ជំរុញកិច្ចសហប្រតិបត្តិការលើវិស័យការពារជាតិវៀតណាម-ប៉ូឡូញឱ្យកាន់តែរីកចម្រើន ស៊ីជម្រៅ និងជាក់ស្តែង
កប.អនឡាញ - នាព្រឹកថ្ងៃទី ១៧ ខែមេសា នៅទីស្នាក់ការក្រសួងការពារប្រទេស លោកឧត្តមសេនីយ៍ឯក Hoang Xuan Chien សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេសវៀតណាម បានទទួលជួបលោក Aleksander Surdej ឯកអគ្គរដ្ឋទូតប៉ូឡូញប្រចាំនៅវៀតណាម។
ក្នុងជំនួបនេះ លោកឧត្តមសេនីយ៍ឯក Hoang Xuan Chien បានអបអរសាទរចំពោះលោក Aleksander Surdej ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប៉ូឡូញប្រចាំនៅវៀតណាម។ លោកឧត្តមសេនីយ៍ឯក Hoang Xuan Chien បានចែករំលែកថា ក្នុងរយៈពេលកន្លងមក ទំនាក់ទំនងសហប្រតិបត្តិការលើវិស័យការពារជាតិវៀតណាម-ប៉ូឡូញ ត្រូវបានអនុវត្តកាន់តែជាក់ស្តែង និងប្រកបដោយប្រសិទ្ធភាព។ លោកឧត្តមសេនីយ៍ឯក Hoang Xuan Chien បានសម្តែងនូវក្តីសង្ឃឹមថា នាពេលខាងមុខ ភាគីទាំងពីរនឹងបន្តសម្របសម្រួលយ៉ាងជិតស្និទ្ធ ដើម្បីអនុវត្តខ្លឹមសារនៃកិច្ចសហប្រតិបត្តិការសំខាន់ៗមួយចំនួនដូចជា៖ ការផ្លាស់ប្តូរគណៈប្រតិភូគ្រប់ជាន់ថ្នាក់; ពង្រឹងក្របខណ្ឌ និងយន្តការនៃកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ; បង្កើតលក្ខខណ្ឌអំណោយផលសម្រាប់សហគ្រាសការពារជាតិនៃប្រទេសទាំងពីរជួបជុំ និងស្រាវជ្រាវលទ្ធភាពសហប្រតិបត្តិការ ក្នុងនោះមានការចូលរួមពិព័រណ៍ការពារជាតិអន្តរជាតិវៀតណាមឆ្នាំ ២០២៤; ប៉ូឡូញបន្តគាំទ្រសកម្មភាពសហប្រតិបត្តិការលើវិស័យការពារជាតិរវាងវៀតណាមនិងសហភាពអឺរ៉ុប។
|
|
លោកឧត្តមសេនីយ៍ឯក Hoang Xuan Chien ទទួលជួបលោក Aleksander Surdej ឯកអគ្គរដ្ឋទូតប៉ូឡូញប្រចាំនៅវៀតណាម |
ក្នុងឱកាសនេះ តាងនាមក្រសួងការពារប្រទេសវៀតណាម លោកឧត្តមសេនីយ៍ឯក Hoang Xuan Chien បានអញ្ជើញរដ្ឋមន្ត្រី និងថ្នាក់ដឹកនាំក្រសួងការពារជាតិប៉ូឡូញមកទស្សនា និងចូលរួមពិព័រណ៍ការពារជាតិអន្តរជាតិវៀតណាមឆ្នាំ ២០២៤។ លោកឧត្តមសេនីយ៍ឯក Hoang Xuan Chien ក៏បានស្នើឱ្យភាគីទាំងពីរចុះហត្ថលេខាលើអនុស្សរណៈយោគយល់គ្នាថ្មីស្តីពីកិច្ចសហប្រតិបត្តិការលើវិស័យការពារជាតិ បន្តជំរុញកិច្ចសហប្រតិបត្តិការក្នុងការបណ្តុះបណ្តាល ព្រមទាំងស្នើឱ្យប៉ូឡូញជួយឧបត្ថម្ភការបណ្តុះបណ្តាលវិស័យសន្តិសុខតាមអ៊ីនធឺណិត និងពេទ្យយោធាសម្រាប់វៀតណាម។
លោកឯកអគ្គរដ្ឋទូត Aleksander Surdej បានស្នើឲ្យក្រសួងការពារប្រទេសវៀតណាមបន្តបង្កើតលក្ខខណ្ឌអំណោយផលសម្រាប់អនុព័ន្ធការពារជាតិប៉ូឡូញ បំពេញភារកិច្ចប្រកបដោយជោគជ័យក្នុងអាណត្តិបេសកកម្មការទូតនៅវៀតណាម។ លោកឯកអគ្គរដ្ឋទូត Aleksander Surdej បានសង្កត់ធ្ងន់ថា ប៉ូឡូញត្រៀមខ្លួនជាស្រេចជួយឧបត្ថម្ភវៀតណាមក្នុងការបណ្តុះបណ្តាលសិក្ខាកាមនៅបណ្តាសាលាយោធានៅប៉ូឡូញ និងត្រៀមខ្លួនជាស្រេចចែករំលែកបទពិសោធន៍របស់ប៉ូឡូញក្នុងវិស័យរក្សាសន្តិភាពជាមួយវៀតណាម។ លោកឯកអគ្គរដ្ឋទូត Aleksander Surdej ក៏បានបញ្ជាក់ថា លោកនឹងខិតខំប្រឹងប្រែងឱ្យអស់ពីសមត្ថភាព ដើម្បីរួមចំណែកជំរុញទំនាក់ទំនងសហប្រតិបត្តិការលើវិស័យការពារជាតិរវាងប្រទេសទាំងពីរឱ្យកាន់តែរីកចម្រើន ស៊ីជម្រៅ និងជាក់ស្តែង៕
បកប្រែដោយ Huyen Trang