វៀតណាម និងកាណាដាអនុវត្តយ៉ាងសកម្មនូវខ្លឹមសារសហប្រតិបត្តិការលើវិស័យការពារជាតិ

លោកនាយឧត្តមសេនីយ៍ Phan Van Giang បានសង្កត់ធ្ងន់ថា ក្នុងអាណត្តិបេសកកម្មការទូតរបស់លោក Steil ឯកអគ្គរដ្ឋទូត ក្រសួងការពារជាតិនៃប្រទេសទាំងពីរបានអនុវត្តសកម្មភាពសហប្រតិបត្តិការយ៉ាងសកម្ម និងប្រកបដោយប្រសិទ្ធភាព ដោយឈរលើមូលដ្ឋាននៃឯកសារ និងកិច្ចព្រមព្រៀងដែលបានចុះហត្ថលេខា រួមទាំងអនុស្សរណៈយោគយល់គ្នាស្តីពីកិច្ចសហប្រតិបត្តិការលើវិស័យការពារជាតិដែលបានចុះហត្ថលេខានៅឆ្នាំ ២០១៩ និងផែនការសហប្រតិបត្តិការលើវិស័យការពារជាតិរយៈពេល ៣ ឆ្នាំ ដំណាក់កាល ២០២៤-២០២៦។

លោកនាយឧត្តមសេនីយ៍ Phan Van Giang ពិភាក្សាជាមួយលោក Shawn Steil ឯកអគ្គរដ្ឋទូតក្នុងជំនួប

ក្នុងឱកាសនេះ លោកនាយឧត្តមសេនីយ៍ Phan Van Giang បានថ្លែងអំណរគុណចំពោះក្រសួងការពារជាតិកាណាដា ដែលបានបញ្ជូនគណៈប្រតិភូជាន់ខ្ពស់មកចូលរួមពិព័រណ៍ការពារជាតិអន្តរជាតិវៀតណាមឆ្នាំ ២០២៤ រួមចំណែកដល់ជោគជ័យរួមនៃព្រឹត្តិការណ៍នេះ។

ទិដ្ឋភាពនៃជំនួប

អំពីទិសដៅនៃកិច្ចសហប្រតិបត្តិការនាពេលខាងមុខ លោកនាយឧត្តមសេនីយ៍ Phan Van Giang បានស្នើឲ្យក្រសួងការពារជាតិនៃប្រទេសទាំងពីរ បន្តសម្របសម្រួលយ៉ាងជិតស្និទ្ធលើខ្លឹមសារសំខាន់ៗមួយចំនួន រួមមាន៖ ការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសថ្នាក់ជាន់ខ្ពស់ ការរក្សា ការសន្ទនា - ការពិគ្រោះយោបល់ កិច្ចសហប្រតិបត្តិការបណ្តុះបណ្តាល ឧស្សាហកម្មការពារជាតិ ការជួយសង្គ្រោះ ការគ្រប់គ្រងព្រំដែន ការជម្នះពុះពារផលវិបាកដោយសារសង្គ្រាម ការរក្សាសន្តិភាពរបស់អង្គការសហប្រជាជាតិ ការពិគ្រោះគ្នាទៅវិញទៅមកក្នុងយន្តការសហប្រតិបត្តិការពហុភាគីលើវិស័យការពារជាតិ និងសន្តិសុខ។ល។

លោកនាយឧត្តមសេនីយ៍ Phan Van Giang ផ្តល់វត្ថុអនុស្សាវរីយ៍ជូនលោក Shawn Steil ឯកអគ្គរដ្ឋទូត

លោក Steil ឯកអគ្គរដ្ឋទូត បានថ្លែងអំណរគុណចំពោះក្រសួងការពារប្រទេសវៀតណាម ដែលបានយកចិត្តទុកដាក់ និងជួយឧបត្ថម្ភលោកឯកអគ្គរដ្ឋទូតក្នុងអាណត្តិបេសកកម្មការទូតរបស់លោកនៅវៀតណាម។ ទន្ទឹមនឹងនោះ លោក Steil បានសម្តែងនូវសេចក្តីរីករាយដោយឃើញថាកិច្ចសហប្រតិបត្តិការលើវិស័យការពារជាតិគឺជាចំណុចភ្លឺក្នុងទំនាក់ទំនងវៀតណាម-កាណាដា។

ដោយចែករំលែកនូវចំណាប់អារម្មណ៍ដ៏ល្អចំពោះការអភិវឌ្ឍរបស់វៀតណាមក្នុងប៉ុន្មានឆ្នាំថ្មីៗនេះ លោកឯកអគ្គរដ្ឋទូតសង្ឃឹមថា នាពេលខាងមុខភាគីទាំងពីរនឹងបន្តពង្រឹងថែមទៀតនូវកិច្ចសហប្រតិបត្តិការលើវិស័យការពារជាតិដោយផ្អែកលើខ្លឹមសារដែលបានព្រមព្រៀងគ្នា រួមចំណែកជំរុញទំនាក់ទំនងភាពជាដៃគូគ្រប់ជ្រុងជ្រោយ វៀតណាម-កាណាដា ឲ្យកាន់តែរីកចម្រើនថែមទៀត៕

បកប្រែដោយ Huyen Trang