ការបោះឆ្នោតឆ្នាំ២០២៦ ឆ្លុះបញ្ចាំងពីសមត្ថភាពអភិបាលកិច្ច និងភាពចាស់ទុំរបស់ប្រទេសវៀតណាម

អត្ថបទនេះត្រូវ​បានចេញ​ផ្សាយ​ក្នុងឱកាស​នៃ​ព្រឹត្តិការណ៍បោះឆ្នោតជ្រើសតាងសមាជិករដ្ឋសភា នីតិកាលទី១៦ និងក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ២០២៦-២០៣១ នៅប្រទេសវៀតណាម ដែលនឹងប្រព្រឹត្តទៅនៅថ្ងៃអាទិត្យ ថ្ងៃទី១៥ ខែមីនា។

លោក Rizvie Salih អនុប្រធានសភាស្រីលង្កា ជឿជាក់ថា ការងារត្រៀម​​រៀបចំសម្រាប់ការបោះឆ្នោតស្ថាប័ននីតិបញ្ញត្តិនាពេលខាងមុខនៅក្នុងប្រទេសវៀតណាម កំពុងត្រូវបានអនុវត្តជាប្រព័ន្ធ និងមានការសម្របសម្រួលយ៉ាងជិតស្និទ្ធ។

លោក Rizvie Salih អនុប្រធានសភាស្រីលង្កា

នៅក្នុងបរិបទនៃយុគសម័យឌីជីថល ប្រទេសវៀតណាមបានមានវិធីសាស្រ្តឃោសនាបោះឆ្នោតថ្មីៗ ហើយកម្មវិធីអនឡាញជួយសម្រួលដល់ទំនាក់ទនងរវាងអ្នកបោះឆ្នោត និងបេក្ខជន។ កិច្ចខិតខំប្រឹងប្រែងរបស់វៀតណាមនឹងរួមចំណែកដល់ការធានាឱ្យការបោះឆ្នោតប្រព្រឹត្តទៅ​ដោយរលូន និងមានប្រសិទ្ធភាព ខណៈពេលដែលក៏ឆ្លុះបញ្ចាំងពីសមត្ថភាពអភិបាលកិច្ច និងភាពចាស់ទុំខាងនយោបាយរបស់ប្រទេសផងដែរ។

លោក Salih បានសង្កត់ធ្ងន់ថា ក្នុងរយៈពេលប៉ុន្មានទសវត្សរ៍កន្លងមកនេះ ប្រទេសវៀតណាមបានលេចចេញជាមួយ​រឿងរ៉ាវជោគជ័យគួរឱ្យកត់សម្គាល់មួយរបស់អាស៊ី។ សមិទ្ធផលទាំងនេះក៏ឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់ថ្នាក់ដឹកនាំ និងប្រជាជនវៀតណាមចំពោះការអភិវឌ្ឍប្រទេសជាតិ និងវឌ្ឍនភាពសង្គមផងដែរ។

នៅក្នុងបរិបទនេះ ការបោះឆ្នោតស្ថាប័ននីតិបញ្ញត្តិនាពេលខាងមុខ គឺជាជំហានដ៏សំខាន់មួយដើម្បីពង្រឹងសមិទ្ធផលទាំងនេះ ព្រមទាំងត្រៀម​រៀបចំសម្រាប់សេចក្តីប្រាថ្នាអភិវឌ្ឍន៍នាពេលអនាគត។ ដំណើរការនីតិបញ្ញត្តិដែលមានស្ថិរភាព និងមានចក្ខុវិស័យមិនត្រឹមតែរួមចំណែកដល់ការអភិវឌ្ឍជាតិប៉ុណ្ណោះទេ ប៉ុន្តែថែមទាំងដល់ស្ថិរភាពក្នុងតំបន់ និងពង្រឹងកិច្ចសហប្រតិបត្តិការអន្តរជាតិប្រកបដោយស្ថាបនាផងដែរ។

លោក Salih បានសម្តែងទំនុកចិត្តថាការបោះឆ្នោតនឹងប្រព្រឹត្តទៅដោយជោគជ័យ ក៏ដូចជាជឿជាក់លើអភិវឌ្ឍន៍របស់ប្រទេសវៀតណាម៕

បកប្រែដោយ Thanh Cong