ការពិនិត្យជាបឋមពិធីព្យុហយាត្រានៅទីលានក្រហម

ផែនកងទ័ពប្រជាជនវៀតណាមចូលកាន់ទីលានក្រហម

នៅក្នុងការត្រួតពិនិត្យបឋម ផែនទាំងឡាយនៃប្រទេសនានាបានប្រមូលផ្តុំគ្នានៅទីតាំងកំណត់ និងធ្វើការដើរព្យុហយាត្រាតាមបញ្ជាដែលរៀបចំដោយគណៈកម្មការរៀបចំ។ គណៈកម្មាធិការរៀបចំក៏បានរៀបចំអ្នកបកប្រែភាសារុស្ស៊ីដើម្បីជួយសម្រួលដល់ក្រុមបេសកកម្មនានាបំពេញភារកិច្ចដោយរលូន។ ការងារសន្តិសុខត្រូវបានរឹតបន្តឹង។ អាស្រ័យដោយមានការរៀបចំយ៉ាងម៉ត់ចត់ ការត្រួតពិនិត្យបឋមបានប្រព្រឹត្តទៅដោយរលូន។ ផែននៃកងទ័ពប្រជាជនវៀតណាម ត្រូវបានវាយតម្លៃដោយគណៈកម្មាធិការរៀបចំថាជាផែនមួយក្នុងចំណោមផែនព្យុហយាត្រាដ៏ស្អាតបំផុត។ ក្រៅពីនេះ ការបង្ហាញសម្ភារៈយោធា និងសព្វាវុធធុនធ្ងន់ និងទំនើបៗរបស់កងកម្លាំងប្រដាប់អាវុធសហព័ន្ធរុស្ស៊ី ក៏បង្កើតចំណាប់អារម្មណ៍ជាពិសេសអំពីកម្លាំងយោធានៃប្រទេសម្ចាស់ផ្ទះផងដែរ។

ត្រៀមខ្លួនជាស្រេចសម្រាប់ការត្រួតពិនិត្យបឋម

គួរបញ្ជាក់ថា នារសៀលថ្ងៃទី៣ ខែឧសភា អាណិកជនវៀតណាម និងនិស្សិតវៀតណាមរាប់រយនាក់នៅរុស្ស៊ី បាននាំយកទង់ជាតិវៀតណាម និងទង់ជាតិរុស្ស៊ីទៅកាន់ទីលានក្រហម ដើម្បីរង់ចាំស្វាគមន៍ក្រុមបេសកកម្មកងទ័ពប្រជាជនវៀតណាម។ ប្រជាពលរដ្ឋខ្លះក៏បានផ្តល់កន្សែង និងអាហារឆ្ងាញ់ៗដើម្បីលើកទឹកចិត្តដល់កម្មាភិបាល និងយុទ្ធជនក្នុងក្រុមបេសកកម្មផងដែរ។

នាថ្ងៃទី៤ ខែឧសភា ក្រុមបេសកកម្មកងទ័ពប្រជាជនវៀតណាម បានរៀបចំការដកបទពិសោធន៍បន្ទាប់ពីការត្រួតពិនិត្យបឋម និងបន្តហ្វឹកហ្វឺនតាមផែនការកំណត់។ នារសៀលថ្ងៃដដែល កម្មាភិបាល និងយុទ្ធជននៃក្រុមបេសកកម្មទាំងមូលបានផ្លាស់ប្តូរវប្បធម៌សិល្បៈជាមួយក្រុមបេសកកម្មនៃប្រទេសមិត្ត៕

បកប្រែដោយ Huyen Trang