លោកឧត្តមសេនីយ៍ឯក Thai Dai Ngoc ចូលរួមកិច្ចប្រជុំមេបញ្ជាការកងកម្លាំងការពារជាតិឥណ្ឌូប៉ាស៊ីហ្វិក

កិច្ចប្រជុំ CHOD ឆ្នាំនេះត្រូវបានរៀបចំឡើងដោយ USINDOPACOM និងកងទ័ពភូមិន្ទថៃ។ ក្រោមប្រធានបទ “សន្តិភាពតាមរយៈកម្លាំង-ធានាសន្តិសុខ និងវិបុលភាពក្នុងតំបន់ឥណ្ឌូ-ប៉ាស៊ីហ្វិក” កិច្ចប្រជុំរួមមានវគ្គពិភាក្សាចំនួន ៤ លើប្រធានបទដូចជា៖ ការយល់ដឹងអំពីការគំរាមកំហែងអនុតំបន់ ការស្រាវជ្រាវលើការគំរាមកំហែងដែលមិនមែនជាប្រពៃណី ដំណោះស្រាយបច្ចេកវិទ្យាដែលកំពុងរីកចម្រើន ទំនួលខុសត្រូវក្នុងការទប់ស្កាត់រួមគ្នា និងជួបអាហារការងារថ្ងៃត្រង់លើផលប៉ះពាល់ជាសកលនៃសន្តិសុខឥណ្ឌូប៉ាស៊ីហ្វិក។

ប្រតិភូដែលចូលរួមកិច្ចប្រជុំមេបញ្ជាការកងកម្លាំងការពារជាតិឥណ្ឌូប៉ាស៊ីហ្វិក ថតរូបទុកជាអនុស្សាវរីយ៍

លោកឧត្តមសេនីយ៍ឯក Thai Dai Ngoc ចូលរួមកិច្ចប្រជុំមេបញ្ជាការកងកម្លាំងការពារជាតិឥណ្ឌូប៉ាស៊ីហ្វិក

នៅខាងក្រៅកិច្ចប្រជុំនេះ លោកឧត្តមសេនីយ៍ឯក Thai Dai Ngoc បានមានជំនួបទ្វេភាគីជាមួយប្រធានគណៈប្រតិភូមកពីសហរដ្ឋអាមេរិក ថៃ ឥណ្ឌា ជប៉ុន និងចក្រភពអង់គ្លេស។

ក្នុងជំនួបទ្វេភាគីជាមួយលោកឧត្តមនាវីឯក Samuel Paparo មេបញ្ជាការដ្ឋានឥណ្ឌូប៉ាស៊ីហ្វិកសហរដ្ឋអាមេរិក លោកឧត្តមសេនីយ៍ឯក Thai Dai Ngoc បានសង្កត់ធ្ងន់ថា កិច្ចសហប្រតិបត្តិការលើវិស័យការពារជាតិ វៀតណាម-អាមេរិក ក្នុងរយៈពេលកន្លងមកត្រូវបានអនុវត្តស្របតាមទំនាក់ទំនងទូទៅរវាងប្រទេសទាំងពីរ ដោយឈរលើមូលដ្ឋាននៃឯកសារ និងកិច្ចព្រមព្រៀងដែលបានចុះហត្ថលេខា រួមទាំងការរួមវិភាគទានដ៏ធំធេងរបស់ USINDOPACOM។ នាពេលខាងមុខ លោកឧត្តមសេនីយ៍ឯក Thai Dai Ngoc សង្ឃឹមថា USINDOPACOM នឹងជំរុញរដ្ឋាភិបាល និងក្រសួងការពារជាតិអាមេរិកអនុវត្តកិច្ចសន្យាសហប្រតិបត្តិការលើការជំនះពុះពារលើផលវិបាកដោយសារសង្គ្រាមនៅវៀតណាម។

