បន្តជំរុញកិច្ចសហប្រតិបត្តិការលើវិស័យការពារជាតិវៀតណាម - ទួរគី

លោកឧត្តមសេនីយ៍ឯក Hoang Xuan Chien បានវាយតំលៃខ្ពស់ចំពោះវិជ្ជាជីវៈរបស់ SSB ក្នុងការរៀបចំ IDEF ក្នុងឆ្នាំនេះ និងសង្កត់ធ្ងន់ថា វៀតណាមចាប់អារម្មណ៍លើកិច្ចសហប្រតិបត្តិការអន្តរជាតិក្នុងវិស័យឧស្សាហកម្មការពារជាតិ។ លោកឧត្តមសេនីយ៍ឯក Hoang Xuan Chien បានអះអាងថា រដ្ឋាភិបាល និងក្រសួងការពារប្រទេសវៀតណាមជានិច្ចកាលបង្កើតលក្ខខណ្ឌអំណោយផលដើម្បីបង្កើនការផ្លាស់ប្តូរ និងកិច្ចសហប្រតិបត្តិការអន្តរជាតិលើវិស័យឧស្សាហកម្មការពារជាតិ ដោយឈរលើគោលការណ៍សមភាព ផលប្រយោជន៍ទៅវិញទៅមក គោរពច្បាប់វៀតណាម និងកិច្ចសន្យាអន្តរជាតិផ្សេងៗទៀត។

លោកឧត្តមសេនីយ៍ឯក Hoang Xuan Chien ជួបជាមួយប្រធានទីភ្នាក់ងារឧស្សាហកម្មការពារជាតិទួរគី

លោក Haluk Gorgun បានសម្តែងនូវសេចក្តីសោមនស្សរីករាយចំពោះការស្វាគមន៍គណៈប្រតិភូ ដោយអះអាងថា កិច្ចសហប្រតិបត្តិការជាមួយវៀតណាមជាអាទិភាពក្នុងគោលនយោបាយតម្រង់ទិសអាស៊ីរបស់ទួរគី។ លោក Haluk Gorgun ក៏បានសង្កត់ធ្ងន់ថា ជាមួយនឹងតួនាទី និងកិត្យានុភាពរបស់ SSB ក្រោមឪវាទប្រធានាធិបតីទួរគី ក៏ដូចជាសមត្ថភាពខ្លួនទីពឹងខ្លួន ទួរគីត្រៀមខ្លួនជាស្រេចសហប្រតិបត្តិការជាមួយវៀតណាម ស្របតាមទំនាក់ទំនងនយោបាយ និងផលប្រយោជន៍នៃប្រទេសទាំងពីរ។

លោកឧត្តមសេនីយ៍ឯក Hoang Xuan Chien ជួបជាមួយប្រធានទីភ្នាក់ងារឧស្សាហកម្មការពារជាតិទួរគី

លោកឧត្តមសេនីយ៍ឯក Hoang Xuan Chien បានថ្លែងអំណរគុណចំពោះលោក Haluk Gorgun ដែលបានចាត់បញ្ជូនតំណាង SSB ទៅចូលរួមពិព័រណ៍ការពារជាតិអន្តរជាតិវៀតណាមពីរដងក្នុងឆ្នាំ ២០២២ និង ២០២៤ ព្រមទាំងស្វាគមន៍សហគ្រាស និងគ្រឹះស្ថានឧស្សាហកម្មការពារជាតិទួរគីបន្តតាំងបង្ហាញផលិតផលរបស់ខ្លួននៅឯពិព័រណ៍ការពារជាតិអន្តរជាតិវៀតណាមដែលគ្រោងនឹងរៀបចំនៅចុងឆ្នាំ ២០២៦។ លោកឧត្តមសេនីយ៍ឯក Hoang Xuan Chien បានវាយតំលៃខ្ពស់ចំពោះការអភិវឌ្ឍឧស្សាហកម្មការពារជាតិរបស់ទួរគី ព្រមទាំងស្នើឲ្យភាគីទាំងពីរបន្តជំរុញការផ្លាស់ប្តូរ និងស្វែងយល់ពីលទ្ធភាពសហប្រតិបត្តិការស្របតាមសមត្ថភាពរបស់ភាគីនីមួយៗ៕

បកប្រែដោយ Huyen Trang