អនុព័ន្ធយោធានៃបណ្តាប្រទេសប្រចាំវៀតណាម អញ្ជើញមកទស្សនកិច្ចនៅបញ្ជាការដ្ឋានយោធភូមិភាគទី៥

លោកឧត្តមសេនីយ៍ត្រី Hua Van Tuong ប្រគល់និមិត្តសញ្ញាយោធភូមិភាគទី៥ ជូនលោកវរសេនីយ៍ឯក Michael Willem Jansen

ក្នុងជំនួប លោកឧត្តមសេនីយ៍ត្រី Hua Van Tuong មេបញ្ជាការរងយោធភូមិភាគទី៥ បានលើកឡើងអំពីមុខងារ ភារកិច្ច រចនាសម្ព័ន្ធ និងសមិទ្ធិផលឆ្នើមៗរបស់កងកម្លាំងប្រដាប់អាវុធយោធភូមិភាគទី៥ ក្នុងការអនុវត្តភារកិច្ចយោធាការពារជាតិ ដែលផ្សាភ្ជាប់នឹងការអភិវឌ្ឍសេដ្ឋកិច្ចសង្គមក្នុងខេត្ត-ក្រុងចំនួន១១ នៅភូមិភាគកណ្តាលវៀតណាម។ ទន្ទឹមនឹងនោះ លោកបានសម្តែងក្តីសង្ឃឹមថា តាមរយៈដំណើរទស្សនកិច្ចនេះ អនុព័ន្ធយោធានៃបណ្តាប្រទេសនឹងយល់ដឹងកាន់តែច្បាស់អំពីប្រទេស និងប្រជាជនវៀតណាម រួមទាំងកងកម្លាំងប្រដាប់អាវុធរបស់យោធភូមិភាគទី៥ផងដែរ។

ទិដ្ឋភាពនៃជំនួប

តាងនាមគណៈប្រតិភូ លោកវរសេនីយ៍ឯក Michael Willem Jansen បានថ្លែងអំណរគុណចំពោះបញ្ជាការដ្ឋានយោធភូមិភាគទី៥ ដែលបានទទួលស្វាគមន៍យ៉ាងកក់ក្តៅ ហើយនិងបានសម្តែងការចាប់អារម្មណ៍ចំពោះសមិទ្ធិផលលេចធ្លោរបស់យោធភូមិភាគទី៥ និងជឿជាក់ថា ដំណើរទស្សនកិច្ច​ការងារនេះនឹងរួមចំណែកបង្កើនការយល់ដឹង ពង្រឹងទំនុកចិត្ត និងជំរុញកិច្ចសហប្រតិបត្តិការលើវិស័យការពារជាតិរវាងកងទ័ពប្រជាជនវៀតណាម និងកងទ័ពនៃបណ្តាប្រទេស ដើម្បីគោលដៅរួមនៃសន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក៕

បកប្រែដោយ Thanh Cong