វៀតណាម និងអូស្រ្តាលីសហការគ្នាលើបេសកកម្មថែរក្សាសន្តិភាពនៅស៊ូដង់ខាងត្បូង
កប.អនឡាញ - អូស្ត្រាលីបានបន្តប្រើយន្តហោះដឹកជញ្ជូនដើម្បីជួយគាំទ្រដល់ការដឹកជញ្ជូនយោធិន និងឧបករណ៍របស់កងកម្លាំងរក្សាសន្តិភាពវៀតណាមនៅស្ថានបេសកកម្មអង្គការសហប្រជាជាតិប្រចាំស៊ូដង់ខាងត្បូង (UNMISS) មកកាន់ប្រទេសវៀតណាមវិញកាលពីចុងខែមីនាកន្លងមកក្នុងបំណងពង្រឹងទំនាក់ទំនង កិច្ចសហប្រតិបត្តិការទ្វេភាគី។
យោងតាមព័ត៌មានពីគេហទំព័រអូស្រ្តាលី DefenseConnect បានឱ្យដឹងថា ការដឹកជញ្ជូនតាមផ្លូវអាកាសនេះត្រូវបានភាគីអូស្រ្តាលីធ្វើឡើងដោយយន្ដហោះដឹកជញ្ជូន C-17A Globemaster របស់កងកំលាំងទ័ពអាកាសភូមិន្ទអូស្ត្រាលី (RAAF) ដែលដឹកសមាជិក និងឧបករណ៍ថ្មីមកជំនួសកងពេទ្យកម្រិត២ របស់ UNMISS ហើយវាជាការដឹកជញ្ជូនតាមផ្លូវអាកាសជួយគាំទ្រវៀតណាម លើកទី៣។
    |
 |
|
យន្តហោះដឹកជញ្ជូន C-17A Globemaster របស់អូស្ត្រាលី (រូបថត៖ vnanet.vn) |
នៅក្នុងសេចក្តីជូនដំណឹងលើកទី៣ ស្តីពីការដឹកជញ្ជូនតាមផ្លូវអាកាស លោកឧត្តមសេនីយ៍ទោ Greg Bilton មេបញ្ជាការនៃបញ្ជាការដ្ឋានកលយុទ្ធ បានមានសេចក្ដីថ្លែងការណ៍អំពីទំនាក់ទំនងដែលកំពុងកើនឡើងរវាងអូស្ត្រាលី និងវៀតណាម។
លោកបានសង្កត់ធ្ងន់ថា “វៀតណាមគឺជាដៃគូសំខាន់មួយរបស់អូស្ត្រាលីនៅឥណ្ឌូ - ប៉ាស៊ីហ្វិក ហើយខ្ញុំមានមោទនភាពដែលកម្លាំងការពារជាតិអូស្ត្រាលី (ADF) បានជួយគាំទ្រដល់ការដាក់ពង្រាយកម្លាំងរក្សាសន្តិភាពរបស់វៀតណាមមក UNMISS។ ទំនាក់ទំនងភាពជាដៃគូរក្សាសន្តិភាពរវាងប្រទេសយើងទាំងពីរគឺជាកត្តាសំខាន់មួយក្នុងទំនាក់ទំនងការពារជាតិ។ ទំនាក់ទំនងនេះបង្ហាញពីចក្ខុវិស័យរួមរបស់យើងអំពីតំបន់មួយដែលមានសន្តិភាព បរិយាបន្ន និងរឹងមាំ ដែលជួយគាំទ្រដល់សន្តិសុខពិភពលោកយ៉ាងសកម្ម”។
ការដឹកជញ្ជូនតាមផ្លូវអាកាសនេះបានដឹកមនុស្សប្រមាណ ១២០ នាក់ និងទំនិញ ៥៥,០០០ គីឡូក្រាម ក្នុងរយៈពេលជាងពីរខែ៕
បកប្រែដោយ Duy Hoan