ជំរុញកិច្ចសហប្រតិបត្តិការលើវិស័យការពារជាតិ វៀតណាម-អ៊ីតាលី ឱ្យកាន់តែអភិវឌ្ឍថែមទៀត

នៅក្នុងជំនួប លោកនាយឧត្តមសេនីយ៍ Phan Van Giang បានសម្តែងនូវសេចក្តីរីករាយដែលបានមើលឃើញទំនាក់ទំនងវៀតណាម-អ៊ីតាលី ត្រូវបានពូនជ្រំ ដោយឥតឈប់ឈរ និងអភិវឌ្ឍលើគ្រប់ជ្រុងជ្រោយពីមួយថ្ងៃទៅមួយថ្ងៃ។ ដោយវាយតំលៃខ្ពស់ចំពោះលទ្ធផលនៃកិច្ចសន្ទនាគោលនយោបាយការពារជាតិវៀតណាម-អ៊ីតាលី លើកទី៥ លោកនាយឧត្តមសេនីយ៍ Phan Van Giang បានទទួលស្គាល់លទ្ធផលវិជ្ជមាននៃកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរក្នុងរយៈពេលកន្លងមក។ លោកនាយឧត្តមសេនីយ៍ Phan Van Giang បានចាត់ទុកថា សក្តានុពលសម្រាប់កិច្ចសហប្រតិបត្តិការរវាងភាគីទាំងពីរនៅតែមានច្រើនណាស់។ លោកបានស្នើថា នាពេលខាងមុខ ភាគីទាំងពីរគប្បីបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសគណៈប្រតិភូថ្នាក់ជាន់ខ្ពស់បន្តជំរុញកិច្ចសហប្រតិបត្តិការលើវិស័យឧស្សាហកម្មការពារជាតិ ការបណ្តុះបណ្តាល ការរក្សាសន្តិភាពរបស់អង្គការសហប្រជាជាតិ ជាពិសេសការជំនះពុះពារលើផលវិបាកដោយសារសង្គ្រាម សន្តិសុខតាមអ៊ីនធឺណិត ពេទ្យយោធា វប្បធម៌ កីឡាយោធា ។ល។  ក្រសួងការពារប្រទេសវៀតណាមនឹងដឹកនាំស្ថាប័នមានសមត្ថកិច្ចអនុវត្តប្រកបដោយប្រសិទ្ធភាពនូវទិសដៅកិច្ចសហប្រតិបត្តិការស្របតាមទស្សនៈរួមរបស់ថ្នាក់ដឹកនាំជាន់ខ្ពស់នៃប្រទេសទាំងពីរ និងលទ្ធផលនៃកិច្ចសន្ទនានេះ ដើម្បីជំរុញទំនាក់ទំនងសហប្រតិបត្តិការលើវិស័យការពារជាតិ វៀតណាម-អ៊ីតាលី ឱ្យកាន់តែអភិវឌ្ឍថែមទៀតក្នុងទិសដៅប្រសិទ្ធភាព ជាក់ស្តែង ស្របតាមក្របខ័ណ្ឌនៃទំនាក់ទំនងភាពជាដៃគូយុទ្ធសាស្ត្ររវាងប្រទេសទាំងពីរ។

លោកនាយឧត្តមសេនីយ៍ Phan Van Giang និងលោក Matteo Perego di Cremnago អនុរដ្ឋមន្ត្រីក្រសួងការពារជាតិអ៊ីតាលី

លោក Matteo Perego di Cremnago អនុរដ្ឋមន្ត្រីក្រសួងការពារជាតិអ៊ីតាលី បានថ្លែងអំណរគុណចំពោះលោកនាយឧត្តមសេនីយ៍ Phan Van Giang ដែលបានចំណាយពេលទទួលគណៈប្រតិភូ។ លោក Matteo Perego di Cremnago បានជម្រាបជូនលោកនាយឧត្តមសេនីយ៍ Phan Van Giang អំពីលទ្ធផលនៃកិច្ចសន្ទនាគោលនយោបាយការពារជាតិ វៀតណាម-អ៊ីតាលី លើកទី៥ ព្រមទាំងសម្តែងនូវជំនឿជាក់ថា ក្នុងស្មារតីនៃការផ្លាស់ប្តូរដោយស្មោះត្រង់ និងវិជ្ជមាន កិច្ចសន្ទនាលើកនេះនឹងរួមចំណែកយ៉ាងសំខាន់ក្នុងការជំរុញទំនាក់ទំនងសហប្រតិបត្តិការលើវិស័យការពារជាតិ វៀតណាម-អ៊ីតាលី ឱ្យអភិវឌ្ឍប្រកបដោយជាក់ស្តែង និងប្រសិទ្ធភាព។

* គួរបញ្ជាក់ថា នាព្រឹកថ្ងៃដដែល លោកឧត្តមសេនីយ៍ឯក Hoang Xuan Chien សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេសវៀតណាម និងលោក Matteo Perego di Cremnago អនុរដ្ឋមន្ត្រីក្រសួងការពារជាតិអ៊ីតាលី បានជាសហអធិបតីនៃកិច្ចសន្ទនាគោលនយោបាយការពារជាតិ វៀតណាម-អ៊ីតាលី លើកទី៥។

