កិច្ចសន្ទនាគោលនយោបាយការពារជាតិវៀតណាម-ហ្វីលីពីន លើកទី៧

លោកឧត្តមសេនីយ៍ឯក Hoang Xuan Chien​ មានប្រសាសន៍​ក្នុង​កិច្ចសន្ទនា

លោកឧត្តមសេនីយ៍ឯក Hoang Xuan Chien បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការដ៏ទូលំទូលាយ និងជាក់ស្តែងរវាងស្ថាប័ន និងអង្គភាពនានានៃក្រសួងការពារជាតិទាំងពីរ ចាប់តាំងពីកិច្ចសន្ទនាគោលនយោបាយការពារជាតិវៀតណាម-ហ្វីលីពីនលើកទី៦ (ខែកក្កដា ឆ្នាំ២០២៤)។ លោកឧត្តមសេនីយ៍ឯក Hoang Xuan Chien បានវាយតម្លៃខ្ពស់ចំពោះការរួមចំណែកដ៏សំខាន់របស់ប្រទេសហ្វីលីពីនក្នុងក្របខ័ណ្ឌនៃកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំរដ្ឋមន្ត្រីការពារជាតិអាស៊ានបូក (ADMM+)។ លោកបានបញ្ជាក់ថា វៀតណាមប្តេជ្ញាបន្តចូលរួមយ៉ាងសកម្ម និងមានការទទួលខុសត្រូវក្នុងកិច្ចខិតខំប្រឹងប្រែងរួមគ្នារបស់ ADMM និង ADMM+ ដើម្បីសន្តិភាព និងស្ថិរភាពនៅក្នុងតំបន់ ហើយ​ត្រៀមខ្លួនជាស្រេចសហការការជាមួយហ្វីលីពីន និងប្រទេសដទៃទៀត ដើម្បីដោះស្រាយបញ្ហានិងការខ្វែងគំនិតគ្នាក្នុងតំបន់ឲ្យ​ស្របតាមច្បាប់អន្តរជាតិ គោលការណ៍របស់​អាស៊ាន និងធានាបាននូវភាពសុខដុមរមនារវាងផលប្រយោជន៍ស្របច្បាប់របស់គ្រប់ភាគីពាក់ព័ន្ធ។

លោក Irineo C. Espino មានប្រសាសន៍​ក្នុង​កិច្ចសន្ទនា

ចំណែក លោក Irineo C. Espino បានសង្កត់ធ្ងន់ថា ក្នុងរយៈពេលប៉ុន្មានកន្លងមកនេះ កិច្ចសហប្រតិបត្តិការទ្វេភាគីកាន់តែជិតស្និទ្ធគ្នាលើគ្រប់វិស័យ រួមទាំងវិស័យការពារជាតិផងដែរ។ លោកបន្តថា ក្នុងឱកាសឆ្ពោះទៅរកខួបលើកទី ៥០ នៃការបង្កើតទំនាក់ទំនងការទូតរវាងប្រទេសទាំងពីរនៅឆ្នាំ ២០២៦ នោះ ហ្វីលីពីនចង់ជម្រុញកិច្ចសហប្រតិបត្តិការជាមួយវៀតណាមបន្ថែមទៀត។ លោក Irineo C. Espino បានវាយតម្លៃខ្ពស់ចំពោះអត្ថន័យនៃកិច្ចសន្ទនាគោលនយោបាយការពារជាតិវៀតណាម-ហ្វីលីពីន លើកទី ៧ ក៏ដូចជាតួនាទី និងការរួមចំណែករបស់វៀតណាមក្នុងក្របខ័ណ្ឌនៃ ADMM និង ADMM+។

