នាវាលេខ ០១៥-Tran Hung Dao ចូលចតនៅកំពង់ផែ Kure ចាប់ផ្តើមដំណើរទស្សនកិច្ចនៅប្រទេសជប៉ុន

គណៈប្រតិភូ នាយទាហាន និងនាវិកនៃនាវាលេខ ០១៥ គោរពកំពង់ផែ

មានប្រសាសន៍នៅក្នុងពិធីស្វាគមន៍ លោកវរនាវីឯក Yanagihara តំណាងមូលដ្ឋានកងទ័ពជើងទឹក Kure ដែលជាមូលដ្ឋានធំបំផុតមួយរបស់កងកម្លាំងស្វ័យការពារដែនសមុទ្រជប៉ុនបានស្វាគមន៍គណៈប្រតិភូ និងនាវាលេខ ០១៥ ដែលមកទស្សនកិច្ចនៅប្រទេសជប៉ុន ព្រមទាំងសម្តែងនូវក្តីសង្ឃឹមថា សកម្មភាពផ្លាស់ប្តូរ និងជួបជុំក្នុងក្របខ័ណ្ឌនៃដំណើរទស្សនកិច្ចនេះនឹងរួមចំណែកដល់ការអភិវឌ្ឍបន្ថែមទៀតនូវទំនាក់ទំនងសហប្រតិបត្តិការមិត្តភាពរវាងកងទ័ពជើងទឹកនៃប្រទេសទាំងពីរ និងទំនាក់ទំនងវៀតណាម-ជប៉ុន។

តំណាងមូលដ្ឋានកងទ័ពជើងទឹក Kure ជូនផ្កាដើម្បីស្វាគមន៍ប្រធានគណៈប្រតិភូ និងប្រធាននាវាលេខ ០១៥

ភាគីទាំងពីរថតរូបទុកជាអនុស្សាវរីយ៍នៅកំពង់ផែ

លោកវរនាវីឯក Nguyen Vinh Nam បានសម្តែងនូវកិត្តិយសដែលបានដឹកនាំគណៈប្រតិភូកងទ័ពជើងទឹកវៀតណាម និងនាវាលេខ ០១៥ ទៅទស្សនកិច្ចទីក្រុង Kure ដ៏ស្រស់ស្អាត។ លោកបានមានប្រសាសន៍ថា ដំណើរទស្សនកិច្ចនេះបានជួបប្រទះនឹងការលំបាកជាច្រើនដោយសារតែការធ្វើដំណើរដ៏វែងឆ្ងាយនៅលើសមុទ្រ ក្នុងស្ថានភាពអាកាសធាតុដ៏អាក្រក់ ប៉ុន្តែនាយទាហាន និងនាវិកនៃនាវាលេខ ០១៥ បានបង្ហាញពីកិច្ចខិតខំប្រឹងប្រែង និងការតាំងចិត្តរបស់ពួកគេ ហើយបានមកដល់កំពង់ផែ Kure ដោយសុវត្ថិភាព និងទាន់ពេលវេលាកំណត់។ លោកវរនាវីឯក Nguyen Vinh Nam ជឿជាក់ថា ដំណើរទស្សនកិច្ចនេះនឹងជួយនាយទាហាន និងនាវិកនៃកងទ័ពជើងទឹកទាំងពីរឲ្យយល់កាន់តែច្បាស់អំពីប្រទេស ប្រជាជន និងវប្បធម៌របស់គ្នាទៅវិញទៅមក និងបម្រើជាស្ពានតភ្ជាប់ទំនាក់ទំនងសហប្រតិបត្តិការមិត្តភាពដ៏ល្អរវាងវៀតណាម និងជប៉ុន កងកម្លាំងប្រដាប់អាវុធ និងកងទ័ពជើងទឹកនៃប្រទេសទាំងពីរ។

លោកវរនាវីឯក Yanagihara និងនាយទាហានកងទ័ពជើងទឹកជប៉ុន ទៅទស្សនានាវាលេខ ០១៥

នាវាលេខ ០១៥ ចតនៅកំពង់ផែ Kure

នេះជាលើកទីពីរហើយដែលនាវាលេខ ០១៥-Tran Hung Dao មកបំពេញទស្សនកិច្ចនៅប្រទេសជប៉ុន និងជាលើកដំបូងមកទស្សនាមូលដ្ឋានកងទ័ពជើងទឹក Kure។ បន្ទាប់ពីពិធីស្វាគមន៍ លោកវរនាវីឯក Yanagihara និងនាយទាហាននៃកងទ័ពជើងទឹកជប៉ុនបានទៅទស្សនានាវាលេខ ០១៥៕

បកប្រែដោយ Huyen Trang