បំពាក់គ្រឿងឥស្សរិយយសដើម្បីបុព្វហេតុរក្សាសន្តិភាពរបស់អង្គការសហប្រជាជាតិជូនក្រុមវិស្វកម្មលេខ៣ របស់វៀតណាម

គ្រឿងឥស្សរិយយសនេះគឺការកត់សម្គាល់ចំពោះការលះបង់ និងការរួមចំណែករបស់កម្មាភិបាល និងបុគ្គលិកនៃក្រុមវិស្វកម្មលេខ ៣ វៀតណាមក្នុងបេសកកម្មរក្សាសន្តិភាពរបស់អង្គការសហប្រជាជាតិ។

អញ្ជើញចូលរួមពិធីនេះមានវត្ដមានពីតំណាងបេសកកម្ម UNISFA តំបន់រដ្ឋបាល Abyei អង្គភាព និងក្រុមការងារនៃក្រសួងការពារប្រទេសវៀតណាម និងក្រសួងនគរបាលវៀតណាម។

លោកឧត្តមសេនីយ៍ត្រី Ameer Muhammad Umrani មេបញ្ជាការរងកងកម្លាំងយោធានៃស្ថានបេសកកម្ម UNISFA បំពាក់គ្រឿងឥស្សរិយយសជូនកម្មាភិបាល  មេបញ្ជាការ និងសមាជិកក្រុមវិស្វកម្មលេខ ៣ វៀតណាម

ថ្លែងក្នុងពិធីនេះ លោកឧត្តមសេនីយ៍ត្រី Ameer Muhammad Umrani មេបញ្ជាការរងកងកម្លាំងយោធានៃស្ថានបេសកកម្ម UNISFA បានវាយតំលៃខ្ពស់ចំពោះលទ្ធផលការងារ និងសមត្ថភាពរបស់កងកម្លាំងវៀតណាមដែលចូលរួមក្នុងប្រតិបត្តិការរក្សាសន្តិភាពរបស់អង្គការសហប្រជាជាតិនៅតំបន់ Abyei រួមជាមួយនឹងការប្តេជ្ញាចិត្តរបស់វៀតណាមចំពោះសហគមន៍អន្តរជាតិក្នុងការចូលរួមបេសកកម្មរក្សាសន្តិភាពរបស់អង្គការសហប្រជាជាតិ។

លោកស្រី Abionweng Majith រដ្ឋមន្ត្រីក្រសួងសន្តិភាពនិងការផ្សះផ្សា ចែករំលែកថា៖ “អរគុណក្រុមវិស្វកម្មវៀតណាមដែលបានបញ្ចប់បេសកកម្មនៅ តំបន់ Abyei យ៉ាងល្អ។ អ្នកបានជួយផ្លាស់ប្តូរការយល់ឃើញរបស់ប្រជាជនមូលដ្ឋានអំពីស្ថានបេសកកម្ម UNISFA។ អ្នកបានសាងសង់ផ្លូវមានគុណភាពល្អ និងជួយផ្លាស់ប្តូរជីវភាពរស់នៅរបស់មនុស្សជាច្រើន។ សូមអរគុណក្រុមវិស្វកម្មវៀតណាមបានមកទីនេះ ដោយសេចក្តីស្រឡាញ់ និងកិច្ចសហប្រតិបត្តិការជាមួយសហគមន៍។ ខ្ញុំសង្ឃឹមថា អ្នកបន្តរួមចំណែកដល់សហគមន៍ និងប្រជាជនរបស់យើងនៅទីនេះ សូមអរគុណ!”។

ប្រតិភូទាំងឡាយថតរូបជាមួយក្រុមវិស្វកម្មលេខ ៣ វៀតណាម

ក្នុងឱកាសនេះ តំណាងថ្នាក់ដឹកនាំស្ថានបេសកកម្ម UNISFA ក៏បានបំពាក់គ្រឿងឥស្សរិយយសដើម្បីបុព្វហេតុរក្សាសន្តិភាពរបស់អង្គការសហប្រជាជាតិជូននាយទាហានមួយចំនួននៃក្រុមការងាររបស់ក្រសួងការពារប្រទេស និងតំណាងកងកម្លាំងនៃបណ្ដាប្រទេសចូលរួមបេសកកម្មរក្សាសន្ដិភាព ដើម្បីកត់សម្គាល់នូវការរួមចំណែកក្នុងការសម្របសម្រួល និងអនុវត្តការងារនៅស្ថានបេសកកម្ម៕

បកប្រែដោយ Pham Diep