សារនៃសន្តិភាព កិច្ចសហប្រតិបត្តិការ និងការអភិវឌ្ឍ

អ្នកយកព័ត៌មាន៖ សូមលោកអនុរដ្ឋមន្ត្រីឲ្យដឹងអំពីគោលបំណង និងអត្ថន័យនៃពិព័រណ៍ការពារជាតិអន្តរជាតិវៀតណាមឆ្នាំ ២០២៤ បានទេ?

លោកឧត្តមសេនីយ៍ឯក Hoang Xuan Chien៖ ពិព័រណ៍ការពារជាតិអន្តរជាតិវៀតណាមឆ្នាំ ២០២៤ ប្រព្រឹត្តទៅចាប់ពីថ្ងៃទី ១៩ ដល់ថ្ងៃទី ២២ ខែធ្នូ ឆ្នាំ ២០២៤ ក្នុងឱកាសរំលឹកខួបលើកទី ៨០ នៃការបង្កើតកងទ័ពប្រជាជនវៀតណាម និងខួបលើកទី ៣៥ នៃទិវាបុណ្យការពារជាតិដោយប្រជាជនទាំងមូល។ នេះជាព្រឹត្តិការណ៍មួយដែលបញ្ជាក់ពីការរីកចម្រើនរបស់កងទ័ពប្រជាជនវៀតណាមក្នុងរយៈពេល ៨០ ឆ្នាំកន្លងទៅ។

ពិព័រណ៍នេះមានគោលបំណងរួមចំណែកពង្រឹងកិច្ចសហប្រតិបត្តិការអន្តរជាតិស្តីពីឧស្សាហកម្មការពារជាតិ; ចែករំលែកបទពិសោធន៍ ទទួល និងផ្ទេរបច្ចេកវិទ្យា; ចាប់យកនិន្នាការបច្ចេកវិទ្យាជឿនលឿននៅលើពិភពលោក ដើម្បីឱ្យយើងអាចស្រាវជ្រាវ រចនា និងផលិតអាវុធ និងឧបករណ៍បច្ចេកទេស ដើម្បីបំពេញតម្រូវការ និងភារកិច្ចយោធា និងការពារជាតិក្នុងស្ថានភាពថ្មី។ ទន្ទឹមនឹងនោះ ពិព័រណ៍នឹងផ្សព្វផ្សាយ និងណែនាំផលិតផល និងម៉ាកផលិតផលឧស្សាហកម្មការពារជាតិវៀតណាម; ជំរុញពាណិជ្ជកម្ម ស្វែងរកដៃគូ ឱកាសសហប្រតិបត្តិការ ការជ្រៀតចូលទីផ្សារសក្តានុពល ដើម្បីចូលរួមក្នុងខ្សែសង្វាក់ផ្គត់ផ្គង់ផលិតផលឧស្សាហកម្មការពារជាតិនៅទីផ្សារជុំវិញពិភពលោក។

លោកឧត្តមសេនីយ៍ឯក Hoang Xuan Chien សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេសវៀតណាម ប្រធានគណៈកម្មការដឹកនាំការតាំងពិព័រណ៍

នេះក៏ជាឱកាសដើម្បីឧទ្ទេសនាម និងផ្សព្វផ្សាយអំពីទឹកដី វប្បធម៌ មនុស្សវៀតណាម វប្បធម៌យោធារបស់កងទ័ពប្រជាជនវៀតណាម កសាងទំនុកចិត្ត ការយល់ដឹងគ្នាទៅវិញទៅមក ជំរុញសន្តិភាព កិច្ចសហប្រតិបត្តិការ និងអភិវឌ្ឍន៍ក្នុងតំបន់ និងនៅលើពិភពលោក។  ដាស់តឿន និងរីកសាយភាយមោទនភាពជាតិ និងស្មារតីទទួលខុសត្រូវក្នុងចំណោមកម្មាភិបាល យុទ្ធជននៃកងទ័ពទាំងមូល និងប្រជាជនទាំងមូល ក្នុងបុព្វហេតុកសាង និងការពារមាតុភូមិវៀតណាមសង្គមនិយម។ ទន្ទឹមនឹងនោះ ប្រមូលផ្តុំបទពិសោធន៍ និងមេរៀនជាក់ស្តែង ដើម្បីកសាង និងផ្សព្វផ្សាយម៉ាកពិព័រណ៍ការពារជាតិអន្តរជាតិវៀតណាម។

