ចាប់ពីថ្ងៃទី៩ ដល់ថ្ងៃទី១០ ខែមីនា លោកឯកអគ្គរដ្ឋទូត Do Hung Viet ប្រធានស្ថានបេសកកម្មអចិន្ត្រៃយ៍វៀតណាមប្រចាំអង្គការសហប្រជាជាតិ (UN) នៅទីក្រុងញូវយ៉ក ក្នុងឋានៈជាប្រធានដែលត្រូវបានតែងតាំងនៃកិច្ចប្រជុំពិនិត្យឡើងវិញលើកទី១១ នៃសន្ធិសញ្ញាស្តីពីការមិនរីកសាយភាយអាវុធនុយក្លេអ៊ែរ (NPT) បានដឹកនាំការពិគ្រោះយោបល់ជាមួយក្រុមតំបន់ និងប្រទេសជាសមាជិកនៅតាមភ្នាក់ងារអង្គការសហប្រជាជាតិនៅទីក្រុងហ្សឺណែវ (ស្វីស)។
ក្នុងក្របខ័ណ្ឌនៃដំណើរទស្សនកិច្ចការងារ លោកឯកអគ្គរដ្ឋទូត Do Hung Viet បានដឹកនាំការពិគ្រោះយោបល់ជាមួយប្រទេសជាសមាជិក NPT នៃចលនាមិនចូលបក្សសម្ព័ន្ធ ក្រុមអឺរ៉ុបខាងកើត ក្រុមអឺរ៉ុបខាងលិច និងប្រទេសដទៃទៀត។ ក្នុងពេលជាមួយគ្នានេះ ការពិគ្រោះយោបល់ទ្វេភាគីត្រូវបានធ្វើឡើងជាមួយប្រទេសចិន រុស្ស៊ី ចក្រភពអង់គ្លេស បារាំង និងសហរដ្ឋអាមេរិក។ លោកឯកអគ្គរដ្ឋទូតក៏បានធ្វើជាអធិបតី និងថ្លែងសុន្ទរកថានៅក្នុងព្រឹត្តិការណ៍មួយដែលរៀបចំឡើងដោយការិយាល័យអង្គការសហប្រជាជាតិសម្រាប់ការរំសាយអាវុធ (UNODA) និងសហភាពអឺរ៉ុប (EU) ស្តីពីការរៀបចំសម្រាប់សន្និសីទពិនិត្យឡើងវិញ NPT។
នៅក្នុងកិច្ចប្រជុំទាំងនោះ តំណាងមកពីប្រទេស និងអង្គការអន្តរជាតិផ្សេងៗបានស្វាគមន៍ការចូលកាន់តំណែងជាប្រធានសន្និសីទពិនិត្យឡើងវិញ NPT ក្នុងឆ្នាំ ២០២៦ របស់វៀតណាម ជាពិសេសនៅក្នុងបរិបទនៃបរិយាកាសសន្តិសុខអន្តរជាតិដ៏ស្មុគស្មាញ។ ប្រទេសជាច្រើនបានជំរុញឱ្យវៀតណាមក្នុងឋានៈជាប្រធាន ត្រូវចាត់វិធានការលើបញ្ហានេះតាមរបៀបដែលមានតុល្យភាព ស្ថាបនា និងជាក់ស្តែង។ ហើយបានបញ្ជាក់ពីការប្តេជ្ញាចិត្តក្នុងការបន្តកិច្ចសហប្រតិបត្តិការយ៉ាងជិតស្និទ្ធជាមួយប្រធាន ដើម្បីសម្រេចបានលទ្ធផលជាក់ស្តែងនៅក្នុងសន្និសីទ។ ប្រទេសជាសមាជិកក៏បានបញ្ជាក់ជាថ្មីនូវតម្លៃនៃសន្ធិសញ្ញា និងដំណើរការពិនិត្យឡើងវិញ NPT ក្នុងការរក្សាសន្តិភាព និងសន្តិសុខអន្តរជាតិ និងលើកកម្ពស់ការអភិវឌ្ឍប្រកបដោយចីរភាព៕
បកប្រែដោយ Duy Hoan
Type the code from the image