កិច្ចសន្ទនាគោលនយោបាយការពារជាតិវៀតណាម-ថៃលើកទី៦

នៅក្នុងកិច្ចសន្ទនានេះ ភាគីទាំងពីរបានពិភាក្សាអំពីស្ថានភាពពិភពលោក និងតំបន់ រួមទាំងបញ្ហាដែលមានការយកចិត្ដទុកដាក់ដូចគ្នា។ ភាគីទាំងពីរវាយតំលៃខ្ពស់ចំពោះតួនាទីរបស់តំបន់ និងយន្តការដឹកនាំដោយអាស៊ាន ព្រមទាំងបានបញ្ជាក់ពីកិច្ចខិតខំប្រឹងប្រែងរួមគ្នាដើម្បីរួមចំណែកយ៉ាងសកម្មក្នុងការពង្រឹង និងពង្រីកសាមគ្គីភាព និងតួនាទីមជ្ឈភាពរបស់អាស៊ាន ក្នុងនិម្មាបនកម្មសន្តិសុខក្នុងតំបន់។ ភាគីទាំងពីរក៏បានសង្កត់ធ្ងន់លើសារៈសំខាន់នៃការដោះស្រាយវិវាទដោយសន្តិវិធី ដោយឈរលើមូលដ្ឋានច្បាប់អន្តរជាតិ។

លោកឧត្តមសេនីយ៍ឯក Hoang Xuan Chien នៅកិច្ចសន្ទនាគោលនយោបាយការពារជាតិវៀតណាម-ថៃលើកទី៦

លោកឧត្តមសេនីយ៍ឯក Hoang Xuan Chien បានអះអាងថា វៀតណាមប្រកាន់ខ្ជាប់នូវគោលនយោបាយការបរទេសឯករាជ្យ ខ្លួនទីពឹងខ្លួន សន្តិភាព មិត្តភាព កិច្ចសហប្រតិបត្តិការ និងអភិវឌ្ឍន៍ ពហុភាគីភាវូបនីយកម្ម និងពិពិធកម្មទំនាក់ទំនងការបរទេស។ វៀត​ណាមសន្យាអនុវត្ដគោលនយោបាយការពារជាតិ "៤ មិន" ខិតខំដោះស្រាយរាល់វិវាទ និងការខ្វែងគំនិតគ្នាដោយសន្តិវិធី ដោយ​ឈរលើមូលដ្ឋានច្បាប់អន្តរជាតិ។

អំពីបញ្ហាសមុទ្រខាងកើត គោលជំហរជាប់លាប់របស់វៀតណាមគឺភាគីពាក់ព័ន្ធត្រូវគោរពច្បាប់អន្តរជាតិ ជាពិសេសគឺអនុសញ្ញាអង្គការ​សហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS); អនុលោមតាមសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើត (DOC) ពន្លឿនបញ្ចប់ការចរចា និងចុះហត្ថលេខាលើក្រមប្រតិបត្តិនៅសមុទ្រខាងកើត (COC) ប្រកបដោយប្រសិទ្ធភាព។

អំពីកិច្ចសហប្រតិបត្តិការលើវិស័យការពារជាតិ ភាគីទាំងពីរបានវាយតម្លៃថា ដោយឈរលើមូលដ្ឋាននៃកិច្ចសន្ទនាគោលនយោបាយការ​ពារជាតិវៀតណាម - ថៃ លើកទី៥ នាខែធ្នូ ឆ្នាំ២០២៣ ទំនាក់ទំនងសហប្រតិបត្តិការលើវិស័យការពារជាតិទ្វេភាគីបានបន្តអនុវត្តយ៉ាងសកម្ម និងប្រកបដោយប្រសិទ្ធភាព និងសម្រេចបានលទ្ធផលលេចធ្លោជាច្រើនលើវិស័យដូចជា ការផ្លាស់ប្តូរគណៈប្រតិភូគ្រប់លំដាប់ថ្នាក់; ការរក្សា និងបង្កើតយន្តការសហប្រតិបត្តិការថ្មី; កិច្ចសហប្រតិបត្តិការរវាងអង្គភាពនានា; ការអប់រំ និងបណ្តុះបណ្តាល; ពេទ្យយោធា; ការគ្រប់គ្រង និងការពារព្រំដែន; ការទប់ស្កាត់ការក្លែងបន្លំឆ្លងដែន និងឧក្រិដ្ឋកម្មឆ្លងដែន; ការជំនះផលវិបាកនៃគ្រាប់បែក និងគ្រាប់មីនក្រោយសង្គ្រាម។ ភាគីទាំងពីរសម្របសម្រួល និងគាំទ្រគ្នាទៅវិញទៅមកនៅយន្តការ និងវេទិកាពហុភាគី ដែលដឹកនាំដោយអាស៊ាន...