លោកឧត្តមសេនីយ៍ឯក Hoang Xuan Chien និងលោក Matteo Perego di Cremnago អនុរដ្ឋមន្ត្រីក្រសួងការពារជាតិអ៊ីតាលី

នៅក្នុងកិច្ចសន្ទនា លោកឧត្តមសេនីយ៍ឯក Hoang Xuan Chien បានសង្កត់ធ្ងន់ថា ក្រសួងការពារប្រទេសវៀតណាមត្រៀមខ្លួនជាស្រេចទទួលយោធិនអ៊ីតាលីចូលរួមវគ្គបណ្តុះបណ្តាលមន្ត្រីការពារជាតិអន្តរជាតិនៅវិទ្យាស្ថានការពារជាតិ និងរៀនភាសាវៀតណាមនៅវិទ្យាស្ថានវិទ្យាសាស្ត្រយោធា។ លោកឧត្តមសេនីយ៍ឯក Hoang Xuan Chien បានស្នើថា នាពេលខាងមុខ ភាគីទាំងពីរគប្បីយកចិត្តទុកដាក់សិក្សាលទ្ធភាពចុះហត្ថលេខាលើឯកសារសហប្រតិបត្តិការ បន្តជំរុញការផ្លាស់ប្តូរគណៈប្រតិភូនៅគ្រប់លំដាប់ថ្នាក់ ការបណ្តុះបណ្តាល ឧស្សាហកម្មការពារជាតិ និងការរក្សាសន្តិភាពរបស់អង្គការសហប្រជាជាតិ ស្រាវជ្រាវ ពង្រីកយន្តការ និងទម្រង់នៃការផ្លាស់ប្តូរ និងការពិគ្រោះយោបល់ ដើម្បីបង្កើនការយល់ដឹងគ្នាទៅវិញទៅមក និងការជឿទុកចិត្តរវាងភាគីទាំងពីរ បន្តសម្របសម្រួលយ៉ាងជិតស្និទ្ធ និងគាំទ្រគ្នាទៅវិញទៅមក នៅវេទិកាពហុភាគី ជាពិសេសអង្គការសហប្រជាជាតិ និងក្នុងក្របខ័ណ្ឌអាស៊ាន-សហភាពអឺរ៉ុប (EU)។ លោកឧត្តមសេនីយ៍ឯក Hoang Xuan Chien ក៏បានស្នើឲ្យភាគីអ៊ីតាលីបានសម្តែងគាំទ្រដើម្បីសហភាពអឺរ៉ុបដកចេញ “កាតលឿង” IUU ឱ្យឆាប់ៗសម្រាប់វៀតណាម ហើយគាំទ្រវៀតណាមជំរុញកិច្ចសហប្រតិបត្តិការលើវិស័យការពារជាតិជាមួយ EU ក្រោមកិច្ចព្រមព្រៀងស្តីពីការបង្កើតក្របខ័ណ្ឌសម្រាប់ការចូលរួមរបស់វៀតណាមក្នុងសកម្មភាពគ្រប់គ្រងវិបត្តិ EU (FPA)។

រីឯលោក Matteo Perego di Cremnago អនុរដ្ឋមន្ត្រីក្រសួងការពារជាតិអ៊ីតាលី បានអះអាងថា ទាំងវៀតណាម និងអ៊ីតាលីចែករំលែកទស្សនៈវិស័យចំពោះស្ថានភាពពិភពលោក ព្រមទាំងមានបំណងចង់នាំមកនូវសន្តិភាពប្រកបដោយស្ថិរភាពក្នុងតំបន់ និងនៅលើពិភពលោក យកចិត្តទុកដាក់ចំពោះបេសកកម្មអន្តរជាតិដ៏ថ្លៃថ្នូ ក៏ដូចជាអភិវឌ្ឍបច្ចេកវិទ្យាថ្មី។ ដោយចែករំលែកអំពីខ្លឹមសារដែលលោកឧត្តមសេនីយ៍ឯក Hoang Xuan Chien បានលើកឡើងនោះ លោក Matteo Perego di Cremnago បានឲ្យដឹងថា អ៊ីតាលីមានសមត្ថភាពបោសសម្អាតមីន និងត្រៀមខ្លួនជាស្រេចសហប្រតិបត្តិការជាមួយវៀតណាមលើវិស័យនេះ ទន្ទឹមនឹងនោះ លោកក៏បានអះអាងថា អ៊ីតាលីយកចិត្តទុកដាក់ចំពោះការជំរុញទំនាក់ទំនងសហប្រតិបត្តិការលើវិស័យការពារជាតិជាមួយវៀតណាមរីកចម្រើនថែមទៀតនាពេលខាងមុខ។

នៅចុងបញ្ចប់នៃកិច្ចសន្ទនា ភាគីទាំងពីរបានចុះហត្ថលេខាលើកំណត់ហេតុនៃកិច្ចសន្ទនា និងលិខិតសម្តែងបំណងអំពីការបង្កើតក្រុមការងារស្តីពីកិច្ចសហប្រតិបត្តិការទ្វេភាគីលើវិស័យសម្ភារៈការពារជាតិ៕

បកប្រែដោយ Huyen Trang