វៀតណាមសន្យាបង្កើនការចូលរួមក្នុងសកម្មភាពរក្សាសន្តិភាពរបស់អង្គការសហប្រជាជាតិ

នៅក្នុងជំនួបនេះ លោកឧត្តមសេនីយ៍ឯក Hoang Xuan Chien បានវាយតំលៃខ្ពស់ចំពោះការរួមវិភាគទានសំខាន់ៗរបស់Jean-Pierre Lacroix អគ្គលេខាធិការរងអង្គការសហប្រជាជាតិ ក្នុងតួនាទី ទទួលបន្ទុកសកម្មភាពរក្សាសន្តិភាព។ លោកបានថ្លែងអំណរគុណយ៉ាងស្មោះស្ម័គ្រចំពោះស្ថាប័នមានសមត្ថកិច្ចរបស់អង្គការសហប្រជាជាតិប្រចាំនៅវៀតណាម ដែលបានសហការយ៉ាងសកម្មជាមួយក្រសួងការពារប្រទេសវៀតណាមនាពេលកន្លងមក រួមចំណែកដល់លទ្ធផលល្អដែលវៀតណាមសម្រេចបានក្នុងការចូលរួមសកម្មភាពរក្សាសន្តិភាពរបស់អង្គការសហប្រជាជាតិ

លោកឧត្តមសេនីយ៍ឯក Hoang Xuan Chien និង លោក Jean-Pierre Lacroix អគ្គលេខាធិការរងអង្គការសហប្រជាជាតិ

លោកឧត្តមសេនីយ៍ឯក Hoang Xuan Chien បានឲ្យដឹងថា ចាប់តាំងពីខែមិថុនា ឆ្នាំ ២០១៤ មក ក្រសួងការពារប្រទេសវៀតណាមបានបញ្ជូននាយទាហាន និងបុគ្គលិកចំនួន ១.០៨៣ នាក់ ទៅកាន់ស្ថានបេសកកម្មរក្សាសន្តិភាព និងទីស្នាក់ការអង្គការសហប្រជាជាតិ ក្នុងរូបភាពជាបុគ្គល និងអង្គភាព។ គួរកត់សម្គាល់ថា អត្រាយោធិនស្ត្រីវៀតណាមដែលចូលរួមក្នុងប្រតិបត្តិការរក្សាសន្តិភាពរបស់អង្គការសហប្រជាជាតិនាពេលនេះគឺមានជាង ១៦% ខ្ពស់ជាងអត្រាមធ្យមរបស់ប្រទេសផ្សេងទៀតដែលបញ្ជូនកងទ័ព។

លោកឧត្តមសេនីយ៍ឯក Hoang Xuan Chien ប្រគល់វត្ថុអនុស្សាវរីយ៍​ជូន​ លោក Jean-Pierre Lacroix អគ្គលេខាធិការរងអង្គការសហប្រជាជាតិ

លោកឧត្តមសេនីយ៍ឯក Hoang Xuan Chien បានអះអាងថា នាពេលខាងមុខ វៀតណាមបានប្តេជ្ញាពង្រីកការចូលរួមរបស់ខ្លួនក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ ដោយដាក់ពង្រាយអង្គភាពជាច្រើនប្រភេទដូចជា អង្គភាពថ្មើរជើងគ្រឿងយន្ត អង្គភាពពបញ្ជូនសារ អង្គភាពជួយគាំទ្រអាកាសយានដ្ឋាន និងអង្គភាពមួយចំនួនទៀត ហើយនឹងចុះឈ្មោះជាមួយប្រព័ន្ធត្រៀមបម្រុងសមត្ថភាពរក្សាសន្តិភាពរបស់អង្គការសហប្រជាជាតិ (PCRS) ទៅតាមនីតិវិធី ដើម្បីត្រៀមខ្លួនជាស្រេចដាក់ពង្រាយកម្លាំងទៅស្ថានបេសកកម្មនានា ព្រមទាំងបង្កើនការបញ្ជូនបុគ្គលិកឲ្យចុះឈ្មោះជាបេក្ខជនសម្រាប់មុខតំណែងជាន់ខ្ពស់នៅអង្គការសហប្រជាជាតិ។

លោកឧត្តមសេនីយ៍ឯក Hoang Xuan Chien សង្ឃឹមថានឹងបន្តទទួលបានការគាំទ្រ និងផ្តល់យោបល់ពីអង្គការសហប្រជាជាតិ និងលោក Jean-Pierre Lacroix អគ្គលេខាធិការរង ដើម្បីវៀតណាមអាចបន្តរួមចំណែកប្រកបដោយប្រសិទ្ធភាពថែមទៀតក្នុងសកម្មភាពរក្សាសន្តិភាពរបស់អង្គការសហប្រជាជាតិ។

ប្រតិភូទាំងឡាយ​ថតរូប​ជុំ​គ្នា

រីឯខ្លួនវិញ លោក Jean-Pierre Lacroix  អគ្គលេខាធិការរងអង្គការសហប្រជាជាតិ បានអះអាងថា ការរក្សាសន្តិភាពគឺជាសសរស្តម្ភសំខាន់ក្នុងភាពជាដៃគូរវាងអង្គការសហប្រជាជាតិ និងវៀតណាម។ លោក Jean-Pierre Lacroix អគ្គលេខាធិការង បានវាយតំលៃខ្ពស់ចំពោះការរួមវិភាគទានយ៉ាងសកម្ម និងមានប្រសិទ្ធភាពរបស់វៀតណាមក្នុងសកម្មភាពរក្សាសន្តិភាពរបស់អង្គការសហប្រជាជាតិ។ លោកអះអាងនូវការគាំទ្រចំពោះវៀតណាម និងខិតខំប្រឹងប្រែងពង្រឹង និងពង្រីកកិច្ចសហប្រតិបត្តិការរវាងវៀតណាម និងអង្គការសហប្រជាជាតិក្នុងវិស័យនេះ។

បកប្រែដោយ Duy Hoan