ទិដ្ឋភាពនៃកិច្ចសន្ទនា

នៅក្នុងកិច្ចសន្ទនា លោកឧត្តមសេនីយ៍ឯក Hoang Xuan Chien បានស្នើថា នាពេលខាងមុខ ភាគីទាំងពីរនឹងបន្តពង្រឹងកិច្ចសហប្រតិបត្តិការដ៏ជឿទុកចិត្ត ទូលំទូលាយ និងជាក់ស្តែង ដោយផ្តោតលើ៖ ការបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ការលើកកម្ពស់ប្រសិទ្ធភាពនៃយន្តការសហប្រតិបត្តិការដែលមានស្រាប់ ការលើកកម្ពស់កិច្ចសហប្រតិបត្តិការនិងការផ្លាស់ប្តូររវាងកងទ័ពជើងទឹក កងទ័ពជើងអាកាស និងកងឆ្មាំសមុទ្រ/កងកម្លាំងការពារឆ្នេរសមុទ្រ ក្នុងឱកាសដែលប្រទេសទាំងពីរប្រារព្ធខួបលើកទី ៥០ នៃការបង្កើតទំនាក់ទំនងការទូត (១៩៧៦-២០២៦)។ ទន្ទឹមនឹងនោះ តាមរយៈការរក្សាបណ្តាញសហប្រតិបត្តិការជាប្រចាំដើម្បីធ្វើបច្ចុប្បន្នភាពស្ថានភាព និង​សម្របសម្រួល​ដោះស្រាយឧប្បត្តិហេតុដែលកើតឡើងនៅសមុទ្រប្រកបដោយប្រសិទ្ធភាព និងចាត់វិធានការសមស្របចំពោះអ្នកនេសាទដែលរំលោភលើដែនសមុទ្ររបស់គ្នាទៅវិញទៅមក បន្ត​រក្សាកិច្ចសហប្រតិបត្តិការប្រកបដោយប្រសិទ្ធភាពក្នុងការបណ្តុះបណ្តាលធនធានមនុស្ស ​និង​​សិក្សាពីលទ្ធភាពនៃការពង្រីកកិច្ចសហប្រតិបត្តិការក្នុងវិស័យមានសក្តានុពលមួយចំនួនដែលភាគីទាំងពីរមានឧត្តមភាព និងតម្រូវការដូចជា៖ ឧស្សាហកម្មការពារជាតិ ភស្តុភារ វេជ្ជសាស្ត្រយោធា សន្តិសុខសមុទ្រ ការជួយសង្គ្រោះ សន្តិសុខតាមអ៊ីនធឺណិត បន្ត​ពិគ្រោះយោបល់ និងគាំទ្រគ្នាទៅវិញទៅមកយ៉ាងសកម្មក្នុងក្របខ័ណ្ឌនៃកិច្ចសហប្រតិបត្តិការយោធា ការពារជាតិអាស៊ាន...។

លោកឧត្តមសេនីយ៍ឯក Hoang Xuan Chien និងលោក Irineo C. Espino ចុះហត្ថលេខាលើកំណត់ហេតុនៃកិច្ច​សន្ទនា

លោកឧត្តមសេនីយ៍ឯក Hoang Xuan Chien និងលោក Irineo C. Espino​ អញ្ជើញជាសាក្សីនៃការចុះហត្ថលេខាលើលក្ខខណ្ឌយោង (TOR) ស្តីពីការបង្កើនកិច្ចសហប្រតិបត្តិការក្នុងវិស័យពេទ្យយោធា

ភាគីទាំងពីរក៏បានពិភាក្សាអំពីស្ថានភាពពិភពលោក និងតំបន់ បញ្ហាដែលមានការយកចិត្តទុកដាក់ដូចគ្នា និងចែករំលែកអំពីតួនាទីដ៏សំខាន់របស់អាស៊ានក្នុងការបង្កើត និងរក្សារចនាសម្ព័ន្ធសន្តិសុខក្នុងតំបន់ ដោយលើកកម្ពស់កិច្ចសហប្រតិបត្តិការជាក់ស្តែងរវាងប្រទេសជាសមាជិក ក៏ដូចជារវាងអាស៊ាន និងដៃគូ​។ ភាគីទាំងពីរបានសង្កត់ធ្ងន់ថា វៀតណាម និងហ្វីលីពីនមានផលប្រយោជន៍ជាយុទ្ធសាស្ត្រក្នុងការរក្សាសន្តិភាព សន្តិសុខ និងសុវត្ថិភាព នៃការធ្វើនាវាចរណ៍ និងអាកាសចរណ៍នៅសមុទ្រខាងកើត និងចង់បន្តសម្របសម្រួលដើម្បីលើកកម្ពស់ជំហររបស់អាស៊ានក្នុងការដោះស្រាយការខ្វែងគំនិតទាំងអស់នៅសមុទ្រខាងកើតដោយសន្តិវិធី ស្របតាមច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ១៩៨២ និង​អនុវត្តប្រកបដោយប្រសិទ្ធភាព និងពេញលេញនូវសេចក្តីប្រកាសស្តីពីការប្រតិបត្តិរបស់ភាគីនានានៅសមុទ្រខាងកើត (DOC) ហើយនិងបញ្ចប់ការចរចាក្នុងពេលឆាប់ៗនេះ និងចុះហត្ថលេខាលើក្រមប្រតិបត្តិនៅសមុទ្រខាងកើត (COC) ប្រកបដោយប្រសិទ្ធភាព ស្របតាមច្បាប់អន្តរជាតិ។

នៅចុងបញ្ចប់នៃកិច្ច​សន្ទនា លោកឧត្តមសេនីយ៍ឯក Hoang Xuan Chien និងលោក Irineo C. Espino បានចុះហត្ថលេខាលើកំណត់ហេតុនៃកិច្ច​សន្ទនា និងអញ្ជើញជាសាក្សីនៃការចុះហត្ថលេខាលើលក្ខខណ្ឌយោង (TOR) ស្តីពីការបង្កើនកិច្ចសហប្រតិបត្តិការក្នុងវិស័យពេទ្យយោធា៕

បកប្រែដោយ Duy Hoan