័ន្ធរុស្ស៊ី

ស្តីពីបញ្ហាសមុទ្រខាងកើត លោកនាយឧត្តមសេនីយ៍ Phan Van Giang បានមានប្រសាសន៍ថា វៀតណាមមានការតាំងចិត្ត និងប្រកាន់ខ្ជាប់ខ្ជួននូវគោលការណ៍ដោះស្រាយជម្លោះ និងការខ្វែងគំនិតដោយសន្តិវិធី ដោយផ្អែកលើការគោរពឯករាជ្យភាព អធិបតេយ្យភាព និងផលប្រយោជន៍ស្របច្បាប់របស់ប្រទេសទាំងអស់ ស្របតាមច្បាប់អន្តរជាតិ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២។ វៀតណាមសន្យាអនុវត្តសេចក្តីប្រកាសស្តីពីការប្រតិបត្តិរបស់ភាគីនានានៅសមុទ្រខាងត្បូង (DOC) ប្រកបដោយប្រសិទ្ធភាព និងពេញលេញ និងបញ្ចប់ការចរចា និងចុះហត្ថលេខាលើក្រមប្រតិបត្តិនៅសមុទ្រខាងកើត (COC) ប្រកបដោយប្រសិទ្ធភាព ស្របតាមច្បាប់ ដោយរួមចំណែកដល់ការកសាងសមុទ្រខាងកើតទៅជាតំបន់សន្តិភាព កិច្ចសហប្រតិបត្តិការ និងអភិវឌ្ឍន៍។

លោកនាយឧត្តមសេនីយ៍ Phan Van Giang បានសម្តែងនូវសេចក្តីរីករាយដែលឃើញថា ទំនាក់ទំនងការពារជាតិរវាងភាគីទាំងពីរក្នុងរយៈពេលកន្លងមក បានបន្តត្រូវបានអនុវត្តក្នុងស្មារតីនៃការជឿទុកចិត្ត ការអនុវត្តជាក់ស្តែង ប្រសិទ្ធភាព និងទូលំទូលាយ ដែលសក្តិសមជាសសរស្តម្ភដ៏សំខាន់មួយក្នុងទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងសហព័ន្ធរុស្ស៊ី។

លោកនាយឧត្តមសេនីយ៍ Phan Van Giang រដ្ឋមន្ត្រី និងលោកនាយឧត្តមសេនីយ៍ Sergey Shoigu ទស្សនាការតាំងពិព័រណ៍រូបថតអំពីទំនាក់ទំនងសហប្រតិបត្តិការវៀតណាម-រុស្ស៊ី

លោកនាយឧត្តមសេនីយ៍ Phan Van Giang បានស្នើថា នាពេលខាងមុខ ក្រសួងការពារជាតិនៃប្រទេសទាំងពីរ នឹងបន្តសម្របសម្រួលគ្នាយ៉ាងជិតស្និទ្ធ ដើម្បីអនុវត្តកិច្ចសហប្រតិបត្តិការប្រកបដោយប្រសិទ្ធភាព ក្នុងវិស័យដែលភាគីទាំងពីរមានការយកចិត្តទុកដាក់ដូចគ្នា ដូចជា៖ ការបណ្តុះបណ្តាល ការផ្លាស់ប្តូរបទពិសោធន៍ និងការស្រាវជ្រាវវិទ្យាសាស្ត្រ ក្នុងក្របខ័ណ្ឌនៃមជ្ឈមណ្ឌលត្រូពិចវៀតណាម-រុស្ស៊ី។ល។

លោកនាយឧត្តមសេនីយ៍ Sergey Shoigu បានសង្កត់ធ្ងន់លើទំនាក់ទំនងមិត្តភាពជាប្រពៃណី ស្មោះត្រង់ និងជិតស្និទ្ធរវាងវៀតណាម និងរុស្ស៊ី ព្រមទាំងថ្លែងអំណរគុណចំពោះក្រសួងការពារប្រទេសវៀតណាម ដែលបានចាត់បញ្ជូនយោធិនដើម្បីចូលរួមដង្ហែក្បួនព្យុហយាត្រានៅទីលានក្រហម ក្នុងឱកាសរំលឹកខួបលើកទី ៨០ នៃទិវាជ័យជំនះក្នុងសង្គ្រាមការពារជាតិដ៏មហិមា (ថ្ងៃទី ៩ ខែឧសភា ឆ្នាំ ១៩៤៥ / ថ្ងៃទី ៩ ខែឧសភា ឆ្នាំ ២០២៥)។ លោកនាយឧត្តមសេនីយ៍ Sergey Shoigu បានបញ្ជាក់ថា សហព័ន្ធរុស្ស៊ី ផ្តល់អាទិភាពដល់ការពង្រឹងទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម ជាពិសេសក្នុងវិស័យសហប្រតិបត្តិការការពារជាតិ។ លោកនាយឧត្តមសេនីយ៍ Sergey Shoigu សង្ឃឹមថា នាពេលខាងមុខ ភាគីទាំងពីរនឹងបន្តសម្របសម្រួលយ៉ាងជិតស្និទ្ធ ដើម្បីពង្រឹង និងជំរុញកិច្ចសហប្រតិបត្តិការលើវិស័យដូចជា៖ ការបណ្តុះបណ្តាល កិច្ចសហប្រតិបត្តិការរវាងអង្គភាពទ័ពនានា ឧស្សាហកម្មការពារជាតិ ការផ្លាស់ប្តូរបទពិសោធន៍ក្នុងវិស័យដែលភាគីទាំងពីរមានការយកចិត្តទុកដាក់ដូចគ្នា និងកិច្ចសហប្រតិបត្តិការក្នុងក្របខ័ណ្ឌនៃមជ្ឈមណ្ឌលត្រូពិចវៀតណាម-រុស្ស៊ី៕

បកប្រែដោយ Huyen Trang