ក្នុងជំនួបទ្វេភាគីជាមួយលោកនាយឧត្តមសេនីយ៍ Songwit Noonpackdee មេបញ្ជាការកងកម្លាំងការពារជាតិថៃ លោកឧត្តមសេនីយ៍ឯក Thai Dai Ngoc បានស្នើឲ្យកងទ័ពនៃប្រទេសទាំងពីរផ្តោតលើវិស័យមួយចំនួនដូចជា ការផ្លាស់ប្តូរគណៈប្រតិភូ កងទ័ពជើងទឹក សន្តិសុខនាវាចរណ៍ និងសន្តិសុខតាមអ៊ីនធឺណិត។

ក្នុងជំនួបទ្វេភាគីជាមួយលោកឧត្តមសេនីយ៍ទោ Ashutosh Dixit នាយសេនាធិការនៃអគ្គសេនាធិការដ្ឋានការពារជាតិចម្រុះឥណ្ឌា លោកឧត្តមសេនីយ៍ឯក Thai Dai Ngoc បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ ព្រមទាំងស្នើឲ្យភាគីឥណ្ឌាសហការយ៉ាងជិតស្និទ្ធជាមួយវៀតណាម ដើម្បីរៀបចំលំហាត់សមយុទ្ធទ្វេភាគីប្រកបដោយជោគជ័យលើការរក្សាសន្តិភាពរបស់អង្គការសហប្រជាជាតិនាពេលខាងមុខ។

ក្នុងជំនួបជាមួយលោកនាយឧត្តមសេនីយ៍ Uchikura Hiroaki នាយសេនាធិការសម្ព័ន្ធកងកម្លាំងស្វ័យការពារជប៉ុន លោកឧត្តមសេនីយ៍ឯក Thai Dai Ngoc បានស្នើឲ្យជប៉ុនយកចិត្តទុកដាក់ និងជំរុញការចុះហត្ថលេខាលើឯកសារសហប្រតិបត្តិការរវាងក្រសួងការពារជាតិទាំងពីរ។ ទន្ទឹមនឹងនោះ លោកសង្ឃឹមថា ក្រសួងការពារជាតិជប៉ុននឹងបន្តពិភាក្សាជាមួយក្រសួង ស្ថាប័នពាក់ព័ន្ធរបស់ជប៉ុន ដើម្បីគាំទ្រខ្លឹមសារនៃកិច្ចសហប្រតិបត្តិការក្នុងការពង្រឹងសមត្ថភាពអនុវត្តច្បាប់នៅសមុទ្រ កិច្ចសហប្រតិបត្តិការលើការជំនះពុះពារផលវិបាកដោយសារសង្គ្រាម។

ក្នុងជំនួបទ្វេភាគីជាមួយលោកនាយឧត្តមសេនីយ៍ Gwyn Jenkins មេបញ្ជាការកងទ័ពជើងទឹកចក្រភពអង់គ្លេស លោកឧត្តមសេនីយ៍ឯក Thai Dai Ngoc បានស្នើឲ្យរក្សាប្រសិទ្ធភាពនៃយន្តការសន្ទនា ផ្លាស់ប្តូរគណៈប្រតិភូ ជាពិសេសគណៈប្រតិភូជាន់ខ្ពស់ ជំរុញកិច្ចសហប្រតិបត្តិការបណ្តុះបណ្តាល និងចុះហត្ថលេខាលើអនុស្សរណៈនៃការយោគយល់គ្នា រវាងក្រសួងការពារជាតិនៃប្រទេសទាំងពីរ ស្តីពីកិច្ចសហប្រតិបត្តិការក្នុងការរក្សាសន្តិភាពរបស់អង្គការសហប្រជាជាតិ នាពេលឆាប់ៗ បន្តគាំទ្រ និងពិគ្រោះយោបល់គ្នាទៅវិញទៅមកក្នុងយន្តការ និងវេទិកាសន្តិសុខអន្តរជាតិ៕

បកប្រែដោយ Huyen Trang