អ្នកយកព័ត៌មាន៖ នេះជាលើកទី២ ហើយដែលក្រសួងការពារប្រទេសវៀតណាមបានរៀបចំពិព័រណ៍ការពារជាតិអន្តរជាតិ។ សូមលោកអនុរដ្ឋមន្ត្រីឲ្យដឹងអំពីចំណុចលេចធ្លោនៃពិព័រណ៍លើកនេះបានទេ?

លោកឧត្តមសេនីយ៍ឯក Hoang Xuan Chien៖ ពិព័រណ៍នេះមានទ្រង់ទ្រាយធំជាងលើកទីមួយដែលយើងបានប្រារព្ធឡើងក្នុងឆ្នាំ២០២២ ជាពិសេស៖ ចំនួនអាវុធ និងយុទ្ធោបករណ៍របស់កងទ័ពប្រជាជនវៀតណាមត្រូវបានតាំងបង្ហាញក្នុងបរិមាណធំជាង  និងសម្បូរបែបជាង; ចំនួនផលិតផលឧស្សាហកម្មការពារជាតិ ភស្តុភារ និងបច្ចេកទេសដែលត្រូវបានផលិតក្នុងស្រុក ត្រូវបានបង្ហាញកាន់តែច្រើន; ទាក់ទាញការចូលរួមពីក្រុមហ៊ុនជាច្រើនរបស់បណ្តាប្រទេស រួមទាំងប្រទេសដែលមានសក្ដានុពលយោធា និងឧស្សាហកម្មការពារជាតិដែលមានការអភិវឌ្ឍឈានមុខគេលើពិភពលោក ដូចជា៖ អាមេរិក រុស្ស៊ី អង់គ្លេស បារាំង អេស្ប៉ាញ អ៊ីតាលី អាល្លឺម៉ង់ ឥណ្ឌា ចិន អ៊ីស្រាអែល។ល។ ផ្ទៃដីសរុបនៃតំបន់តាំងពិព័រណ៍បានកើនឡើងទ្វេដង (ច្រើនជាង ១០០,០០០ ម៉ែត្រការ៉េ); ផ្ទៃដីនៃមណ្ឌលតាំងបង្ហាញនៅកណ្តាលវាលក៏ដូចជាស្តង់ក្នុងផ្ទះគឺធំជាងការតាំងពិព័រណ៍លើកដំបូង។

ទិដ្ឋភាពនៃការពិនិត្យចុងក្រោយនៃពិធីបើកការតាំងពិព័រណ៍ការពារជាតិអន្តរជាតិវៀតណាមឆ្នាំ ២០២៤

វិសាលភាពនៃការតាំងពិព័រណ៍ឆ្នាំនេះបានបង្ហាញថា យើងដើរលើផ្លូវត្រឹមត្រូវក្នុងកិច្ចខិតខំប្រឹងប្រែងកសាងម៉ាកយីហោនៃការតាំងពិព័រណ៍ការពារជាតិរបស់វៀតណាម ដូច្នេះហើយនេះនឹងក្លាយជាកន្លែងជួបប្រជុំពីរឆ្នាំម្តងគួរឲ្យទាក់ទាញសម្រាប់សាជីវកម្ម ក្រុមហ៊ុន អ្នកស្រាវជ្រាវផលិតកម្មឧបករណ៍ការពារជាតិ ស្ថាប័ន អង្គភាព និងកងកម្លាំងប្រដាប់អាវុធ ដើម្បីស្វែងរកឱកាសសហប្រតិបត្តិការ ផ្លាស់ប្តូរ ដែលនាំមកនូវផលប្រយោជន៍ដល់គ្រប់ភាគី។

