នាវាសំពៅលេខ ២៨៦ - Le Quy Don ចូលចតនៅកំពង់ផែម៉ានីល ចាប់ផ្តើមដំណើរទស្សនកិច្ច និងផ្លាស់ប្ដូរជាមួយកងទ័ពជើងទឹកហ្វីលីពីន

លោកវរសេនីយ៍ឯក Jonathan Salvilla អតីតមេបញ្ជាការកងកម្លាំងប្រយុទ្ធតាមឆ្នេរសមុទ្រ នៃកងនាវាជើងទឹកហ្វីលីពីន បានជាអធិបតីក្នុងពិធីស្វាគមន៍គណៈប្រតិភូ។

នាវាសំពៅលេខ ២៨៦ - Le Quy Don ចូលចតនៅកំពង់ផែម៉ានីល

អញ្ជើញចូលរួមពិធីស្វាគមន៍មានលោក Nguyen Bich Hoang ទីប្រឹក្សានយោបាយនៃស្ថានទូតវៀតណាមប្រចាំនៅហ្វីលីពីន និងលោកវរសេនីយ៍ឯក Luong Van Manh អនុព័ន្ធយោធាវៀតណាម ប្រចាំនៅហ្វីលីពីន និងកម្មាភិបាលនៃស្ថានទូត។

កងទ័ពជើងទឹកហ្វីលីពីន និងតំណាងស្ថានទូតវៀតណាមស្វាគមន៍គណៈប្រតិភូនៅកំពង់ផែ

ក្នុងពិធីស្វាគមន៍ លោកវរសេនីយ៍ឯក Jonathan Salvilla បានសម្តែងនូវក្តីសប្បាយរីករាយដោយបានទទួលគណៈប្រតិភូកងទ័ពជើងទឹកប្រជាជនវៀតណាម ព្រមទាំងបញ្ជាក់ថា នឹងបង្កើតលក្ខខណ្ឌអំណោយផលបំផុតសម្រាប់គណៈប្រតិភូក្នុងអំឡុងពេលបំពេញទស្សនកិច្ច និងផ្លាស់ប្ដូរនៅហ្វីលីពីន។

លោកវរសេនីយ៍ឯក Jonathan Salvilla ស្វាគមន៍លោកវរសេនីយ៍ឯក Nguyen Dinh Giang និងគណៈប្រតិភូកងទ័ពជើងទឹកប្រជាជនវៀតណាម

តាងនាមគណៈប្រតិភូ លោកវរសេនីយ៍ឯក Nguyen Dinh Giang បានថ្លែងអំណរគុណចំពោះថ្នាក់ដឹកនាំកងទ័ពជើងទឹកហ្វីលីពីន ចំពោះការស្វាគមន៍យ៉ាងកក់ក្តៅ។ លោកសង្ឃឹមថា សកម្មភាពជួបប្រាស្រ័យរវាងភាគីទាំងពីរនឹងទទួលបានជោគជ័យ រួមចំណែកក្នុងការពង្រឹង និងពង្រីកទំនាក់ទំនងសហប្រតិបត្តិការ និងមិត្តភាពរវាងកងទ័ពជើងទឹកនៃប្រទេសទាំងពីរ វៀតណាម-ហ្វីលីពីន។

ប្រតិភូថតរូបទុកជាអនុស្សាវរីយ៍ក្នុងពិធីស្វាគមន៍

តាមផែនការ ក្នុងអំឡុងពេលបំពេញទស្សនកិច្ច និងផ្លាស់ប្តូរនៅប្រទេសហ្វីលីពីន គណៈប្រតិភូនឹងចូលជួបសម្តែងការគួរសមជាមួយថ្នាក់ដឹកនាំនៃបញ្ជាការដ្ឋានកងនាវាជើងទឹកហ្វីលីពីន និងរៀបចំពិធីលៀងសាយភោជន៍នៅលើនាវា ព្រមទាំងផ្លាស់ប្តូរកីឡាជាមួយនាយទាហាន និងនាវិកនៃកងទ័ពជើងទឹកនៃប្រទេសហ្វីលីពីនផងដែរ៕

បកប្រែដោយ Huyen Trang