ទិដ្ឋភាពនៃកិច្ចសន្ទនាគោលនយោបាយការពារជាតិវៀតណាម-ថៃលើកទី៦

នាពេលខាងមុខ ភាគីទាំងពីរឯកភាពបន្តអភិវឌ្ឍបន្ថែមទៀតនូវកិច្ចសហប្រតិបត្តិការលើវិស័យការពារជាតិវៀតណាម - ថៃ ស្របតាមទំនាក់ទំនងភាពជាដៃគូយុទ្ធសាស្ត្រវៀតណាម-ថៃ។ ភាគីទាំងពីរផ្តោតលើការពង្រឹងការជឿទុកចិត្តរវាងក្រសួងការពារជាតិទាំងពីរ និងកងទ័ពនៃប្រទេសទាំងពីរ បង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសកម្រិតខ្ពស់; រក្សាប្រកបដោយប្រសិទ្ធភាពនូវយន្តការសហប្រតិបត្តិការដែលមានស្រាប់ រួមទាំងយន្តការសន្ទនាគោលនយោបាយការពារជាតិ; ការអប់រំ និងបណ្តុះបណ្តាល; បង្កើនសកម្មភាពផ្លាស់ប្តូរនាយទាហានវ័យក្មេង; កិច្ចសហប្រតិបត្តិការរវាងអង្គភាពនានា; ការពិគ្រោះយោបល់ទាន់ពេលវេលា ចែករំលែកទស្សនៈលើរាល់បញ្ហាដែលភាគីទាំងពីរមានការយកចិត្ដទុកដាក់ដូចគ្នា និងការតំរង់ទិសសម្រាប់កិច្ចសហប្រតិបត្តិការឲ្យកាន់តែមានប្រសិទ្ធភាព បន្តសម្របសម្រួល និងគាំទ្រគ្នាទៅវិញទៅមកក្នុងវេទិកាពហុភាគីក្នុងតំបន់ និងអន្តរជាតិ...

* នារសៀលថ្ងៃទី១៨ ខែមីនា នៅទីស្នាក់ការរដ្ឋាភិបាលថៃ លោកឧត្តមសេនីយ៍ឯក Hoang Xuan Chien បានដឹកនាំគណៈប្រតិភូក្រសួងការពារប្រទេសវៀតណាមចូលជួបសម្តែងការគួរសមជាមួយលោក Phumtham Wechaychai ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ។

លោកឧត្តមសេនីយ៍ឯក Hoang Xuan Chien និងលោក Phumtham Wechayachai ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ

ក្នុងជំនួបនេះ លោក Phumtham Wechayachai ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ បានវាយតម្លៃខ្ពស់ចំពោះកិច្ចសហប្រតិបត្តិការលើវិស័យការពារជាតិទ្វេភាគី ក៏ដូចជាការគាំទ្រ និងការចូលរួមរបស់ក្រសួងការពារប្រទេសវៀតណាមក្នុងគំនិតផ្តួចផ្តើម និងសកម្មភាពពហុភាគីដែលរៀបចំដោយប្រទេសថៃនាពេលកន្លងមកនេះ។ លោក Phumtham Wechayachai បានសង្កត់ធ្ងន់ថា ទំនាក់ទំនងសហប្រតិបត្តិការលើវិស័យការពារជាតិទ្វេភាគីរវាងវៀតណាម និងថៃ គឺជាទំនាក់ទំនងប្រពៃណី និងមិត្តភាពដែលសក្ដានុពលសម្រាប់ការពង្រីក និងអភិវឌ្ឍន៍នៅមានច្រើនណាស់។

លោកឧត្តមសេនីយ៍ឯក Hoang Xuan Chien បានអះអាងថា ដោយឈរលើមូលដ្ឋាននៃទំនាក់ទំនងល្អរវាងប្រទេសទាំងពីរ កិច្ចសហប្រតិបត្តិការលើវិស័យការពារជាតិត្រូវបានភាគីទាំងពីរជំរុញយ៉ាងខ្លាំង ថ្នាក់ដឹកនាំក្រសួងការពារជាតិ និងកងទ័ពនៃប្រទេសទាំងពីរបានជួបជុំគ្នា និងចូលរួមព្រឹត្តិការណ៍នានាដែលរៀបចំដោយប្រទេសនីមួយៗ។ ការពិគ្រោះយោបល់ កិច្ចសន្ទនា និងយន្តការផ្លាស់ប្តូរសម្រាប់នាយទាហានវ័យក្មេងត្រូវបានបង្កើតឡើងនិងមានប្រសិទ្ធភាព។ កិច្ចសហប្រតិបត្តិការរវាងអង្គភាព និងការបណ្ដុះបណ្ដាលទទួលបានលទ្ធផលវិជ្ជមានជាច្រើន...

លោកឧត្តមសេនីយ៍ឯក Hoang Xuan Chien បានវាយតម្លៃខ្ពស់ចំពោះតួនាទី និងការចូលរួមយ៉ាងសកម្មរបស់ថៃនិយាយរួម និងក្រសួងការពារជាតិថៃនិយាយដោយឡែកក្នុងការជំរុញកិច្ចសហប្រតិបត្តិការពហុភាគី ជាពិសេសក្នុងក្របខ័ណ្ឌអាស៊ាន រួមចំណែកពង្រឹងសាមគ្គីភាពក្នុងប្លុក និងលើកកំពស់កិត្យានុភាពរបស់អាស៊ាន៕

បកប្រែដោយ Pham Diep