ភ្ញៀវអន្តរជាតិដែលចូលរួមក្នុងការតាំងពិព័រណ៍នេះ ក្រៅពីគណៈប្រតិភូថ្នាក់រដ្ឋមន្ត្រីក្រសួងការពារជាតិ ក៏មានគណៈប្រតិភូថ្នាក់នាយសេនាធិការ អគ្គមេបញ្ជាការ អនុរដ្ឋមន្ត្រីការពារជាតិ មេបញ្ជាការអង្គភាព... នៃបណ្តាប្រទេស។ ទាំងអស់នេះបញ្ជាក់ពីការទុកចិត្តរបស់មិត្តអន្តរជាតិចំពោះវៀតណាម។ ពួកគេចង់ពង្រឹងកិច្ចសហប្រតិបត្តិការលើវិស័យការពារជាតិជាមួយវៀតណាម រួមទាំងកិច្ចសហប្រតិបត្តិការលើវិស័យឧស្សាហកម្មការពារជាតិផងដែរ។

អ្នកយកព័ត៌មាន៖ តើក្រសួងការពារប្រទេសនឹងធ្វើអ្វីដើម្បីជំរុញគោលដៅធ្វើឱ្យពិព័រណ៍ការពារជាតិអន្តរជាតិវៀតណាមក្លាយជាម៉ាកសញ្ញាជាតិដែលស្មើជាមួយតំបន់ និងពិភពលោក?

លោកឧត្តមសេនីយ៍ឯក Hoang Xuan Chien៖ ដើម្បីប្រែពិព័រណ៍ការពារជាតិអន្តរជាតិវៀតណាម ក្លាយទៅជាម៉ាកសញ្ញាជាតិដែលស្មើជាមួយតំបន់ និងពិភពលោក ជាដំបូងយើងត្រូវបង្កើនជំនាញវិជ្ជាជីវៈក្នុងការរៀបចំ និងផ្លាស់ប្តូរថ្មីដោយឥតឈប់ឈរនូវខ្លឹមសារ និងវិធីសាស្ត្ររៀបចំ បង្កើតឱ្យមានលក្ខណៈពិសេសនិងការប្រកួតប្រជែង ដើម្បីឲ្យពិព័រណ៍នេះមិនត្រឹមតែជាកន្លែងសម្រាប់បង្ហាញឧបករណ៍យោធាទំនើបបំផុតរបស់ពិភពលោកប៉ុណ្ណោះទេ ថែមទាំងនាំមកនូវដំណោះស្រាយបច្ចេកវិទ្យា រួមគ្នាចែករំលែកបទពិសោធន៍ និងជំរុញពាណិជ្ជកម្មយោធា។ ទន្ទឹមនឹងនោះ ជាកន្លែងសម្រាប់ភ្ញៀវអាចទស្សនាសមិទ្ធិផលនៃវិស័យឧស្សាហកម្មការពារជាតិដែលកំពុងរីកចម្រើនលើពិភពលោក ក៏ដូចជាទស្សនាជាក់ស្តែងនូវផលិតផលឧស្សាហកម្មការពារជាតិនៃបណ្តាប្រទេស និងវៀតណាម។

វាមានសារៈសំខាន់ណាស់ដែលយើងត្រូវកសាងឧស្សាហកម្មការពារជាតិរបស់វៀតណាមឱ្យមានភាពម្ចាស់ការ ខ្លួនទីពឹងខ្លួន  ពហុបំណងនិងទំនើប; ជំរុញការផ្សព្វផ្សាយម៉ាកសញ្ញានៃពិព័រណ៍ការពារជាតិអន្តរជាតិវៀតណាម; មានយន្តការ និងគោលនយោបាយដើម្បីកៀរគរធនធាន និងលើកទឹកចិត្តសាជីវកម្ម ក្រុមហ៊ុន និងធុរកិច្ចក្នុងស្រុក និងបរទេស ដើម្បីចូលរួមក្នុងការតាំងពិព័រណ៍នេះ។

អ្នកយកព័ត៌មាន៖ សូមអរគុណលោកអនុរដ្ឋមន្ត្រី!

បកប្រែដោយ Huyen Trang