វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូយុទ្ធសាស្ត្រជាមួយអ៊ីតាលី

លោក Attilio Fontana បានអះអាងថា ដំណើរទស្សនកិច្ចរបស់លោកស្រី Vo Thi Anh Xuan អនុប្រធានរដ្ឋ បង្ហាញពីសុច្ឆន្ទៈរបស់វៀតណាមក្នុងការជំរុញទំនាក់ទំនងជាមួយអ៊ីតាលី ព្រមទាំងវាយតម្លៃខ្ពស់ចំពោះការរួមបញ្ចូលគ្នានៃអង្គភាពរដ្ឋបាល និងការដាក់ឲ្យដំណើរការអាជ្ញាធរមូលដ្ឋានពីរកម្រិតនៅវៀតណាម។

លោកស្រី Vo Thi Anh Xuan អនុប្រធានរដ្ឋវៀតណាម ជួបពិភាក្សាការងារជាមួយលោក Attilio Fontana ប្រធានតំបន់ Lombardy (រូបថត៖ vnanet.vn)

លោក Attilio Fontana បានចាត់ទុកថា នេះជាវិធានការសំខាន់មួយក្នុងការអភិវឌ្ឍសេដ្ឋកិច្ចសង្គមរបស់ប្រទេស ព្រមទាំងជឿជាក់ថា ទំនាក់ទំនងអ៊ីតាលី-វៀតណាម និយាយរួម និងទំនាក់ទំនងតំបន់ Lombardy-វៀតណាម និយាយដោយឡែកនៅមានសក្ដានុពលជាច្រើនសម្រាប់ការអភិវឌ្ឍ។ លោក Attilio Fontana ក៏បានអះអាងដែរថា អង្គភាពអាជីវកម្មនៅតំបន់ Lombardy មានទំនុកចិត្ត និងមានបំណងចង់ស្វែងយល់អំពីឱកាសវិនិយោគនៅវៀតណាម។

លោក Attilio Fontana ប្រធានតំបន់ Lombardy ទទួលជួបលោកស្រី Vo Thi Anh Xuan អនុប្រធានរដ្ឋវៀតណាម (រូបថត៖ vnanet.vn)

លោកស្រី Vo Thi Anh Xuan អនុប្រធានរដ្ឋ បានអះអាងថា វៀតណាមបានវាយតំលៃខ្ពស់ចំពោះទំនាក់ទំនងភាពជាដៃគូយុទ្ធសាស្ត្រជាមួយអ៊ីតាលី ព្រមទាំងមានបំណងចង់ជំរុញទំនាក់ទំនងរវាងប្រទេសទាំងពីរឱ្យកាន់តែស៊ីជម្រៅ ជាក់ស្តែង និងប្រកបដោយប្រសិទ្ធភាពលើវិស័យជាច្រើន រួមទាំងកិច្ចសហប្រតិបត្តិការរវាងតំបន់ Lombardy និងមូលដ្ឋាននានារបស់វៀតណាម ជាពិសេសលើវិស័យពាណិជ្ជកម្ម-វិនិយោគ និងការឆ្លើយតបទៅនឹងការប្រែប្រួលអាកាសធាតុ។។

ក្នុងក្របខ័ណ្ឌនៃដំណើរទស្សនកិច្ចនេះ លោកស្រី Vo Thi Anh Xuan អនុប្រធានរដ្ឋ បានទទួលជួបជាមួយតំណាងសហគមន៍អាណិកជនវៀតណាម និងមិត្តភក្តិអ៊ីតាលីដ៏ជិតស្និទ្ធ ក្នុងឱកាសរំលឹកខួបលើកទី ១៣៥ នៃទិវាកំណើតលោកប្រធានហូជីមិញ និងចូលរួមពិធីបើកជើងហោះហើរត្រង់ហាណូយ-មីឡាន ដែលដំណើរការដោយក្រុមហ៊ុនអាកាសចរណ៍ជាតិវៀតណាម៕

បកប្រែដោយ Huyen Trang