លោកនាយឧត្តមសេនីយ៍ Phan Van Giang ទទួលជួបជាមួយអនុរដ្ឋមន្ត្រីក្រសួងការពារជាតិហ្វីលីពីន

លោកនាយឧត្តមសេនីយ៍ Phan Van Giang ទទួលជួបជាមួយអនុរដ្ឋមន្ត្រីក្រសួងការពារជាតិហ្វីលីពីន

លោកនាយឧត្តមសេនីយ៍ Phan Van Giang បានចែករំលែកជាមួយរដ្ឋាភិបាល ប្រជាជន និងកងកម្លាំងប្រដាប់អាវុធហ្វីលីពីន ចំពោះការខាតបង់យ៉ាងធ្ងន់ធ្ងរអំពី​មនុស្ស និងទ្រព្យសម្បត្តិនៅក្នុងគ្រោះរញ្ជួយដី និងទឹកជំនន់ថ្មីៗនេះ ហើយ​ជឿជាក់ថា ក្រោមការដឹកនាំរបស់រដ្ឋាភិបាល និងការចូលរួមយ៉ាងសកម្មរបស់កងកម្លាំងប្រដាប់អាវុធហ្វីលីពីន ជីវភាពរស់នៅរបស់ប្រជាជននៅតំបន់ដែលរងផលប៉ះពាល់នឹងមានស្ថិរភាពក្នុងពេលឆាប់ៗនេះ។

លោកនាយឧត្តមសេនីយ៍ Phan Van Giang បានសង្កត់ធ្ងន់ថា វៀតណាម និងហ្វីលីពីន គឺជាប្រទេសជិតខាងពីរដែលមានព្រំដែនសមុទ្រជាប់គ្នា និងចែករំលែកភាពស្រដៀងគ្នាជាច្រើនអំពីផលប្រយោជន៍ជាយុទ្ធសាស្ត្រ។ លោកនាយឧត្តមសេនីយ៍ Phan Van Giang បន្តថា ក្នុងរយៈពេលជិត ៥០ ឆ្នាំមកហើយ ចាប់តាំងពីប្រទេសទាំងពីរបានបង្កើតទំនាក់ទំនងការទូតនៅឆ្នាំ ១៩៧៦ នោះ ទំនាក់ទំនងទ្វេភាគីសម្រេចបានលទ្ធផលសំខាន់ៗជាច្រើន កាន់តែជាក់ស្តែង និងមានប្រសិទ្ធភាពក្នុងវិស័យជាច្រើន។ លោកនាយឧត្តមសេនីយ៍ Phan Van Giang អបអរសាទរហ្វីលីពីនដែលបានទទួលតួនាទីជាប្រធានអាស៊ានឆ្នាំ២០២៦ និង​បញ្ជាក់ថា វៀតណាមគាំទ្រ និងជឿជាក់ថាហ្វីលីពីននឹងបំពេញតួនាទីដ៏សំខាន់របស់ខ្លួនដោយជោគជ័យ រួមចំណែកដល់ការពង្រឹងសាមគ្គីភាព និងតួនាទីមជ្ឈភាពរបស់អាស៊ាន។

ទិដ្ឋភាពនៃជំនួប

ចំណែកលោក Irineo C. Espino បានចែករំលែកចំពោះការខាត់បង់ទាំងអាយុជីវិត និងទ្រព្យសម្បត្តិដែលបណ្តាលមកពីព្យុះ និងទឹកជំនន់នៅវៀតណាម។ លោក Irineo C. Espino បានបញ្ជាក់ថា ហ្វីលីពីនយកចិត្តទុកដាក់យ៉ាងខ្លាំង​ចំពោះទំនាក់ទំនងសហប្រតិបត្តិការជាមួយវៀតណាម ជាពិសេសក្នុងវិស័យការពារជាតិ។ លោកបានជម្រាបជូនលោកនាយឧត្តមសេនីយ៍ Phan Van Giang អំពីលទ្ធផលនៃកិច្ចសន្ទនាគោលនយោបាយការពារជាតិវៀតណាម-ហ្វីលីពីន លើកទី៧។ លោកបានសម្តែងបំណង​ថា ភាគីទាំងពីរនឹងបន្តសម្របសម្រួលដើម្បីជម្រុញកិច្ចសហប្រតិបត្តិការការពារជាតិទ្វេភាគីឲ្យកាន់តែជាក់ស្តែង និងស៊ីជម្រៅថែមទៀត។

លោកនាយឧត្តមសេនីយ៍ Phan Van Giang លោក Irineo C.Espino និងប្រតិភូក្នុងជំនួប

ដោយវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការការពារជាតិទ្វេភាគីនាពេលថ្មីៗនេះ ក៏ដូចជាកិច្ចសន្ទនាគោលនយោបាយការពារជាតិវៀតណាម-ហ្វីលីពីនលើកទី ៧ លោកនាយឧត្តមសេនីយ៍ Phan Van Giang បានស្នើឲ្យ​ភាគីទាំងពីរបន្តលើកកម្ពស់កិច្ចសហប្រតិបត្តិការ និងការផ្លាស់ប្តូរគណៈប្រតិភូគ្រប់កម្រិត ជាពិសេសគណៈប្រតិភូកម្រិតខ្ពស់ លើកកម្ពស់យន្តការសហប្រតិបត្តិការដែលមានស្រាប់ប្រកបដោយប្រសិទ្ធភាព ជាពិសេសកិច្ចសន្ទនាគោលនយោបាយការពារជាតិ ការពិគ្រោះយោបល់រវាងអង្គភាពទ័ព ប្រភេទទ័ពនានា ការផ្លាស់ប្តូរនាយទាហានវ័យក្មេង និងនាយទាហានជាន់ខ្ពស់ កិច្ចសហប្រតិបត្តិការក្នុងការបណ្តុះបណ្តាលមន្ត្រី ពេទ្យយោធា ភស្តុភា ឧស្សាហកម្មការពារជាតិ ការជួយសង្គ្រោះ សន្តិសុខតាមអ៊ីនធឺណិត ការរក្សាសន្តិភាពរបស់អង្គការសហប្រជាជាតិ ការរក្សាការពិគ្រោះយោបល់និងការគាំទ្រគ្នាទៅវិញទៅមកនៅក្នុងវេទិកា និងកិច្ចប្រជុំយោធា ការពារជាតិពហុភាគីក្នុងអំឡុងពេលឆ្នាំប្រធានអាស៊ានឆ្នាំ២០២៦ របស់ហ្វីលីពីន និងប្រកាន់ខ្ជាប់នូវជំហររួមរបស់អាស៊ានលើបញ្ហាក្នុងតំបន់ រួមទាំងបញ្ហាសមុទ្រខាងកើតផងដែរ៕

បកប្រែដោយ Duy Hoan