ពង្រឹងកិច្ចសហប្រតិបត្តិការលើវិស័យការពារជាតិរវាងវៀតណាមជាមួយ​អាមេរិក និងអូស្ត្រាលី

លោកឧត្តមសេនីយ៍ឯក Hoang Xuan Chien ទទួលជួបជាមួយលោកស្រី Aler Grubbs

នៅក្នុងជំនួបនេះ លោកឧត្តមសេនីយ៍ឯក Hoang Xuan Chien បានសម្តែងនូវជំនឿថា ជាមួយនឹងបទពិសោធន៍របស់ខ្លួន លោកស្រី Aler Grubbs និងវរសេនីយ៍ឯក Thomas Bouchillon នឹងរួមចំណែកជាវិជ្ជមានជាច្រើនចំពោះទំនាក់ទំនងវៀតណាម-អាមេរិក ជាពិសេសក្នុងបរិបទឆ្នាំ ២០២៣ ប្រទេសទាំងពីរមានសកម្មភាពជាច្រើន ដើម្បីអបអរសាទរខួបលើកទី ១០ នៃការបង្កើតភាពជាដៃគូទូលំទូលាយ។ លោកអះអាងថា អាមេរិកគឺជាដៃគូឈានមុខគេមួយរបស់វៀតណាម ហើយវៀតណាមមានបំណងចង់ជំរុញទំនាក់ទំនងទ្វេភាគីដើម្បីផលប្រយោជន៍នៃប្រទេសទាំងពីរ រួមចំណែករក្សាសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍ក្នុងតំបន់ ក៏ដូចជាក្នុងពិភពលោក។

ទិដ្ឋភាពនៃជំនួប

លោកស្រី Aler Grubbs បានវាយតំលៃខ្ពស់ចំពោះកិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរលើវិស័យដូចជា ជំនះផលវិបាកនៃសង្គ្រាម បម្រែបម្រួលអាកាសធាតុ និងការអប់រំ ...; លោកស្រីបានបង្ហាញជំនឿជាក់ថា កិច្ចសហប្រតិបត្តិការលើវិស័យការពារជាតិទ្វេភាគីរវាងវៀតណាម និងសហរដ្ឋអាមេរិកនឹងបន្តអភិវឌ្ឍន៍នាពេលខាងមុខ។ លោកវរសេនីយ៍ឯក Thomas Bouchillon បានសង្កត់ធ្ងន់លើសារៈសំខាន់នៃកិច្ចសហប្រតិបត្តិការក្នុងការជំនះពុះពារលើផលវិបាកនៃសង្គ្រាមរវាងវៀតណាម និងសហរដ្ឋអាមេរិក ដោយចាត់ទុកថា នេះគឺជាមូលដ្ឋានគ្រឹះសម្រាប់ការអភិវឌ្ឍកិច្ចសហប្រតិបត្តិការលើវិស័យផ្សេងៗ។

* នាព្រឹកថ្ងៃដដែល លោឧត្តមសេនីយ៍ឯក Hoang Xuan Chien បានទទួលជួបលោកវរសេនីយ៍ឯក Paul Brendon Foura អនុព័ន្ធយោធាអូស្ត្រាលី ដែលបានអញ្ជើញមកជំរាបលាក្នុងឱកាសបញ្ចប់បេសកកម្មការងាររបស់ខ្លួន និងលោកវរសេនីយ៍ឯក Michael Jansen ទទួលតំណែងអនុព័ន្ធយោធាអូស្ត្រាលីប្រចាំវៀតណាមអាណតិ្ត ២០២៣-២០២៦។

បកប្រែដោយ Duy Hoan